ನವದೆಹಲಿ: ಆಸ್ಟ್ರೇಲಿಯಾ ವಿರುದ್ಧದ ವಿಶ್ವ ಟೆಸ್ಟ್ ಚಾಂಪಿಯನ್‌ಶಿಪ್ (ಡಬ್ಲ್ಯುಟಿಸಿ) ಫೈನಲ್‌ನಲ್ಲಿ ಭಾರತ ಹೀನಾಯವಾಗಿ ಸೋತ ನಂತರ ಟೀಂ ಇಂಡಿಯಾದ ಮ್ಯಾನೇಜ್‌ಮೆಂಟ್ ಮತ್ತು ನಾಯಕ ರೋಹಿತ್ ಶರ್ಮಾ ತೀವ್ರ ಟೀಕೆಗಳನ್ನು ಎದುರಿಸುತ್ತಿದ್ದಾರೆ. ಹಲವು ದಿಗ್ಗಜರು ಶರ್ಮಾ ಅವರನ್ನು ನಾಯಕತ್ವದಿಂದ ಕೆಳಗಿಳಿಸುವ ಬಗ್ಗೆ ಮಾತನಾಡಿದ್ದಾರೆ. ಭಾರತದ ಮಾಜಿ ಕ್ರಿಕೆಟಿಗ ಮತ್ತು ಆಯ್ಕೆಗಾರ ದಿಲೀಪ್ ವೆಂಗ್ಸರ್ಕರ್ ಅವರ ಹೆಸರೂ ಸಹ ಟೀಕಿಸಿದ ಅನುಭವಿಗಳ ಪಟ್ಟಿಗೆ ಸೇರ್ಪಡೆಯಾಗಿದೆ.
ವೆಂಗ್ಸರ್ಕರ್ ಅವರು ರೋಹಿತ್ ಶರ್ಮಾ ಮತ್ತು ಬ್ಯಾಟರ್ಗಳನ್ನು ಗುರಿಯಾಗಿಸಿಕೊಂಡಿಲ್ಲ, ಆದರೂ ಅವರು ನೇರವಾಗಿ ಬಿಸಿಸಿಐನ ಮೇಲೆ ಹರಿಹಾಯ್ದಿದ್ದಾರೆ. ಬಿಸಿಸಿಐನ ಆಯ್ಕೆ ಸಮಿತಿ ಮತ್ತು ತಂಡದ ಮ್ಯಾನೇಜ್‌ಮೆಂಟ್ ಮುಂದಾಲೋಚನೆ ರಹಿತವಾಗಿ ಕೆಲಸ ಮಾಡುತ್ತಿದೆ ಎಂದು ಟೀಕಿಸಿದ್ದಾರೆ.
ದಿಲೀಪ್ ವೆಂಗ್ಸರ್ಕರ್ ಇತ್ತೀಚಿನ ಸಂದರ್ಶನವೊಂದರಲ್ಲಿ,"ರೋಹಿತ್ ಶರ್ಮಾ ಪ್ರಸ್ತುತ ನಾಯಕರಾಗಿದ್ದಾರೆ. ಆದರೆ ಭವಿಷ್ಯದ ನಾಯಕನಾಗಿ ಬಿಸಿಸಿಐ ಯಾವುದೇ ಆಟಗಾರನನ್ನು ಇನ್ನೂ ಸಿದ್ಧಪಡಿಸಿಲ್ಲ. ಇದೊಂದು ದೊಡ್ಡ ವೈಫಲ್ಯ. ಕಳೆದ 6- 7 ವರ್ಷಗಳಿಂದ ನಾನು ನೋಡಿದ ಆಯ್ಕೆದಾರರಿಗೆ ಆಟದ ಬಗ್ಗೆ ಯಾವುದೇ ತಿಳುವಳಿಕೆ ಇಲ್ಲ ಅಥವಾ ಅವರಿಗೆ ಯಾವುದೇ ದೂರದೃಷ್ಟಿಯೇ ಇಲ್ಲ" ಎಂದು ಹೇಳಿದರು.
ಇದಕ್ಕೆ ಕಾರಣವೂ ಇದೆ. ಶಿಖರ್ ಧವನ್ ಅವರನ್ನು ಕೆಲ ಪಂದ್ಯಗಳಿಗೆ ನಾಯಕರನ್ನಾಗಿ ಮಾಡಲಾಯಿತು. ಆದರೆ, ಮತ್ತೆ ಅವರನ್ನೇ ತಂಡದಿಂದ ಹೊರಗಿಡಲಾಗಿದೆ. ರಹಾನೆಯ ಸ್ಥಿತಿಯೂ ತಂಡದಲ್ಲಿ ಹಾಗೇ ಇದೆ. ಪಂತ್ ಅವರನ್ನು ಬಿಸಿಸಿಐ ಮುಂದಿನ ನಾಯಕ ಎಂಬಂತೆ ಬಿಂಬಿಸಿ ಆಡಿಸುತ್ತಿತ್ತು. ಆದರೆ ಪರ್ಯಾಯ ಆಟಗಾರರನ್ನು ಸರಿಯಾಗಿ ಹುಟ್ಟುಹಾಕಿಲ್ಲ. ಈಗ ನಾಯಕತ್ವ ಅನಿಶ್ಚಿತವಾಗಿರುವುದಂತೂ ಅಭಿಮಾನಿಗಳಿಗೆ ಕಾಣುತ್ತಿರುವ ಸತ್ಯ.
"ನೀವು ಯಾರನ್ನೂ ಸರಿಯಾಗಿ ಟ್ರೈನ್ ಮಾಡಿಲ್ಲ. ಪ್ರಪಂಚದ ಶ್ರೀಮಂತ ಕ್ರಿಕೆಟ್ ಮಂಡಳಿ ಬಗ್ಗೆ ಮಾತನಾಡುತ್ತದ್ದೇನೆ. ಆದರೆ ಬೆಂಚ್ ಸ್ಟ್ರೆಂತ್ ಎಲ್ಲಿದೆ? ಕೇವಲ ಐಪಿಎಲ್ ಅನ್ನು ಹೊಂದಿದ್ದು, ಮಾಧ್ಯಮ ಹಕ್ಕುಗಳಲ್ಲಿ ಕೋಟಿ ರೂಪಾಯಿ ಗಳಿಸಿದೆ, ಇದು ಮಾತ್ರ ದೊಡ್ಡ ಸಾಧನೆ ಆಗಿದೆ" ಎಂದು ಸಂಸ್ಥೆಯ ಮೇಲೆ ನೇರ ವಾಗ್ದಾಳಿ ಮಾಡಿದ್ದಾರೆ.
ಸುನಿಲ್ ಗವಾಸ್ಕರ್ ನೇರವಾಗಿ ಪಂದ್ಯದಲ್ಲಿ ಬ್ಯಾಟರ್ಗಳು ಜವಾಬ್ದಾರಿ ರಹಿತರಾಗಿ ಬ್ಯಾಟಿಂಗ್ ಮಾಡಿದ್ದಾರೆ ಎಂದು ಹೇಳಿದ್ದರು. ವಿರಾಟ್ ಕೊಹ್ಲಿ, ರೋಹಿತ್ ಶರ್ಮಾ, ಚೇತೇಶ್ವರ ಪೂಜಾರ ಕೊನೆಯ ಇನ್ನಿಂಗ್ಸ್ನಲ್ಲಿ ವಿಕೆಟ್ ಕೊಟ್ಟ ಶಾಟ್ ಅನುಭವಿ ಆಟಗಾರ ಒಬ್ಬ ಆಡುವ ಶಾಟ್ ಅಲ್ಲ ಎಂದು ವಿಶ್ಲೇಷಿಸಿದ್ದರು.
ಕೋಚ್ ರಾಹುಲ್ ದ್ರಾವಿಡ್ ಮತ್ತು ನಾಯಕ ರೋಹಿತ್ ಶರ್ಮಾ ಅಭ್ಯಾಸಕ್ಕೆ 25 ದಿನಗಳ ಕಾಲಾವಕಾಶ ಬೇಕಿತ್ತು. ಆಗ ಮಾತ್ರ ವಿದೇಶಿ ಪಿಚ್ ಮತ್ತು ವಾತಾವರಣಕ್ಕೆ ಹೊಂದಿಕೊಂಡು ಆಡಬಹುದು ಎಂದಿದ್ದರು. ಜೊತೆಗೆ ಕ್ಯಾಪ್ಟನ್ ರೋಹಿತ್ ಶರ್ಮಾ ಮೂರು ಪಂದ್ಯಗಳ ಸರಣಿಯ ರೀತಿಯಲ್ಲಿ ಫೈನಲ್ ಆಯೋಜನೆ ಆದರೆ ಒಳ್ಳೆಯದು ಎಂದು ಸಹ ಅಭಿಪ್ರಾಯಿಸಿದ್ದರು.
ಬಹುತೇಕರು ಆರ್. ಅಶ್ವಿನ್ ಅವರನ್ನು ಆಡುವ ಹನ್ನೊಂದರ ಬಳಗದಲ್ಲಿ ಆಡಿಸದೇ ಇದ್ದದ್ದು ತಪ್ಪು. ಟೆಸ್ಟ್ನ ನಂ 1 ಬೌಲರ್ ಆಗಿರುವ ಅವರಿಗೆ ವೇಗದ ಪಿಚ್ ಎಂಬ ಕಾರಣಕ್ಕೆ ಕೈಬಿಟ್ಟಿದ್ದು ಸರಿಯಲ್ಲ ಎಂದೂ ಹೇಳಲಾಗಿತ್ತು. ಇದನ್ನು ಬಿಸಿಸಿಐ ಅಧ್ಯಕ್ಷ ರೋಜರ್ ಬಿನ್ನಿ ಸಹ ಇತ್ತೀಚೆಗೆ ಹೇಳಿದ್ದರು.
ಇದನ್ನೂ ಓದಿ: Ashes: ಆ್ಯಶಸ್- ಮೊದಲ ಟೆಸ್ಟ್: ಆಸ್ಟ್ರೇಲಿಯಾ ಗೆಲುವಿಗೆ ಬೇಕು 281 ರನ್
