ಮುಂಬೈ: 13ನೇ ಆವೃತ್ತಿಯ ಟೈಟಲ್ ಸ್ಪಾನ್ಸರ್ಶಿಪ್ನಿಂದ ವಿವೋ ಹೊರ ಹೋಗಿರುವುದು ಬಿಸಿಸಿಐಗೆ ಸಣ್ಣ ಹಿನ್ನಡೆಯೇ ಹೊರತು, ಅದರಿಂದ ದೊಡ್ಡ ಆರ್ಥಿಕ ಬಿಕ್ಕಟ್ಟು ಉಂಟಾಗುವುದಿಲ್ಲ ಎಂದು ಬಿಸಿಸಿಐ ಅಧ್ಯಕ್ಷ ಸೌರವ್ ಗಂಗೂಲಿ ಹೇಳಿದ್ದಾರೆ.
'ನಾನಿದನ್ನು ಆರ್ಥಿಕ ಬಿಕ್ಕಟ್ಟು ಎಂದು ಕರೆಯುವುದಿಲ್ಲ' ಎಂದಿರುವ ಗಂಗೂಲಿ, 'ಇದೊಂದು ಸಣ್ಣ ಹಿನ್ನಡೆಯಷ್ಟೇ. ಈ ಸಂದರ್ಭವನ್ನು ವೃತ್ತಿಪರವಾಗಿ ನಿಭಾಯಿಸುವಷ್ಟು ತಾಕತ್ತು ಬಿಸಿಸಿಐಗಿದೆ' ಎಂದಿದ್ದಾರೆ.
'ಯಾವುದೂ ಕೂಡಾ ರಾತ್ರಿ ಕಳೆದು ಬೆಳಗಾಗುವುದರೊಳಗೆ ಆಗುವುದಿಲ್ಲ. ದೀರ್ಘಕಾಲದ ಸಿದ್ಧತೆಯಿದ್ದಾಗ ಮಧ್ಯದಲ್ಲಿ ನೀವು ಕೆಲವನ್ನು ಕಳೆದುಕೊಳ್ಳಲು ಮತ್ತು ಅದೇ ರೀತಿ ಯಶಸ್ವಿಯಾಗಲು ಸಿದ್ದರಿರಬೇಕು' ಎಂದು ಹೇಳಿದ್ದಾರೆ.
ನಮ್ಮ ಬಳಿ ಪ್ರತೀ ಸಮಸ್ಯೆಗಳಿಗೂ ಪ್ಲಾನ್ ಎ ಮತ್ತು ಪ್ಲಾನ್ ಬಿ ರೀತಿಯ ಯೋಜನೆಗಳಿರುತ್ತವೆ. ಇದಕ್ಕೆ ಸಂವೇದನಾಶೀಲ ಜನ, ಸಂವೇದನಾಶೀಲ ಬ್ರ್ಯಾಂಡ್‌ಗಳು ಮತ್ತು ಸಂವೇದನಾಶೀಲ ಕಾರ್ಪೊರೇಟ್‌ಗಳು ನಮ್ಮ ಜೊತೆ ಕೈ ಜೋಡಿಸುತ್ತಾರೆ. ಬಿಸಿಸಿಐ ಒಂದು ಬಲಿಷ್ಠವಾದ ಸಂಸ್ಥೆ. ಆಟಗಾರರು, ಆಡಳಿತ ತಜ್ಞರು ಈ ಸಂಸ್ಥೆಯನ್ನು ಬಲಿಷ್ಠವನ್ನಾಗಿಸಿದ್ದಾರೆ. ಇಂತಹ ಹಲವು ಹಿನ್ನಡೆಗಳನ್ನು ಬಿಸಿಸಿಐ ತಡೆದುಕೊಳ್ಳಲಿದೆ ಎಂದು ಗಂಗೂಲಿ ಹೇಳುತ್ತಾರೆ.
ಲಡಾಕ್ ಗಡಿಯಲ್ಲಿ ಚೀನಾ ಸೈನಿಕರ ಆಕ್ರಮಣದ ನಂತರ ಚೀನಾ ವಸ್ತುಗಳನ್ನು ದೇಶದಲ್ಲಿ ಬಹಿಷ್ಕರಿಸಲು ಕರೆ ನೀಡಲಾಗಿದೆ. ಆದರೆ ಬಿಸಿಸಿಐ ಚೀನಾ ಮೂಲದ ವಿವೋ ಕಂಪನಿಯ ಪ್ರಾಯೋಜಕತ್ವವನ್ನು ಮುಂದುವರಿಸುತ್ತಿರುವುದಾಗಿ ಘೋಷಿಸಿತ್ತು. ಆದರೆ ಈ ನಿರ್ಧಾರದಿಂದ ಐಪಿಎಲ್ ವಿರುದ್ಧವೇ ಅಭಿಮಾನಿಗಳು ತಿರುಗಿ ಬಿದ್ದಿದ್ದರಿಂದ ಸ್ವತಃ ವಿವೋ 2021ರ ತನ್ನ ಪ್ರಾಯೋಜಕತ್ವನ್ನು ಹಿಂತೆಗೆದುಕೊಳ್ಳಲು ನಿರ್ಧರಿಸಿತ್ತು.
