ನವದೆಹಲಿ: ಬೆಟ್ಟಿಂಗ್ ಪ್ರಿಯರಿಗೆ ಕ್ರಿಕೆಟ್ ಅಂದ್ರೆ ಅಚ್ಚಮೆಚ್ಚು. ಅದ್ರಲ್ಲೂ ಐಪಿಲ್ ಮತ್ತು ವಿಶ್ವಕಪ್ ಟೂರ್ನಿ ವೇಳೆಯಲ್ಲಿ ಭಾರೀ ಮೊತ್ತದ ಬೆಟ್ಟಿಂಗ್ ನಡೆಯತ್ತೆ. ಸದ್ಯ ನಡೆಯುತ್ತಿರುವ ವಿಶ್ವಕಪ್ ಟೂರ್ನಿಯಲ್ಲಿ ಅಂದಾಜು14 ಲಕ್ಷ ಕೋಟಿ ಬೆಟ್ಟಿಂಗ್ ನಡೆಯಲಿದೆ ಎಂದು ವಿಶ್ವ ಸಟ್ಟಾ ದಂಧೆ ಮಾರುಕಟ್ಟೆ ಅಂದಾಜು ಹಾಕಿದೆ.
ಈ ಬೆಟ್ಟಿಂಗ್ ದಂಧೆ ಭಾರತದಲ್ಲೂ ವ್ಯಾಪಿಸಿದ್ದು, ಭಾರತ ಮತ್ತು ಪಾಕಿಸ್ತಾನದ ನಡುವೆ ನಡೆದ ಪಂದ್ಯದ ವೇಳೆ ರಾಜಧಾನಿ ದೆಹಲಿಯೊಂದರಲ್ಲೇ 100 ಕೋಟಿ ಮೊತ್ತದಷ್ಟು ಬೆಟ್ಟಿಂಗ್ ನಡೆದಿದೆ ಎಂದು ದೆಹಲಿ ಪೊಲೀಸರು ಶಂಕೆ ವ್ಯಕ್ತಪಡಿಸಿದ್ದಾರೆ.
ಮೈದಾನದಿಂದ ಬರುತ್ತೆ ಮಾಹಿತಿ:
ಬೆಟ್ಟಿಂಗ್ ನಡೆಸುವವರ ಪರವಾಗಿ ಕೆಲವರು ಮೈದಾನದಿಂದಲೇ ಮಾಹಿತಿ ನೀಡುತ್ತಿರುತ್ತಾರೆ. ಟಿವಿಯಲ್ಲಿ ಲೈವ್ ಬರೋದಕ್ಕಿಂತ 1 ರಿಂದ 2 ನಿಮಿಷ ಮೊದಲೇ ದಂಧೆಕೋರರಿಗೆ ಮಾಹಿತಿ ಸಿಗುತ್ತಿರುತ್ತದೆ. ಈ ಮಾಹಿತಿ ಮೇರೆಗೆ ಪ್ರತೀ ಬಾಲ್ಗೂ ಬೆಟ್ಟಿಂಗ್ ನಡೆಸುತ್ತಿರುತ್ತಾರೆ.
ಬೆಟ್ಟಿಂಗ್ ದಂಧೆಗೆ ಬಳಕೆಯಾಗುತ್ತೆ ಟಿಲಿಗ್ರಾಂ ಆ್ಯಪ್:
ದಂಧೆಕೋರರು ಟೆಲಿಗ್ರಾಂ ಆ್ಯಪ್ ಬಳಸಿ ಒಂದು ಗ್ರೂಪ್ ಕ್ರಿಯೇಟ್ ಮಾಡುತ್ತಾರೆ. ಈ ಆ್ಯಪ್ನಲ್ಲಿ 2 ಲಕ್ಷದ ವರೆಗೆ ಸದಸ್ಯರನ್ನ ಸೇರಿಸುವ ಅವಕಾಶವಿದೆ. ಹೀಗಾಗಿ ವಾಟ್ಸ್ ಆ್ಯಪ್ ಬದಲಿಗೆ ಟೆಲಿಗ್ರಾಂ ಆ್ಯಪ್ ಬಳಸಿ ಬೆಟ್ಟಿಂಗ್ ದಂಧೆ ನಡೆಸುತ್ತಿದ್ದಾರೆ. ವಾಟ್ಸ್ ಆ್ಯಪ್ನಲ್ಲಿ ಕೇವಲ 256 ಸದಸ್ಯರನ್ನ ಮಾತ್ರ ಗ್ರೂಪ್ಗೆ ಸೇರಿಸ ಬಹುದು. ಆದ್ರೆ ಟೆಲಿಗ್ರಾಂನಲ್ಲಿ ಇಂತಹ ಅಡೆತಡೆ ಇಲ್ಲ.
ಮ್ಯಾಚ್ ಆರಂಭಕ್ಕೂ ಮುನ್ನ ಕ್ರಿಯೇಟ್ ಆಗುತ್ತೆ ಈ ಗ್ರೂಪ್:
ಪ್ರತೀ ಪಂದ್ಯ ಪ್ರಾರಂಭಕ್ಕೂ ಮೊದಲು ಟೆಲಿಗ್ರಾಂ ಆ್ಯಪ್ನಲ್ಲಿ ಒಂದು ಗ್ರೂಪ್ ಮಾಡಲಾಗುತ್ತದೆ. ಆ ಗ್ರೂಪ್ಗೆ ಬೆಟ್ಟಿಂಗ್ ಆಡುವವರನ್ನ ಸೇರಿಸಿ ಎಷ್ಟೆಷ್ಟು ಬೆಟ್ಟಿಂಗ್ ಕಟ್ಟಲಾಗುತ್ತದೆ ಎಂದು ತೀರ್ಮಾನ ಮಾಡಲಾಗುತ್ತದೆ. ಪ್ರತಿಯೊಂದು ಗ್ರೂಪ್ನಲ್ಲಿ 2 ಸಾವಿವ ಮಂದಿ ಸದಸ್ಯರಿರುತ್ತಾರೆ.
