ಸಿಡ್ನಿ(ಆಸ್ಟ್ರೇಲಿಯಾ): ಆಸ್ಟ್ರೇಲಿಯಾ ವಿರುದ್ಧದ ಟೆಸ್ಟ್ ಸರಣಿಯನ್ನು 3-0 ಪಾಯಿಂಟುಗಳ ಅಂತರದಿಂದ ಕಳೆದುಕೊಂಡರೂ ನ್ಯೂಜಿಲ್ಯಾಂಡ್ ಪರ ಅತಿ ಹೆಚ್ಚು ರನ್ ಗಳಿಸಿದ ರಾಸ್ ಟೇಲರ್, ತಾವೊಬ್ಬ ಸಂಪೂರ್ಣ ಟೆಸ್ಟ್ ಆಟಗಾರ ಅನ್ನೋದು ತಮಗಿನ್ನೂ ಖಚಿತವಾಗಿಲ್ಲ ಎಂದು ಹೇಳಿಕೊಂಡಿದ್ದಾರೆ.
ಆಸ್ಟ್ರೇಲಿಯಾ ವಿರುದ್ಧದ ಟೆಸ್ಟ್ ಸರಣಿಯನ್ನು 3-0 ಅಂತರದಲ್ಲಿ ನ್ಯೂಜಿಲೆಂಡ್ ಸೋತಿತ್ತು. ಆದರೆ ಟೇಲರ್, ವ್ಯಾಗ್ನರ್ ಬಿಟ್ಟರೆ ಉಳಿದ ಆಟಗಾರರು ಇಲ್ಲಿ ಹೇಳಿಕೊಳ್ಳುವಂತಹ ಪ್ರದರ್ಶನ ನೀಡಲಿಲ್ಲ. ಇದರಿಂದ ಕ್ಲೀನ್ಸ್ವೀಪ್ ಅಪಮಾನಕ್ಕೆ ಕಿವೀಸ್ ತುತ್ತಾಗಿತ್ತು. ಆದ್ರೆ, ರಾಸ್ ಟೇಲರ್ ಕಿವೀಸ್ ದಿಗ್ಗಜ ಸ್ಟೀಫನ್ ಫ್ಲೆಮಿಂಗ್ ಅವರನ್ನು ಹಿಂದಿಕ್ಕಿ ಹೆಚ್ಚು ರನ್ ಸಿಡಿಸಿದ ನ್ಯೂಜಿಲ್ಯಾಂಡ್ ಬ್ಯಾಟ್ಸ್ಮನ್ ಎಂಬ ದಾಖಲೆ ಬರೆದಿದ್ದರು. ಈ ಸಂದರ್ಭದಲ್ಲಿ ಅವರು ನಾನು ದೇಶದ ಪರ ಒಂದು ಟೆಸ್ಟ್ ಆಡಿದರೆ ಸಾಕು ಎಂದುಕೊಂಡಿದ್ದೆ ಎಂದು ಹೇಳಿರುವ ಅವರು, ತಮ್ಮ ಕೋಚ್ ತನ್ನನ್ನು ಗರಿಷ್ಠ ಸ್ಕೋರರ್ ಆಗಿ ನೋಡಲು ಬಯಸಿದ್ದರು ಎಂಬುದನ್ನು ನೆನೆಪು ಮಾಡಿಕೊಂಡರು.
"ನನ್ನನ್ನು ಒಂದು ವಿಚಾರ ಭಾವುಕನನ್ನಾಗಿಸುತ್ತಿದೆ. ಕಾರಣ ನನ್ನ ಕೋಚ್ ಮಾರ್ಟಿನ್ ಕ್ರೋವ್. ದೇಶದ ಪರ ಒಂದು ಟೆಸ್ಟ್ ಆಡಬೇಕೆಂಬುದುಕೊಂಡಿದ್ದೆ, ಆದರೆ ನನ್ನ ಕೋಚ್ ನಾನು ನ್ಯೂಜಿಲ್ಯಾಂಡ್ ತಂಡದ ಗರಿಷ್ಠ ಸ್ಕೋರರ್ ಆಗುತ್ತೇನೆಂದು ಬಯಸಿದ್ದರು. ಆದರೆ ನನಗೆ ನಂಬಿಕೆ ಇರಲಿಲ್ಲ. ಇದೀಗ ಅವರ ಆಸೆ ನೆರವೇರಿದೆ, ನಾನು ಅವರನ್ನು ತುಂಬಾ ಪ್ರೀತಿಸುತ್ತೇನೆ. ಅವರಿಂದಲೇ ಇಂದು ನಾನು ಈ ಸಾಧನೆ ಮಾಡಿದ್ದೇನೆ" ಎಂದು ತಮ್ಮ ಗುರುವನ್ನು ನೆನೆದ ಟೇಲರ್ ಸುದ್ದಿಗೋಷ್ಟಿಯಲ್ಲಿ ಕಣ್ಣೀರಿಟ್ಟರು.
"ನಾನು ನ್ಯೂಜಿಲ್ಯಾಂಡ್ ಪರ ಮೊದಲು ಆಡಿದ ಸಂದರ್ಭದಲ್ಲಿ ಏಕದಿನ ಕ್ರಿಕೆಟ್ನಲ್ಲಿ ಉತ್ತಮ ಪ್ರದರ್ಶನ ತೋರುತ್ತಿದ್ದೆ. ಟಿ20 ಫಾರ್ಮೆಟ್ ಆಗಷ್ಟೇ ಬಂದಿತ್ತು. ಅಲ್ಲಿಯವರೆಗೆ ನಾನು ಪ್ರಥಮ ದರ್ಜೆ ಕ್ರಿಕೆಟ್ನಲ್ಲಿ 3 ಅಥವಾ 4 ಶತಕ ಸಿಡಿಸಿದ್ದೆ. ನಾನು ಏಕದಿನ ಕ್ರಿಕೆಟ್ ಆಡುವುದಕ್ಕೆ ಮಾತ್ರ ಉತ್ತಮ. ಟೆಸ್ಟ್ ಆಟದಲ್ಲಿ ನಾನೊಬ್ಬ ಉತ್ತಮ ಆಟಗಾರ ಎಂದು ಖಚಿತವಾಗಿ ಹೇಳಕ್ಕಾಗುವುದಿಲ್ಲ"ಅನ್ನೋದು ಕಿವೀಸ್ ಹಿರಿಯ ಆಟಗಾರನ ಅಭಿಪ್ರಾಯ.
ಕಳೆದ ಆಸ್ಟ್ರೇಲಿಯಾ ಪ್ರವಾಸದಲ್ಲಿ ಫ್ಲೆಮಿಂಗ್ (7,172) ಹಿಂದಿಕ್ಕಿದ ಟೇಲರ್ (7,174) ಕಿವೀಸ್ ಪರ ಅತಿ ಹೆಚ್ಚು ರನ್ ಸಿಡಿಸಿದ ಬ್ಯಾಟ್ಸ್ಮನ್ ಎನಿಸಿಕೊಂಡಿದ್ದರು. ಈಗಾಗಲೇ 99 ಟೆಸ್ಟ್ ಪಂದ್ಯಗಳನ್ನಾಡಿರುವ ಅವರು 100ನೇ ಪಂದ್ಯವನ್ನು ಭಾರತದೆದುರು ಆಡಲಿದ್ದಾರೆ.