ಹೈದರಾಬಾದ್: ಕಳೆದೊಂದು ವರ್ಷದಿಂದ ಅಂತಾರಾಷ್ಟ್ರೀಯ ಕ್ರಿಕೆಟ್ನಿಂದ ದೂರವಿರುವ ಭಾರತ ತಂಡದ ಮಾಜಿ ನಾಯಕ ಮಹೇಂದ್ರ ಸಿಂಗ್ ಧೋನಿ ಈ ಬಾರಿಯ ಐಪಿಎಲ್ನಲ್ಲಿ ಅದ್ಭುತ ಪ್ರದರ್ಶನ ತೋರಲಿದ್ದಾರೆ ಎಂದು ಮಾಜಿ ಕ್ರಿಕೆಟಿಗ ಹಾಗೂ ಕಾಮೆಂಟೇಟರ್ ಸಂಜಯ್ ಮಂಜ್ರೇಕರ್ ವಿಶ್ವಾಸ ವ್ಯಕ್ತಪಡಿಸಿದರು.
2020ರ ಐಪಿಎಲ್ನಲ್ಲಿ ಧೋನಿ ಉತ್ತಮವಾಗಿ ಆಡಲಿದ್ದಾರೆ ಎಂದು ನಾನು ಭಾವಿಸುತ್ತೇನೆ. ಐಪಿಎಲ್ನಲ್ಲಿ ಬ್ಯಾಟ್ಸ್ಮನ್ ಆಗಿ ಧೋನಿ ಅಂತಾರಾಷ್ಟ್ರೀಯ ಕ್ರಿಕೆಟ್ಗಿಂತಲೂ ಹೆಚ್ಚು ಸ್ಥಿರತೆ ಮತ್ತು ಯಶಸ್ವಿ ಬ್ಯಾಟ್ಸ್ಮನ್ ಆಗಿದ್ದಾರೆ. ನಾಲ್ಕೈದು ಬೌಲರ್ಗಳನ್ನು ನಿರ್ವಹಿಸುವುದು ಹೇಗೆ ಅನ್ನೋದು ಅವರಿಗೆ ಗೊತ್ತಿದೆ ಎಂದು ತಿಳಿಸಿದ್ದಾರೆ.
ಸಚಿನ್, ಧೋನಿಯಂತಹ ಆಟಗಾರರು ಚಾಂಪಿಯನ್ ಕ್ರಿಕೆಟಿಗರು. ಅವರು ಹೆಚ್ಚು ಸಾರ್ವಜನಿಕ ವೇದಿಕೆಯಲ್ಲಿ ಕಾಣಿಸುವುದಿಲ್ಲ. ಅದರಲ್ಲೂ ಧೋನಿಯನ್ನು ಸಾರ್ವಜನಿಕವಾಗಿ ನೋಡಲು ಸಾಧ್ಯವಿಲ್ಲ. ಸದ್ಯಕ್ಕೆ ಅವರು ಕ್ರಿಕೆಟ್ ಆಡುವುದಕ್ಕೆ ಫಿಟ್ನೆಸ್ ಸಮಸ್ಯೆ ಅಥವಾ ರನ್‌ಗಾಗಿ ಓಡುವುದಕ್ಕೆ ಸಾಧ್ಯವಿಲ್ಲ ಎಂಬಂತೆ ಕಾಣುತ್ತಾರೆ.
ಆದರೆ ಕೊಹ್ಲಿ ಮದುವೆಯ ಸಮಯದಲ್ಲಿ ಧೋನಿಯ ಜೊತೆ ಮಾತನಾಡಿದ್ದೆ. ಈ ಸಂದರ್ಭದಲ್ಲಿ ಧೋನಿ ನಾನು ತಂಡದಲ್ಲಿ ಈಗಲೂ ವೇಗವಾಗಿ ಓಡುವ ಆಟಗಾರ. ಅಂತಾರಾಷ್ಟ್ರೀಯ ಕ್ರಿಕೆಟ್ ಅಥವಾ ಹೈ ಲೆವೆಲ್ ಕ್ರಿಕೆಟ್ ಆಡಲು ಅಗತ್ಯವಾದ ಫಿಟ್ನೆಸ್ ನನ್ನಲ್ಲಿದೆ ಎಂದು ಅವರು ತಿಳಿಸಿದ್ದರು ಎಂದು ಮಜ್ರೇಕರ್ ನೆನಪಿಸಿಕೊಂಡಿದ್ದಾರೆ.
ನಾನೊಬ್ಬ ಬ್ಯಾಟ್ಸ್ಮನ್ ಆಗಿ ಹೇಳುವುದಾದರೆ, ಈ ಬಾರಿಯ ಐಪಿಎಲ್ನಲ್ಲಿ ಧೋನಿ ಬ್ಯಾಟಿಂಗ್ನಲ್ಲಿ ಹೆಚ್ಚೇನೂ ವಿಭಿನ್ನತೆ ಕಾಣುವುದಿಲ್ಲ. ಯುಎಇ ಧೋನಿಗೆ ಸೂಕ್ತವಾದ ಪರಿಸ್ಥಿತಿಯಾಗಿದೆ. ಏಕೆಂದರೆ, ಅಲ್ಲಿ ಪವರ್ ಹಿಟ್ಟಿಂಗ್ಗಿಂತ ಮೆದುಳನ್ನು ಉಪಯೋಗಿಸಿ ಆಡಬೇಕಿದೆ. ಆದ್ದರಿಂದ ಧೋನಿ ಯಶಸ್ವಿಯಾಗಲಿದ್ದಾರೆ ಎಂದು ಮಂಜ್ರೇಕರ್ ವಿಶ್ವಾಸ ವ್ಯಕ್ತಪಡಿಸಿದ್ದಾರೆ.
