ಇಂದೋರ್: ಪ್ರವಾಸಿ ಬಾಂಗ್ಲಾ ವಿರುದ್ಧ ನಡೆಯುತ್ತಿರುವ ಮೊದಲ ಟೆಸ್ಟ್ ಪಂದ್ಯದಲ್ಲಿ ಎದುರಾಳಿ ತಂಡದ ಮೇಲೆ ಕೊಹ್ಲಿ ಪಡೆ ಗದಾ ಪ್ರಹಾರ ನಡೆಸಿದ್ದು, 2ನೇ ದಿನದಂತ್ಯಕ್ಕೆ 6 ವಿಕೆಟ್ ನಷ್ಟಕ್ಕೆ 493 ರನ್ ಗಳಿಕೆ ಮಾಡಿರುವ ತಂಡ 343 ರನ್ಗಳ ಮುನ್ನಡೆ ಪಡೆದುಕೊಂಡಿದೆ.
12 ರನ್ಗಳಿಸಿದ್ದ ವೃದ್ಧಿಮಾನ್ ಸಹಾ ವಿಕೆಟ್ ಬೀಳುತ್ತಿದ್ದಂತೆ ಮೈದಾನಕ್ಕಿಳಿದ ಉಮೇಶ್ ಯಾದವ್ ಮತ್ತೊಮ್ಮೆ ತಮ್ಮ ಬ್ಯಾಟಿಂಗ್ ಅಬ್ಬರ ತೋರಿಸಿದ್ದು, ತಾವು ಎದುರಿಸಿರುವ 10 ಎಸೆತಗಳಲ್ಲಿ 3 ಸಿಕ್ಸರ್, ಒಂದು ಬೌಂಡರಿ ಸೇರಿ ಬರೋಬ್ಬರಿ 25ರನ್ ಕಲೆ ಹಾಕಿ ಅಜೇಯರಾಗಿ ಉಳಿದರು.
ಈ ಹಿಂದೆ ದಕ್ಷಿಣ ಆಫ್ರಿಕಾ ತಂಡದ ವಿರುದ್ಧ ನಡೆದ ಫೈನಲ್ ಟೆಸ್ಟ್ ಪಂದ್ಯದಲ್ಲಿ 9ನೇ ಕ್ರಮಾಂಕದಲ್ಲಿ ಬ್ಯಾಟ್ ಬೀಸಲು ಮೈದಾನಕ್ಕಿಳಿದ ಉಮೇಶ್ ಯಾದವ್ ತಾವು ಎದುರಿಸಿದ್ದ 10 ಎಸೆತಗಳಲ್ಲಿ ಬರೋಬ್ಬರಿ 31ರನ್ ಗಳಿಸಿದ್ದರು. ಜತೆಗೆ ಐದು ಸಿಕ್ಸರ್ ಸಿಡಿಸಿದ್ದರು.
ಇಂದಿನ ಪಂದ್ಯದಲ್ಲೂ 10 ಎಸೆತಗಳಲ್ಲಿ 25 ರನ್ಗಳಿಸಿದ ಯಾದವ್ 3 ಸಿಕ್ಸರ್ ಸಿಡಿಸಿ ಕ್ರಿಕೆಟ್ ಪ್ರೇಮಿಗಳನ್ನು ರಂಜಿಸಿದ್ದಾರೆ. ಉಮೇಶ್ ಯಾದವ್ ತಾವು ಎದುರಿಸಿರುವ ಕೊನೆಯ 17 ಎಸೆತಗಳಲ್ಲಿ 6.6.0.1.6.0.6.0.6.0.0.6.2.0.4,6,6 = 55 ರನ್ಗಳಿಸಿದ್ದಾರೆ.
