ನವದೆಹಲಿ: ಕ್ರಿಕೆಟ್ ಹೊಂದಿರುವ ಶತಕೋಟಿ ಅಭಿಮಾನಿಗಳಲ್ಲಿ ಶೇ 92ರಷ್ಟನ್ನು ಹೊಂದಿರುವ ಭಾರತ ಉಪಖಂಡವನ್ನು ಉಲ್ಲೇಖಿಸಿ 2028ರ ಲಾಸ್ ಏಂಜಲೀಸ್ ಒಲಿಂಪಿಕ್ಸ್ನಲ್ಲಿ ಕ್ರಿಕೆಟ್ ಸೇರ್ಪಡೆಗೊಳಿಸುವಂತೆ ಒತ್ತಾಯಿಸಲು ಐಸಿಸಿ ನಿರ್ಧರಿಸಿದೆ.
"ಲಾಸ್ ಏಂಜಲೀಸ್ ಒಲಿಂಪಿಕ್ಸ್ನಲ್ಲಿ ಕ್ರಿಕೆಟ್ ಅನ್ನು ಸ್ವೀಕರಿಸಿದರೆ, ಭಾರತದಲ್ಲಿನ ಅಭಿಮಾನಿಗಳಿಂದ ಒಲಿಂಪಿಕ್ಸ್ ಹೆಚ್ಚು ಎಂಗೇಜ್ಮೆಂಟ್ ಗಳಿಸುವ ಅವಕಾಶ ದೊರೆಯುತ್ತದೆ" ಎಂದು ಐಸಿಸಿ ಒತ್ತಿ ಹೇಳಿದೆ. ಈ ಪ್ರದೇಶದಲ್ಲಿ ಬೇರೆ ಯಾವುದೇ ಕ್ರೀಡೆಗಳಿಗಿರುವುದಕ್ಕಿಂತ ಹೆಚ್ಚು ಅಭಿಮಾನಿಗಳನ್ನು ಕ್ರಿಕೆಟ್ ಹೊಂದಿದೆ ಎಂದು ಐಸಿಸಿ ಉಲ್ಲೇಖಿಸಿದೆ.
2019ರಲ್ಲಿ ಇಂಗ್ಲೆಂಡ್ನಲ್ಲಿ ನಡೆದಿದ್ದ ವಿಶ್ವಕಪ್ ಪರಿಗಣನೆಗೆ ತೆಗೆದುಕೊಂಡರೆ, ವಿಶ್ವದಾದ್ಯಂತ ಸುಮಾರು 545 ಮಿಲಿಯನ್ ಅಭಿಮಾನಿಗಳನ್ನು ಆಕರ್ಷಿಸುವ ಮೂಲಕ ತನ್ನ ವ್ಯಾಪ್ತಿಯನ್ನು ತೋರಿಸಿದೆ.
ಐಸಿಸಿ ತನ್ನ ವಿವಿಧ ಸಾಮಾಜಿಕ ಜಾಲತಾಣದಲ್ಲಿ 2019ರ ಏಕದಿನ ವಿಶ್ವಕಪ್ನ ವಿಡಿಯೋಗಳನ್ನು ಹಂಚಿಕೊಂಡಿದ್ದು, ಅದರಲ್ಲಿ ಗಮನಾರ್ಹ ವೀಕ್ಷಕರ ಸಂಖ್ಯೆಯನ್ನು ಪಡೆದುಕೊಂಡಿದೆ. ಫೇಸ್ಬುಕ್ನಲ್ಲಿ ಹಂಚಿಕೊಂಡ ವಿಡಿಯೋಗಳು 4.6 ಬಿಲಿಯನ್ ವೀಕ್ಷಣೆಯಾಗಿದ್ದರೆ, ಯೂಟ್ಯೂಟ್ನಲ್ಲಿ 3.5 ಬಿಲಿಯನ್ ವೀಕ್ಷಣೆಯಾಗಿದೆ. #CWC10 ಎಂಬ ಹ್ಯಾಶ್ಟ್ಯಾಗ್ನಲ್ಲಿ ಸುಮಾರು 31 ಮಿಲಿಯನ್ ಟ್ವೀಟ್ ಮಾಡಲಾಗಿದೆ. ಅಲ್ಲದೆ ಈ ಅವಧಿಯಲ್ಲಿ ಕ್ರಿಕೆಟ್ 14 ಮಿಲಿಯನ್ ಹೊಸ ಹಿಂಬಾಲಕರನ್ನು ಪಡೆದುಕೊಂಡಿದೆ. ಇದೆಲ್ಲಾ ಮಾಹಿತಿಯುಳ್ಳ ಒಂದು ದಾಖಲೆಯನ್ನು ಐಸಿಸಿ ತಯಾರಿಸಿದ್ದು, ಕ್ರಿಕೆಟ್ ಆಟವನ್ನು 2028ರ ಒಲಿಂಪಿಕ್ಸ್ಗೆ ಸೇರ್ಪಡೆಗೊಳಿಸಲು ಪ್ರಸ್ತಾವನೆ ಸಲ್ಲಿಸಲು ಮುಂದಾಗಿದೆ ಎಂದು ತಿಳಿದುಬಂದಿದೆ.
ಕ್ರಿಕೆಟ್ ವಿಶ್ವಕಪ್ನ ಈ ದಾಖಲೆಯನ್ನು 2016ರ ರಿಯೋ ಒಲಿಂಪಿಕ್ಸ್ನೊಂದಿಗೆ ಹೋಲಿಕೆ ಮಾಡುವ ಮೂಲಕ ಕ್ರಿಕೆಟ್ನ ವ್ಯಾಪ್ತಿಯನ್ನು ಒಲಿಂಪಿಕ್ಸ್ ಸಮಿತಿಗೆ ತೋರಿಸಲು ಪ್ರಯತ್ನಿಸಿದೆ. 2016ರ ರಿಯೋ ಒಲಿಂಪಿಕ್ಸ್ ಭಾರತದಲ್ಲಿ 191 ಮಿಲಿಯನ್ ವೀಕ್ಷಕರನ್ನು ಆಕರ್ಷಿಸಿದ್ದರೆ, 2019ರ ಕ್ರಿಕೆಟ್ ವಿಶ್ವಕಪ್ 545 ಮಿಲಿಯನ್ ವೀಕ್ಷಕರನ್ನು ಆಕರ್ಷಿಸಿದೆ.
ಹಾಗಾಗಿ 2028ರ ಒಲಿಂಪಿಕ್ಸ್ನಲ್ಲಿ ಕ್ರಿಕೆಟ್ ಸೇರ್ಪಡೆಯಾಗಿ, ಭಾರತೀಯ ಕ್ರಿಕೆಟ್ ಮಂಡಳಿ ತನ್ನ ಪುರುಷ ಮತ್ತು ಮಹಿಳಾ ಕ್ರಿಕೆಟ್ ತಂಡವನ್ನು ಕಳುಹಿಸಲು ಒಪ್ಪಿಗೆ ಸೂಚಿಸಿದರೆ, ಒಲಿಂಪಿಕ್ಸ್ಗೆ ಅತ್ಯಂತ ಹೆಚ್ಚು ಬೆಂಬಲ ಸಿಗಲಿದೆ ಎಂದು ಐಸಿಸಿ ತಿಳಿಸಿದೆ. ವಿಶ್ವ ಕ್ರಿಕೆಟ್ ಮಂಡಳಿಯ ಈ ಪ್ರಸ್ತಾಪಕ್ಕೆ ಕ್ರಿಕೆಟ್ ದಿಗ್ಗಜರಾದ ಸಚಿನ್ ತೆಂಡೂಲ್ಕರ್, ರಾಹುಲ್ ದ್ರಾವಿಡ್ ಮತ್ತು ರಿಕಿ ಪಾಂಟಿಂಗ್ ಕೂಡ ಬೆಂಬಲ ಸೂಚಿಸಿದ್ದಾರೆ.
