ಲಾರ್ಡ್ಸ್ ಡ್ರೆಸ್ಸಿಂಗ್ ರೂಮ್​ನಲ್ಲೂ ನಡೆದಿತ್ತಂತೆ ಭಾರತ - ಇಂಗ್ಲೆಂಡ್ ಆಟಗಾರರ ನಡುವೆ ದೊಡ್ಡ ಜಗಳ!

ಕೊನೆಯಲ್ಲಿ ನಾನು ಕೋಪಗೊಂಡಿದ್ದೆ. ನನ್ನಲ್ಲಿ ಉಂಟಾದ ಭಾವನೆಯಿಂದ ನನ್ನನ್ನು ಆ ಸಂದರ್ಭದಲ್ಲಿ ಏನನ್ನಾದರೂ (ಬುಮ್ರಾಗೆ) ಹೇಳಬೇಕೆಂದು ಅನಿಸಿತು. ಆದರೆ, ಆ ಘಟನೆ ನನಗೆ ಬೇಸರ ತರಿಸಿದೆ. ಯಾಕೆಂದರೆ, ನನ್ನಿಂದ ಜೋ ರೂಟ್​ ಅವರ ಅದ್ಭುತ ಇನ್ನಿಂಗ್ಸ್​ನ ಸಂಭ್ರಮ ಮರೆಯಾಯಿತು. ನನ್ನ ಕೋಪ ಅವರ ಸಂಭ್ರಮಚಾರಣೆಗಿಂತಲೂ ಗಮನ ಸೆಳೆಯಿತು. ಅದಕ್ಕಾಗಿ ನಾನು ಕ್ಷಮೆಯಾಚಿಸುತ್ತೇನೆ..

ಲಂಡನ್ : 2ನೇ ಟೆಸ್ಟ್​ನ ಮೂರನೇ ದಿನದಾಟ ಮುಗಿದ ನಂತರ ಇಂಗ್ಲೆಂಡ್ ಮತ್ತು ಭಾರತ ತಂಡಗಳ ಆಟಗಾರರು ಲಾರ್ಡ್ಸ್​​ನ ಲಾಂಗ್​ ರೂಮಿನಲ್ಲಿ ಜಗಳವಾಡಿಕೊಂಡಿದ್ದಾರೆ ಎಂದು ತಡವಾಗಿ ಬೆಳಕಿಗೆ ಬಂದಿದೆ.

ಮಾಧ್ಯಮಗಳ ವರದಿಯ ಪ್ರಕಾರ ಜಸ್ಪ್ರೀತ್​ ಬುಮ್ರಾ 3ನೇ ದಿನದಾಟದ ಅಂತ್ಯದಲ್ಲಿ ಜೇಮ್ಸ್ ಆ್ಯಂಡರ್ಸನ್​ ಅವರಿಗೆ ಬೌನ್ಸರ್​ಗಳ ದಾಳಿ ನಡೆಸಿದ್ದರು. ಆ್ಯಂಡರ್ಸನ್​ ಔಟಾಗುತ್ತಿದ್ದಂತೆ ಅವರು ಬುಮ್ರಾ ಬಳಿ ಬಂದು ತಮ್ಮ ಕೋಪ ಹೊರ ಹಾಕಿದ್ದರು. ಈ ಸಂದರ್ಭದಲ್ಲಿ ಇಬ್ಬರು ಆಟಗಾರರ ನಡುವೆ ವಾಕ್ಸಮರ ನಡೆದಿತ್ತು.

ಆದರೆ, ಈ ವಾಕ್ಸಮರ ಕೇವಲ ಮೈದಾನಕ್ಕೆ ಮಾತ್ರ ಸೀಮಿತವಾಗಿಲ್ಲ, ಡ್ರೆಸ್ಸಿಂಗ್ ರೂಮ್​ನಲ್ಲೂ ಎರಡೂ ತಂಡದ ಆಟಗಾರರ ನಡುವೆ ಭಾರಿ ಜಗಳ ನಡೆದಿದೆ. ಇದು ಒಂದು ಹಂತದಲ್ಲಿ ಮಿತಿ ಮೀರಿತ್ತು ಎಂದು ವರದಿಗಳಿಂದ ತಿಳಿದು ಬಂದಿದೆ.

ಬುಮ್ರಾ ಮತ್ತು ಆ್ಯಂಡರ್ಸನ್ ಪರ ನಾಯಕರಾದ ವಿರಾಟ್​ ಕೊಹ್ಲಿ ಮತ್ತು ಜೋ ರೂಟ್​ ಕೂಡ ಈ ಸಂದರ್ಭದಲ್ಲಿ ಮಾತಿನ ಚಕಮಕಿ ನಡೆಸಿದ್ದಾರೆ ಎಂದು ಇಂಗ್ಲೆಂಡ್​ ಮಾಧ್ಯಮಗಳು ವರದಿ ಮಾಡಿವೆ.

ಇದಕ್ಕೂ ಮೊದಲು ವೇಗಿ ಜೇಮ್ಸ್ ಆ್ಯಂಡರ್ಸನ್​ ತಮ್ಮ ಮತ್ತು ಭಾರತೀಯ ಆಟಗಾರರ ನಡುವೆ ಏನಾಯಿತು ಎನ್ನುವುದನ್ನು ಬಹಿರಂಗಪಡಿಸಿದ್ದರು. ಲಾರ್ಡ್ಸ್​ ಟೆಸ್ಟ್​ನ 3ನೇ ದಿನ ಇಂಗ್ಲೆಂಡ್​ ಬ್ಯಾಟಿಂಗ್ ಮಾಡುವ ವೇಳೆ ಬುಮ್ರಾ ಬೌನ್ಸರ್​ ಎಸೆದಿದ್ದರಿಂದ ತಮಗೆ ಕೋಪ ಬಂದಿದ್ದು, ತಾವೂ ಭಾರತೀಯ ಆಟಗಾರರ ನಡುವೆ ಮಾತಿನ ಚಕಮಕಿ ನಡೆಸಿದ್ದಾಗಿ ತಿಳಿಸಿದ್ದಾರೆ.

"ಕೊನೆಯಲ್ಲಿ ನಾನು ಕೋಪಗೊಂಡಿದ್ದೆ. ನನ್ನಲ್ಲಿ ಉಂಟಾದ ಭಾವನೆಯಿಂದ ನನ್ನನ್ನು ಆ ಸಂದರ್ಭದಲ್ಲಿ ಏನನ್ನಾದರೂ (ಬುಮ್ರಾಗೆ) ಹೇಳಬೇಕೆಂದು ಅನಿಸಿತು. ಆದರೆ, ಆ ಘಟನೆ ನನಗೆ ಬೇಸರ ತರಿಸಿದೆ. ಯಾಕೆಂದರೆ, ನನ್ನಿಂದ ಜೋ ರೂಟ್​ ಅವರ ಅದ್ಭುತ ಇನ್ನಿಂಗ್ಸ್​ನ ಸಂಭ್ರಮ ಮರೆಯಾಯಿತು.

ನನ್ನ ಕೋಪ ಅವರ ಸಂಭ್ರಮಚಾರಣೆಗಿಂತಲೂ ಗಮನ ಸೆಳೆಯಿತು. ಅದಕ್ಕಾಗಿ ನಾನು ಕ್ಷಮೆಯಾಚಿಸುತ್ತೇನೆ. ಆದರೆ, ಆಟದಲ್ಲಿ ಇದು ಕೆಲವೊಮ್ಮೆ ಸಂಭವಿಸುತ್ತದೆ" ಎಂದು ಮಾಧ್ಯಮವೊಂದಕ್ಕೆ ಬರೆದ ಲೇಖನದಲ್ಲಿ ಆ್ಯಂಡರ್ಸನ್​ ಉಲ್ಲೇಖಿಸಿದ್ದಾರೆ.

ಇದನ್ನು ಓದಿ : ಕೊನೆಗೂ ಟಾಸ್​ ಗೆದ್ದ ಕೊಹ್ಲಿ.. ಇಂಗ್ಲೆಂಡ್​ ನೆಲದಲ್ಲಿ ಸತತ ಟಾಸ್​ ಸೋಲಿನ ಸರಪಳಿಗೆ ಬ್ರೇಕ್