ಸಿಡ್ನಿ: ಸಿಡ್ನಿ ಕ್ರಿಕೆಟ್ ಮೈದಾನದಲ್ಲಿ (ಎಸ್ಸಿಜಿ) ಆ್ಯಶಸ್ ಸರಣಿಯ ನಾಲ್ಕನೇ ಪಂದ್ಯಕ್ಕೆ ಮೂರು ದಿನ ಇರುವಾಗಲೇ ಆಸ್ಟ್ರೇಲಿಯಾದ ಮಾಜಿ ವೇಗಿ ಗ್ಲೆನ್ ಮೆಕ್‌ಗ್ರಾತ್ಗೆ ಕೋವಿಡ್ ತಗುಲಿದೆ. ಪಿಂಕ್ ಟೆಸ್ಟ್ ಪಂದ್ಯ ಇದಾಗಿದ್ದು, 2008ರಲ್ಲಿ ಸ್ತನ ಕ್ಯಾನ್ಸರ್‌ನಿಂದ ನಿಧನರಾದ ಮೆಕ್‌ಗ್ರಾತ್ ಅವರ ಪತ್ನಿ ಜೇನ್ ಅವರ ನೆನಪಿಗಾಗಿ ಎಸ್‌ಸಿಜಿಯಲ್ಲಿ ವಾರ್ಷಿಕವಾಗಿ ಪಿಂಕ್ ಟೆಸ್ಟ್ ಆಯೋಜಿಸಲಾಗುತ್ತದೆ.
ಕೋವಿಡ್ ವೈರಸ್ನಿಂದಾಗಿ ಮಹತ್ವದ ಪಂದ್ಯದಲ್ಲಿ ಪಾಲ್ಗೊಳ್ಳುವಿಕೆಯಿಂದ ಮೆಕ್‌ಗ್ರಾತ್ ವಂಚಿತರಾಗುವ ಸಾಧ್ಯತೆ ದಟ್ಟವಾಗಿದೆ. ಆಸ್ಟ್ರೇಲಿಯಾದಲ್ಲಿ 2022ರ ಮೊದಲ ಟೆಸ್ಟ್ ಪಂದ್ಯ ಇದಾಗಿದ್ದು, ಪ್ರಮುಖವಾಗಿ ಮೆಕ್‌ಗ್ರಾತ್ ಫೌಂಡೇಶನ್ ನಿಧಿಸಂಗ್ರಹಿಸಿ ಈ ಮಾರಕ ಕಾಯಿಲೆಯಿಂದ ಬಳಲುತ್ತಿರುವವರ ಕುಟುಂಬ ಮತ್ತು ಅವರನ್ನು ಪಾಲನೆ ಮಾಡುವ ದಾದಿಯರಿಗೆ ಸಹಾಯ ಮಾಡುತ್ತದೆ.
ಜನವರಿ 5ರಿಂದ ಆರಂಭವಾಗಲಿರುವ ಪಿಂಕ್ ಟೆಸ್ಟ್ ಪಂದ್ಯದ ಮೂರನೇ ದಿನವನ್ನು 'ಜೇನ್ ಮೆಕ್‌ಗ್ರಾತ್ ಡೇ' (ಜನವರಿ 7) ಎಂದು ಕರೆಯಲಾಗುತ್ತದೆ. ಮೂರನೇ ದಿನದ ವೇಳೆಗೆ ಮೆಕ್‌ಗ್ರಾತ್ಗೆ ನೆಗೆಟಿವ್ ಬಂದರೆ ಮಾತ್ರ ಅವರು ಪಾಲ್ಗೊಳ್ಳಲಿದ್ದಾರೆ. ಇಲ್ಲದಿದ್ದರೆ ಅವರು ವರ್ಚುವಲ್ ಮೂಲಕ ಭಾಗವಹಿಸಲಿದ್ದಾರೆ.
ಪಿಸಿಆರ್ ಪರೀಕ್ಷೆ ನಂತರ ಮಾಜಿ ವೇಗಿಗೆ ಕೊರೊನಾ ತಗುಲಿರುವುದು ದೃಢಪಟ್ಟಿದೆ. ನಾವು ಗ್ಲೆನ್ ಮತ್ತು ಅವರ ಕುಟುಂಬದ ಉತ್ತಮ ಆರೋಗ್ಯವನ್ನು ಬಯಸುತ್ತೇವೆ. ಪಿಂಕ್ ಟೆಸ್ಟ್‌ನ 3ನೇ ದಿನದ ವೇಳೆಗೆ ಅವರು ಹಾಜರಾಗುತ್ತಾರೆ ಎಂಬ ಭರವಸೆ ಇದೆ. ಕ್ರಿಕೆಟ್ ಆಸ್ಟ್ರೇಲಿಯಾ ಮತ್ತು ಎಸ್ಸಿಜಿ ಪಾಲುದಾರಿಕೆಗೆ ನಾವು ಕೃತಜ್ಞರಾಗಿರುತ್ತೇವೆ. ಇಂಗ್ಲೆಂಡ್ ಕ್ರಿಕೆಟ್ ತಂಡ ಮತ್ತು ಪ್ರಸಾರಕರು ಪಿಂಕ್ ಟೆಸ್ಟ್‌ಗೆ ನೀಡಿರುವ ಬೆಂಬಲದ ಮೂಲಕ 'ಪಿಂಕೆಸ್ಟ್' ಆ್ಯಶಸ್ಗಾಗಿ ಎದುರು ನೋಡುತ್ತಿದ್ದೇವೆ ಎಂದು ಮೆಕ್‌ಗ್ರಾತ್ ಫೌಂಡೇಶನ್ ಮುಖ್ಯಸ್ಥರು ತಿಳಿಸಿದ್ದಾರೆ.
ಐದು ಪಂದ್ಯಗಳ ಆ್ಯಶಸ್ ಸರಣಿಯಲ್ಲಿ ಅಜೇಯ 3-0 ಮುನ್ನಡೆ ಸಾಧಿಸುವ ಮೂಲಕ ಆಸ್ಟ್ರೇಲಿಯಾ ಈಗಾಗಲೇ ಟ್ರೋಫಿಯನ್ನು ತನ್ನಲ್ಲೇ ಉಳಿಸಿಕೊಂಡಿದೆ.
ಇದನ್ನೂ ಓದಿ: 2022 ಭಾರತೀಯ ಕ್ರಿಕೆಟ್ಗೆ ಅತ್ಯಂತ ಬಿಡುವಿಲ್ಲದ ವರ್ಷ : ಇಲ್ಲಿದೆ ಸಂಪೂರ್ಣ ವೇಳಾಪಟ್ಟಿ
