ಕೇಪ್ಟೌನ್(ದಕ್ಷಿಣ ಆಫ್ರಿಕಾ): ಭಾರತ-ದಕ್ಷಿಣ ಆಫ್ರಿಕಾ ತಂಡಗಳ ನಡುವಿನ ಟೆಸ್ಟ್ ಪಂದ್ಯದಲ್ಲಿ ಡಿಸಿಶನ್ ರಿವ್ಯೂ ಸಿಸ್ಟಂ (ಡಿಆರ್ಎಸ್) ವಿವಾದ ಮತ್ತೊಮ್ಮೆ ಕೇಳಿ ಬಂದಿದ್ದು, ಎಲ್ಬಿ ಬಲೆಗೆ ಬಿದ್ದ ಡೀನ್ ಎಲ್ಗರ್ ವಿಚಾರವಾಗಿ ಟೀಂ ಇಂಡಿಯಾ ಆಟಗಾರರು ತೀವ್ರ ಅಸಮಾಧಾನ ವ್ಯಕ್ತಪಡಿಸಿದ್ದಾರೆ. ಇದೇ ವಿಚಾರವಾಗಿ ಪ್ರತಿಕ್ರಿಯಿಸಿರುವ ದಕ್ಷಿಣ ಆಫ್ರಿಕಾದ ವೇಗಿ ಲುಂಗಿ ಎಂಗಿಡಿ, ಭಾರತ ತಂಡ ಹತಾಶೆ ಮತ್ತು ಒತ್ತಡದಲ್ಲಿದೆ ಎಂದಿದ್ದಾರೆ.
ಕ್ರೀಸ್ನಲ್ಲಿ ಬ್ಯಾಟಿಂಗ್ ಮಾಡ್ತಿದ್ದ ಡೀನ್ ಎಲ್ಗರ್ ಆಫ್ ಸ್ಪಿನ್ನರ್ ರವಿಚಂದ್ರನ್ ಅಶ್ವಿನ್ ಓವರ್ನಲ್ಲಿ ಎಲ್ಬಿಡಬ್ಲೂ ಬಲೆಗೆ ಸಿಲುಕಿದ್ದರು. ಈ ವೇಳೆ ಅಂಪೈರ್ ಕೂಡ ಔಟ್ ಎಂದು ಘೋಷಿಸಿದ್ದರು. ಆದರೆ, ಬ್ಯಾಟರ್ ಎಲ್ಗರ್ ಡಿಆರ್ಎಸ್ ಮೊರೆ ಹೋಗಿದ್ದಾರೆ.
ಡಿಆರ್ಎಸ್ನಲ್ಲಿ ಚೆಂಡು ವಿಕೆಟ್ಗೆ ತಾಕದೇ ಮೇಲೆ ಹೋದಂತೆ ತೋರಿಸಿ, ನಾಟ್ಔಟ್ ಎಂದು ತೀರ್ಪು ನೀಡಲಾಯಿತು. ಈ ವಿಚಾರವಾಗಿ ಟೀಂ ಇಂಡಿಯಾ ಕ್ಯಾಪ್ಟನ್ ವಿರಾಟ್, ರವಿಚಂದ್ರನ್ ಅಶ್ವಿನ್ ಹಾಗೂ ಕೆ.ಎಲ್.ರಾಹುಲ್ ಆಕ್ರೋಶ ವ್ಯಕ್ತಪಡಿಸಿದರು. ಇದಕ್ಕೆ ಪ್ರತಿಕ್ರಿಯೆ ನೀಡಿರುವ ಎಂಗಿಡಿ, ಟೀಂ ಇಂಡಿಯಾ ಹತಾಶೆ ಮತ್ತು ಒತ್ತಡದಲ್ಲಿದ್ದಾರೆ. ಇದರಿಂದಲೇ ಅನೇಕ ತಂಡಗಳು ಲಾಭ ಪಡೆದುಕೊಳ್ಳಲು ಮುಂದಾಗುತ್ತವೆ ಎಂದು ಟೀಕಿಸಿದರು.
ಕೇಪ್ಟೌನ್ನಲ್ಲಿ ಭಾರತ-ದಕ್ಷಿಣ ಆಫ್ರಿಕಾ ತಂಡಗಳ ನಡುವಿನ ಅಂತಿಮ ಟೆಸ್ಟ್ ಪಂದ್ಯದಲ್ಲಿ ಹರಿಣಗಳ ತಂಡ ಸಂಪೂರ್ಣ ಪ್ರಾಬಲ್ಯ ಸಾಧಿಸಿದ್ದು, ಸುಲಭ ಗೆಲುವಿನ ನಿರೀಕ್ಷೆಯಲ್ಲಿದೆ.
