ಮುಂಬೈ: ಕ್ರಿಕೆಟ್ ಲೀಗ್ಗಳಲ್ಲಿ ಅತ್ಯಂತ ಜನಪ್ರಿಯ ಹಾಗೂ ಶ್ರೀಮಂತ ಲೀಗ್ ಆಗಿರುವ ಐಪಿಎಲ್ ಕಳೆದ 12 ವರ್ಷಗಳಲ್ಲಿ ಹಲವಾರು ರೋಚಕ ಪಂದ್ಯಗಳಿಗೆ ಸಾಕ್ಷಿಯಾಗಿದೆ. ಇದರಲ್ಲಿ ಕೆಲವು ಸೂಪರ್ ಓವರ್ಗಳು ಕೂಡ ಸೇರಿವೆ.
2008ರಲ್ಲಿ ಶುರುವಾದ ಇಂಡಿಯನ್ ಪ್ರೀಮಿಯರ್ ಲೀಗ್ ನೂರಾರು ಹೊಸ ಕ್ರಿಕೆಟಿಗರ ಪ್ರತಿಭೆಯ ಅನಾವರಣಕ್ಕೆ ಒಂದು ಅದ್ಭುತ ವೇದಿಕೆಯಾಗಿತ್ತು. ಇಲ್ಲಿ ಆಡಿದವರು ಬಹುಬೇಗನೆ ಸೀನಿಯರ್ ತಂಡಕ್ಕೆ ಸೇರ್ಪಡೆಯಾಗಿ ಇಂದಿಗೂ ಕೆಲವು ಆಟಗಾರರು ಅಂತಾರಾಷ್ಟ್ರೀಯ ಕ್ರಿಕೆಟ್ನಲ್ಲಿ ಮಿಂಚುತ್ತಿದ್ದಾರೆ. ಇನ್ನು ಕೆಲವು ಸೀನಿಯರ್ ಆಟಗಾರರು ತಂಡಕ್ಕೆ ವಾಪಸ್ ಆಗಲು ಕೂಡ ನೆರವಾಗಿದೆ.
ಐಪಿಎಲ್ನಲ್ಲಿ ಬೌಂಡರಿ, ಸಿಕ್ಸರ್ಗಳ ಜೊತೆಗೆ ಸೂಪರ್ ಓವರ್ ಪಂದ್ಯಗಳ ವೀಕ್ಷಣೆ ಕ್ರಿಕೆಟ್ ಪ್ರಿಯರಿಗೆ ರೋಮಾಂಚನಕಾರಿ ಅನುಭವ. ಮಿಲಿಯನ್ ಡಾಲರ್ ಲೀಗ್ನಲ್ಲಿ ಮಜಲ್ ಪವರ್, ವೇಗಿಗಳ ಯಾರ್ಕರ್, ಚಾಣಾಕ್ಷ ಫೀಲ್ಡಿಂಗ್ ನೋಡಲು ಅಭಿಮಾನಿಗಳು ಕೂಡ ಕುತೂಹಲದಿಂದ ಕಾಯುತ್ತಿರುತ್ತಾರೆ.
ಕಳೆದ 12 ಸೀಸನ್ಗಳಲ್ಲಿ ಅತ್ಯಂತ ರೋಚಕವಾಗಿದ್ದ 5 ಸೂಪರ್ ಓವರ್ಗಳು ಇಲ್ಲಿವೆ:
ಡೆಲ್ಲಿ ಕ್ಯಾಪಿಟಲ್ vs ಕೋಲ್ಕತ್ತಾ ನೈಟ್ ರೈಡರ್ಸ್- 2019
ಕಳೆದ ವರ್ಷ ನಡೆದ ಐಪಿಎಲ್ ಸೀಸನ್ನಲ್ಲಿ ಕೋಲ್ಕತ್ತಾ ಮತ್ತು ಡೆಲ್ಲಿ ನಡುವೆ ನಡೆದಿದ್ದ ಸೂಪರ್ ಓವರ್ ಪಂದ್ಯ ಅತ್ಯಂತ ಹೆಚ್ಚು ರೋಚಕತೆಯಿಂದ ಕೂಡಿತ್ತು. ಮೊದಲು ಬ್ಯಾಟಿಂಗ್ ನಡೆಸಿದ್ದ ಕೆಕೆಆರ್ ರಸೆಲ್ (62) ಸ್ಫೋಟಕ ಬ್ಯಾಟಿಂಗ್ನಿಂದ 185 ರನ್ ಗಳಿಸಿತ್ತು. ಇತ್ತ ಡೆಲ್ಲಿ ತಂಡದ ಪ್ರಥ್ವಿ ಶಾ ಅವರ 99 ರನ್ಗಳ ಹೊರೆತಾಗಿಯೂ ತಂಡ ಡೆತ್ ಓವರ್ನಲ್ಲಿ ರನ್ಗಳಿಸಿ ಪರದಾಡಿ ಸೂಪರ್ ಓವರ್ಗೆ ಹೋಗುವಂತೆ ಮಾಡಿತ್ತು.
ಪ್ರಸಿದ್ ಕೃಷ್ಣ ಎಸೆದ ಸೂಪರ್ ಓವರ್ನಲ್ಲಿ ಶ್ರೇಯಸ್ ಅಯ್ಯರ್ ವಿಕೆಟ್ ಪಡೆದುಕೊಂಡು 10 ರನ್ ಬಿಟ್ಟುಕೊಟ್ಟರು. 11 ರನ್ಗಳ ಗುರಿ ಪಡೆದ ಕೆಕೆಆರ್ ರಬಾಡ ಅವರ ಬೌಲಿಂಗ್ನಲ್ಲಿ 7 ರನ್ ಗಳಿಸಲಷ್ಟೇ ಶಕ್ತವಾಗಿ 3 ರನ್ಗಳ ಸೋಲನುಭವಿಸಿತು. ರಬಾಡ ಎಸೆದ ಈ ಓವರ್ ಐಪಿಎಲ್ ಅತ್ಯುತ್ತಮ ಓವರ್ ಎಂಬ ಹೆಗ್ಗಳಿಕೆಗೆ ಪಾತ್ರವಾಯಿತು.
ಮುಂಬೈ ಇಂಡಿಯನ್ಸ್ vs ಸನ್ರೈರ್ಸ್ ಹೈದರಾಬಾದ್:
2019ರಲ್ಲಿ ನಡೆದ ಒಂದು ರೋಚಕ ಸೂಪರ್ ಓವರ್ನಲ್ಲಿ ಇದು ಒಂದು. ಮೊದಲು ಬ್ಯಾಟಿಂಗ್ ನಡೆಸಿದ್ದ ಮುಂಬೈ ಇಂಡಿಯನ್ಸ್ ಡಿಕಾಕ್ ಅವರ 69 ರನ್ಗಳ ನೆರವಿನಿಂದ 162 ರನ್ ಗಳಿಸಿದ್ದರು. ಈ ಮೊತ್ತವನ್ನು ಬೆನ್ನತ್ತಿದ ಕನ್ನಡಿಗ ಮನೀಶ್ ಪಾಂಡೆ ಅವರ ಅಜೇಯ 71 ರನ್ಗಳ ನೆರವಿನಿಂದ 162 ರನ್ಗಳಿಸಿ ಫಲಿತಾಂಶಕ್ಕೆ ಸೂಪರ್ ಓವರ್ ಮೊರೆ ಹೋಗುವಂತಾಯಿತು.
ಬುಮ್ರಾ ಎಸೆದ ಮೊದಲ ಎಸೆತದಲ್ಲೇ ಮನೀಶ್ ಪಾಂಡೆ ರನ್ಔಟ್ ಆದರು. ನಂತರ ಬಂದ ಮೊಹಮ್ಮದ್ ನಬಿ ಸಿಕ್ಸ್ ಸಿಡಿಸಿ ಮುಂಬೈಗೆ 9 ರನ್ಗಳ ಟಾರ್ಗೆಟ್ ನೀಡಿದರು. ಇತ್ತ ಕ್ಯಾಪ್ಟನ್ ವಿಲಿಯಮ್ಸನ್ ಸ್ಪಿನ್ನರ್ ರಶೀದ್ ಖಾನ್ಗೆ ಬೌಲಿಂಗ್ ನೀಡಿದರು. ಮುಂಬೈನ ಹಾರ್ದಿಕ್ ಪಾಂಡ್ಯ ಮೊದಲ ಎಸೆತದಲ್ಲಿ ಸಿಕ್ಸರ್ ಸಿಡಿಸಿ ಮುಂಬೈಗೆ ಗೆಲುವು ತಂದುಕೊಟ್ಟರು.
ರಾಜಸ್ಥಾನ ರಾಯಲ್ಸ್ vs ಕಿಂಗ್ಸ್ ಇಲೆವೆನ್ ಪಂಜಾಬ್- 2015:
ರಹಾನೆ (74) ಹಾಗೂ ವಾಟ್ಸನ್ (45) ಅವರ ಅದ್ಭುತ ಬ್ಯಾಟಿಂಗ್ ನೆರವಿನಿಂದ ನೆರವಿನಿಂದ ರಾಜಸ್ಥಾನ್ ರಾಯಲ್ಸ್ ಅವರ 191 ರನ್ ಮೊತ್ತ ಕಲೆ ಹಾಕಿತು. 192 ರನ್ಗಳ ಗುರಿ ಪಡೆದ ಪಂಜಾಬ್ ತಂಡದ ಸೆಹ್ವಾಗ್, ವಿಜಯ್ ಅವರ ಬ್ಯಾಟಿಂಗ್ ವೈಫಲ್ಯದ ಹೊರತಾಗಿಯೂ ಶಾನ್ ಮಾರ್ಶ್ ಅವರ 65 ಹಾಗೂ ಮಿಲ್ಲರ್ ಅವರ 54 ಹಾಗೂ ಅಕ್ಷರ್ ಪಟೇಲ್ ಅವರ ಕೊನೆಯ ಎಸೆತದಲ್ಲಿ ಬೌಂಡರಿ ನೆರವಿನಿಂದ ಪಂದ್ಯ ಟೈ ಆಗುವಂತೆ ಮಾಡಿದರು.
ಕ್ರಿಸ್ ಮೊರೀಸ್ ಎಸೆದ ಮೊದಲ ಎಸೆತದಲ್ಲಿ ಮಿಲ್ಲರ್ ಔಟ್ ಆದರು. ಆದರೆ ಮಾರ್ಶ್ ಸತತ 3 ಬೌಂಡರಿ ಬಾರಿಸಿ 15 ರನ್ ಸೇರಿಸಿದರು. 16 ರನ್ ಬೆನ್ನತ್ತಿದ ರಾಯಲ್ಸ್ ಕೂಡ ಮಿಚೆಲ್ ಜಾನ್ಸನ್ರನ ಮೊದಲ ಎಸೆತದಲ್ಲೇ ಸ್ಫೋಟಕ ಬ್ಯಾಟ್ಸ್ಮನ್ ವಾಟ್ಸನ್ ಅವರ ವಿಕೆಟ್ ಕಳೆದುಕೊಂಡಿತು. ನಂತರದ ಎಸೆತ ಚೆಂಡು ಬೌಂಡರಿ ಗೆರೆ ದಾಟಿದರೂ ಮೂರನೇ ಎಸೆತದಲ್ಲಿ ಜೇಮ್ಸ್ ಫಾಕ್ನರ್ ರನ್ಔಟಾಗುವುದರೊಂದಿಗೆ 9 ರನ್ಗಳ ಸೋಲನುಭವಿಸಿತು.
ಕೋಲ್ಕತ್ತಾ ನೈಟ್ ರೈಡರ್ಸ್ vs ರಾಜಸ್ಥಾನ್ ರಾಯಲ್ಸ್- 2014:
ಈ ಪಂದ್ಯದಲ್ಲಿ ಮೊದಲು ಬ್ಯಾಟಿಂಗ್ ನಡೆಸಿದ್ದ ರಾಜಸ್ಥಾನ್ ರಾಯಲ್ಸ್ ರಹಾನೆಯ 72 ರನ್ಗಳ ನೆರವಿನಿಂದ 152 ರನ್ಗಳ ಸ್ಪರ್ಧಾತ್ಮಕ ಮೊತ್ತ ದಾಖಲಿಸಿತ್ತು. ಕೆಕೆಆರ್ ತಂಡದ ಗೌತಮ್ ಗಂಭೀರ್ ಅವರ 44 ರನ್ ಹಾಗೂ ಶಕೀಬ್ ಅವರ 29 ರನ್ಗಳ ಹೊರತಾಗಿಯೂ ಫಾಕ್ನರ್ ಬೌಲಿಂಗ್ಗೆ ನರಳಾಡಿ ಸುಲಭವಾಗಿ ಗೆಲ್ಲುವ ಪಂದ್ಯ ಟೈನಲ್ಲಿ ಮುಗಿಯಿತು.
ಸೂಪರ್ ಓವರ್ನಲ್ಲಿ ಮನೀಶ್ ಪಾಂಡೆ ಕೊನೆಯ ಎಸೆತದ ಸಿಕ್ಸರ್ ನೆರವಿನಿಂದ ಕೆಕೆಆರ್ ತಂಡಕ್ಕೆ 11 ರನ್ಗಳ ಗುರಿ ನೀಡಿತು. ವಾಟ್ಸನ್ ಹಾಗೂ ಸ್ಟೀವ್ ಸ್ಮಿತ್ ಮೊದಲ ಮೂರು ಎಸೆತಗಳಲ್ಲಿ ಸಿಂಗಲ್ ರನ್ ತಗೆಯಲಷ್ಟೇ ಶಕ್ತರಾದರು. ಆದರೆ ನಾಲ್ಕನೇ ಎಸೆತದಲ್ಲಿ ವಾಟ್ಸನ್ ಸಿಕ್ಸರ್ ಸಿಡಿಸಿದರು. ಕೊನೆಯ ಎಸೆತದಲ್ಲಿ ಗೆಲುವಿಗೆ 2 ರನ್ ಅಗತ್ಯವಿದ್ದ ಸಂದರ್ಭದಲ್ಲಿ ಆರ್ಆರ್ ಬೌಂಡರಿಯೊಂದಿಗೆ ಪಂದ್ಯವನ್ನು ಗೆದ್ದುಕೊಂಡಿತು.
ರಾಯಲ್ ಚಾಂಲೆಂಜರ್ಸ್ vs ಡೆಲ್ಲಿ ಡೇರ್ಡೇವಿಲ್ಸ್- 2013:
2013ರ ಆವೃತ್ತಿಯ 21ನೇ ಪಂದ್ಯದಲ್ಲಿ ಮೊದಲು ಬ್ಯಾಟಿಂಗ್ ನಡೆಸಿದ ಡೆಲ್ಲಿ 5 ವಿಕೆಟ್ ಕಳೆದುಕೊಂಡು 152 ರನ್ಗಳಿಸಿತ್ತು. ಸೆಹ್ವಾಗ್ 25, ಜಯವರ್ದನೆ 28, ಕೇದರ್ ಜಾಧವ್ 29 ರನ್ ಗಳಿಸಿದ್ದರು. ಸುಲಭ ಗುರಿ ಬೆನ್ನತ್ತಿದ ಆರ್ಸಿಬಿ ಕೊಹ್ಲಿಯವರ 65 ರನ್, ಹಾಗೂ ವಿಲಿಯರ್ಸ್ ಅವರ 39 ರನ್ಗಳ ಹೊರತಾಗಿಯೂ 7 ವಿಕೆಟ್ ಕಳೆದುಕೊಂಡು 152 ರನ್ಗಳಿಸಿತು.
ಉಮೇಶ್ ಯಾದವ್ ಎಸೆದ ಸೂಪರ್ ಓವರ್ನಲ್ಲಿ ಆರ್ಸಿಬಿ ವಿಲಿಯರ್ಸ್ ಅವರ ಭರ್ಜರಿ 2 ಸಿಕ್ಸರ್ ಸಹಿತ 15 ರನ್ಗಳಿಸಿತು. ರವಿ ರಾಂಪಲ್ ಎಸೆದ ಸೂಪರ್ ಓವರ್ನ ಮೊದಲ ಎಸೆತದಲ್ಲಿ ಡೇವಿಡ್ ವಾರ್ನರ್ ವಿಕೆಟ್ ಕಳೆದುಕೊಂಡಿತು. ನಂತರ ಬಂದ ಇರ್ಫಾನ್ ಪಠಾಣ್ ಬ್ಯಾಕ್ ಟು ಬ್ಯಾಕ್ ಬೌಂಡರಿ, ಸಿಕ್ಸರ್ ಸಿಡಿಸಿದರಾದರೂ 11 ರನ್ಗಳಿಸಿ 4 ರನ್ಗಳ ಸೋಲುಕಂಡು ನಿರಾಶೆಯನುಭವಿಸಿತು.
