ನವದೆಹಲಿ: ದಕ್ಷಿಣ ಆಫ್ರಿಕಾದ 3 ಟಿಸಿ ಕಪ್ನಲ್ಲಿ ಮನೆಯಿಂದಲೇ ಕಾಮೆಂಟರಿ ಟೆಸ್ಟ್ ಯಶಸ್ವಿಯಾಗಿದ್ದು, 2020 ಐಪಿಎಲ್ನಲ್ಲೂ ಈ ಹೊಸ ಮಾದರಿಯನ್ನು ಪರಿಚಯಿಸಲು ಅಧಿಕೃತ ಪ್ರಸಾರಕರು ಆಲೋಚಿಸುತ್ತಿದ್ದಾರೆ ಎಂದು ತಿಳಿದು ಬಂದಿದೆ.
ಐಸಿಸಿ 2020ರ ಟಿ-20 ವಿಶ್ವಕಪ್ ಮುಂದೂಡುವ ನಿರ್ಧಾರವನ್ನು ಪ್ರಕಟಿಸಿದಂತೆಯೇ ಬಿಸಿಸಿಐ 13ನೇ ಐಪಿಎಲ್ ಚಟುವಟಿಕೆಗಳನ್ನು ಚುರುಕುಗೊಳಿಸಿದೆ. ಇನ್ನು ಐಪಿಎಲ್ ಪ್ರಸಾರಕರಾಗಿರುವ ಸ್ಟಾರ್ ಇಂಡಿಯಾ ಕೂಡ ಈ ಶ್ರೀಮಂತ ಟೂರ್ನಿಗೆ ಸಿದ್ದವಾಗುತ್ತಿದೆ. ಜೊತೆಗೆ ಈ ಬಾರಿಯ ನೇರ ಪ್ರಸಾರದಲ್ಲಿ ವರ್ಕ್ ಫ್ರಮ್ ಹೋಮ್ ಅಳವಡಿಸಿಕೊಳ್ಳುವ ಸಾಧ್ಯತೆ ಇದೆ ಎನ್ನಲಾಗುತ್ತಿದೆ. ಈಗಾಗಲೆ ಇದು ದಕ್ಷಿಣ ಆಫ್ರಿಕಾದ 3 ಟಿಸಿ ಕಪ್ನಲ್ಲಿ ಯಶಸ್ವಿಯಾಗಿದೆ.
ದಕ್ಷಿಣ ಆಫ್ರಿಕಾದ ಸೆಂಚುರಿಯನ್ನಲ್ಲಿ ಪಂದ್ಯ ನಡೆಯುತ್ತಿದ್ದರೆ, ಇರ್ಫಾನ್ ಪಠಾಣ್ ತಮ್ಮ ಬರೋಡಾದ ಮನೆಯಿಂದ, ದೀಪ್ದಾಸ್ ಗುಪ್ತಾ ಕೋಲ್ಕತ್ತಾದಿಂದ ಹಾಗೂ ಸಂಜಯ್ ಮಂಜ್ರೇಕರ್ ಮುಂಬೈನ ತಮ್ಮ ಮನೆಯಿಂದ ಕಾಮೆಂಟರಿ ಮಾಡಿದ್ದರು.
ಸಾವಿರಾರು ಕಿಮೀ ದೂರದಲ್ಲಿ ನಡೆಯುವ ಪಂದ್ಯಕ್ಕೆ ಮನೆಯಿಂದ ಕಾಮೆಂಟರಿ ಮಾಡಲು ಸಾಧ್ಯವಾಗಿದ್ದಕ್ಕೆ ಭಾರತದ ಮಾಜಿ ಆಲ್ರೌಂಡರ್ ಇದು ಮ್ಯಾಜಿಕಲ್ ಎಂದು ಕರೆದಿದ್ದರು.
ಈ ಪ್ರಯೋಗ ಕೆಲ ಸಣ್ಣಪುಟ್ಟ ಲೋಪದೋಷಗಳಿಂದ ಕೂಡಿದ್ದರೂ ಕೂಡ ಯಶಸ್ವಿಯಾಗಿತ್ತು. ಹೀಗಾಗಿ ಮುಂದಿನ ಐಪಿಎಲ್ನಲ್ಲಿ ಸಾಮಾನ್ಯ ಅಂಶವಾಗಿ ಅಳವಡಿಸಿಕೊಳ್ಳುವ ಚಿಂತನೆಯನ್ನು ಸ್ಟಾರ್ ಸ್ಪೋರ್ಟ್ಸ್ ನಡೆಸುತ್ತಿದೆ. ಹಿಂದಿ ಹಾಗೂ ಇಂಗ್ಲಿಷ್ ಸಾಧ್ಯವಾಗದಿದ್ದರೂ ಸ್ಥಳೀಯ ಭಾಷೆಗಳಾದ ಕನ್ನಡ, ತಮಿಳು ಹಾಗೂ ತೆಲುಗು ಭಾಷೆಗಳ ಕಾಮೆಂಟರಿಯನ್ನು ಮನೆಯಲ್ಲಿ ನಡೆಸಲು ಸ್ಟಾರ್ ಇಂಡಿಯಾ ಸಿದ್ದತೆ ನಡೆಸಿದೆ ಎನ್ನಲಾಗುತ್ತಿದೆ.
