ಲಂಡನ್: ವಿಶ್ವಕಪ್ನ ಲೀಗ್ ಹಂತದ ಕೊನೆಯ ಪಂದ್ಯದಲ್ಲಿ ಬಲಿಷ್ಠ ಆಸ್ಟ್ರೇಲಿಯಾ ತಂಡದ ವಿರುದ್ಧ 10 ರನ್ಗಳಿಂದ ದಕ್ಷಿಣ ಆಫ್ರಿಕಾ ಜಯಿಸಿದೆ. ಈ ಮೂಲಕ ಗೆಲುವಿನೊಂದಿಗೆ ವಿಶ್ವಕಪ್ ಟೂರ್ನಿಯಿಂದ ಹೊರ ನಡೆದಿದೆ.
ಇನ್ನು ಆಸ್ಟ್ರೇಲಿಯಾ ಸೋಲುವ ಮೂಲಕ ಅಂಕ ಪಟ್ಟಿಯಲ್ಲಿ ಎರಡನೇ ಸ್ಥಾನಕ್ಕೆ ಇಳಿದಿದ್ದು, ಭಾರತ ಅಗ್ರ ಸ್ಥಾನಕ್ಕೇರಿದೆ. ಪರಿಣಾಮ ಸೆಮೀಫೈನಲ್ನಲ್ಲಿ ಭಾರತ-ನ್ಯೂಜಿಲೆಂಡ್ ಹಾಗೂ ಆಸ್ಟ್ರೇಲಿಯಾ-ಇಂಗ್ಲೆಂಡ್ ಸೆಣಸಾಡಲಿವೆ.
ಟಾಸ್ ಗೆದ್ದು ಮೊದಲು ಬ್ಯಾಟಿಂಗ್ ಮಾಡಿದ ದಕ್ಷಿಣ ಆಫ್ರಿಕಾ 50 ಒವರ್ಗಳಲ್ಲಿ ಡು ಪ್ಲೆಸಿಸ್ (100 ರನ್, 94 ಎಸೆತ) ಶತಕದ ನೆರವಿನಿಂದ 325 ರನ್ಗಳ ಬೃಹತ್ ಮೊತ್ತವನ್ನು ಪೇರಿಸಿತ್ತು.
ಡುಸೇನ್ (95 ರನ್, 97 ಎಸೆತ), ಕ್ವಿಂಟನ್ ಡೆ ಕಾಕ್ (52 ರನ್, 51 ಎಸೆತ) ಅವರ ಅರ್ಧ ಶತಕದ ನೆರವಿನಿಂದ ಹರಿಣಗಳು ಸವಾಲಿನ ಮೊತ್ತ ಕಲೆ ಹಾಕಿದ್ದರು.
ಬಳಿಕ ಗರಿಷ್ಠ ರನ್ಗಳ ಬೆನ್ನತ್ತಿದ ಆಸ್ಟ್ರೇಲಿಯಾ ಆರಂಭದಲ್ಲಿಯೇ ಆಘಾತ ಅನುಭವಿಸಬೇಕಾಯಿತು. ಸ್ಫೋಟಕ ಆಟಗಾರ ಅರೋನ್ ಫಿಂಚ್ 3 ರನ್ ಗಳಿಸಿ ಪೆವಿಲಿಯನ್ ಹಾದಿ ಹಿಡಿದರು. ಇದರ ಬೆನ್ನಲ್ಲೇ ಉಸ್ಮಾನ್ ಖಾವಾಜ್ (18) ರನ್ ಗಳಿಸಿದ್ದಾಗ ಗಾಯಗದಿಂದ ನಿವೃತ್ತರಾದರು. ಇನ್ನು ಸ್ಟೀವ್ ಸ್ಮಿತ್ 6 ರನ್ ಗಳಿಸಿ ವಿಕೆಟ್ ಒಪ್ಪಿಸಿದರು.
ಇತ್ತ ಡೆವಿಡ್ ವಾರ್ನರ್ (122 ರನ್, 117 ಎಸೆತ) ಕ್ರೀಸ್ನಲ್ಲಿ ನೆಲೆ ನಿಂತು ತಂಡದ ಮೊತ್ತ ಹೆಚ್ಚಿಸುತ್ತಿದ್ದರು. ಇವರ ಜೊತೆ ಅಲೆಕ್ಸ್ ಕ್ಯಾರಿ (85 ರನ್, 69 ಎಸೆತ) ಸಿಡಿಸಿ ತಂಡಕ್ಕೆ ನೆರವಾದರು. ಆದ್ರೂ ಕೂಡ ಗೆಲ್ಲಲು ಸಾಧ್ಯವಾಗದೇ 315 ರನ್ಗಳಿಗೆ ಆಲ್ಔಟ್ ಆಗುವ ಮೂಲಕ 10 ರನ್ಗಳಿಂದ ಸೋಲನುಭವಿಸಿತು.
