ಮ್ಯಾಂಚೆಸ್ಟರ್: ಐಪಿಎಲ್ನಲ್ಲಿ ಬೌಂಡರಿ, ಸಿಕ್ಸರ್ಗಳ ಸುರಿಮಳೆ ಸುರಿಸಿದ್ದ ಆ್ಯಂಡ್ರೆ ರಸೆಲ್ ತಮ್ಮ ಬಿರುಸಿನ ಆಟವನ್ನು ವಿಶ್ವಕಪ್ನಲ್ಲೂ ಮುಂದುವರಿಸುತ್ತಾರೆಂಬ ಮುನ್ಸೂಚನೆ ನೀಡಿದ್ದರು. ಆದರೆ, ಆ ಗೇಮ್ ಸದ್ಯ ಅವರಿಂದ ಮೂಡಿ ಬರುತ್ತಿಲ್ಲ. ಈ ಮಧ್ಯೆ ಟೀಂ ಇಂಡಿಯಾ ಸ್ಪಿನ್ ಮಾಂತ್ರಿಕ ಯುಜುವೇಂದ್ರ ಚಹಲ್ ಕೂಡ ಇದೇ ವಿಷಯವಾಗಿ ಮಾತನಾಡಿದ್ದಾರೆ.
ವಿಶ್ವಕಪ್ನಲ್ಲಿ ಬರುವ 27ರಂದು(ಗುರುವಾರ) ಭಾರತ-ವೆಸ್ಟ್ ಇಂಡೀಸ್ ತಂಡಗಳು ಮುಖಾಮುಖಿಯಾಗುತ್ತಿವೆ. ಈಗಾಗಲೇ ಸೋಲಿಲ್ಲದ ಸರದಾರನಾಗಿ ಮುನ್ನುಗುತ್ತಿರುವ ಕೊಹ್ಲಿ ಪಡೆ ಮತ್ತೊಂದು ಗೆಲುವಿನ ತವಕದಲ್ಲಿದೆ. ಪಂದ್ಯ ಆರಂಭಗೊಳ್ಳುವುದಕ್ಕೆ ಇನ್ನೂ ಮೂರು ದಿನಗಳ ಬಾಕಿ ಇರುವಾಗಲೇ ಯುಜುವೇಂದ್ರ ಚಹಲ್, ಎದುರಾಳಿ ತಂಡದ ಆಟಗಾರ ಆಂಡ್ರೆ ರಸೆಲ್ಗೆ ಟಾಂಗ್ ನೀಡಿದ್ದು, ಅಬ್ಬರಿಸಲು ಇದು ಐಪಿಎಲ್ ಅಲ್ಲ. ಅವರ ಮೇಲೆ ಸದ್ಯ ತುಂಬಾ ಒತ್ತಡವಿದೆ. ಹೀಗಾಗಿ ಅವರ ವಿಕೆಟ್ ಪಡೆದುಕೊಳ್ಳುವುದು ಹೇಗೆ ಎಂಬುದು ನನಗೆ ಗೊತ್ತಿದೆ ಎಂದಿದ್ದಾರೆ.
ಐಪಿಎಲ್ನಲ್ಲಿ ಆಡುವುದು ಹಾಗೂ ವಿಶ್ವಕಪ್ನಲ್ಲಿ ಆಡುವುದು ತುಂಬಾ ವ್ಯತ್ಯಾಸವಿರುತ್ತದೆ. ಈಗಾಗಲೇ ಅನೇಕ ಪಂದ್ಯಗಳಲ್ಲಿ ಸೋಲು ಕಂಡಿರುವ ವೆಸ್ಟ್ ಇಂಡೀಸ್ ಗೆಲುವಿನ ಟ್ರ್ಯಾಕ್ಗೆ ಮರಳುವುದು ಅಷ್ಟೊಂದು ಸುಲಭವಲ್ಲ. ಜತೆಗೆ ರಸೆಲ್ ಬ್ಯಾಟಿಂಗ್ ಫಾರ್ಮ್ನಲ್ಲಿ ಇಲ್ಲ ಎಂದು ತಿಳಿಸಿದ್ದಾರೆ.
ಪ್ರಸಕ್ತ ವರ್ಷದ ಇಂಡಿಯನ್ ಪ್ರೀಮಿಯರ್ ಲೀಗ್ನಲ್ಲಿ ಮಿಂಚಿದ್ದ ರಸೆಲ್ ಕೇವಲ 14 ಪಂದ್ಯಗಳಿಂದ ಬರೋಬ್ಬರಿ 510ರನ್ ಸಿಡಿಸಿದ್ದರು. ವಿಶೇಷವಾಗಿ 52 ಸಿಕ್ಸರ್ ಹಾಗೂ 31 ಬೌಂಡರಿ ಬಾರಿಸಿದ್ದರು.
