ಕರಾಚಿ: ಟೆಸ್ಟ್ ಕ್ರಿಕೆಟ್ಗೆ ಪಾದಾರ್ಪಣೆ ಮಾಡಿದ ಪಾಕಿಸ್ತಾನದ ಕಿರಿಯ ಆಟಗಾರ ಎನಿಸಿಕೊಂಡಿರುವ ನಸೀಮ್ ಶಾ ರನ್ನು ಅಂಡರ್ 19 ತಂಡದಿಂದ ಹೊರಗಿಟ್ಟು ಅವರ ಜಾಗಕ್ಕೆ ಪಿಸಿಬಿ ಬದಲಿ ಆಟಗಾರನನ್ನು ಘೋಷಿಸಿದೆ.
16ನೇ ವಯಸ್ಸಿಗೇ ಸೀನಿಯರ್ ಕ್ರಿಕೆಟ್ಗೆ ಪಾದಾರ್ಪಣೆ ಮಾಡಿರುವ ನಸೀಮ್ ಶಾರನ್ನು ಮತ್ತೆ ಜೂನಿಯರ್ ಲೆವೆಲ್ನಲ್ಲಿ ಆಡಿಸುವುದು ಬೇಡ ಎಂಬ ಕೂಗು ಕೇಳಿಬಂದ ಹಿನ್ನಲೆ ಪಿಸಿಬಿ ನಸೀಮ್ ಶಾ ಹೆಸರನ್ನು ಅಂಡರ್19 ತಂಡದಿಂದ ವಾಪಸ್ ತೆಗೆದುಕೊಂಡಿದ್ದು ಅವರ ಜಾಗಕ್ಕೆ ಜೂನಿಯರ್ ಮೊಹಮ್ಮದ್ ವಾಸೀಮ್ ಹೆಸರನ್ನು ಘೋಷಿಸಿದೆ.
ಅಂಡರ್ 19 ಮುಖ್ಯ ಕೋಚ್ ಇಜಾಜ್ ಅಹ್ಮದ್ ಅವರ ಸಲಹೆ ಮೇರೆಗೆ ನಸೀಮ್ರನ್ನು ಜೂನಿಯರ್ ವಿಶ್ವಕಪ್ ತಂಡಕ್ಕೆ ಆಯ್ಕೆ ಮಾಡಿತ್ತು. ಆದರೆ ನಸೀಮ್ ಆಸ್ಟ್ರೇಲಿಯಾ ಹಾಗೂ ತವರಿನಲ್ಲಿ ನಡೆದ ಶ್ರೀಲಂಕಾ ವಿರುದ್ಧದ ಉತ್ತಮ ಪ್ರದರ್ಶನ ತೋರಿದ ಮೇಲೆ ಅವರನ್ನು ಸೀನಿಯರ್ ಲೆವೆಲ್ ಕ್ರಿಕೆಟ್ನಲ್ಲಿ ಮುಂದುವರಿಸಲು ಸೀನಿಯರ್ ತಂಡದ ಕೋಚ್ಗಳಾದ ಮಿಸ್ಬಾ ಉಲ್ ಹಕ್ ಹಾಗೂ ವಾಕರ್ ಯೂನೀಸ್ ನಿರ್ಧರಿಸಿ ಈ ನಿರ್ಧಾರ ತೆಗೆದುಕೊಂಡಿದ್ದಾರೆ.
ನಸೀಮ್ ಶ್ರೀಲಂಕಾ ವಿರುದ್ಧ ಟೆಸ್ಟ್ನಲ್ಲಿ 5 ವಿಕೆಟ್ ಪಡೆಯುವ ಮೂಲಕ ಈ ಸಾಧನೆ ಮಾಡಿದ ವಿಶ್ವದ ಅತ್ಯಂತ ಕಿರಿಯ ವೇಗದ ಬೌಲರ್ ಎಂಬ ವಿಶ್ವದಾಖಲೆಗೆ ಪಾತ್ರರಾಗಿದ್ದರು. ಹೀಗಾಗಿ ಪಿಸಿಬಿ ಹೊಸ ಯುವ ಪ್ರತಿಭೆಗೆ ಅವಕಾಶ ಮಾಡಿಕೊಡುವ ನಿರ್ಧಾರ ತೆಗೆದುಕೊಂಡಿದೆ.
ಜನವರಿ 17ರಿಂದ ದಕ್ಷಿಣ ಆಫ್ರಿಕಾದಲ್ಲಿ ಜೂನಿಯರ್ ವಿಶ್ವಕಪ್ ನಡೆಯಲಿದೆ. ಪಾಕಿಸ್ತಾನ 2004 ಹಾಗೂ 2006ರಲ್ಲಿ ಅಂಡರ್ 19 ವಿಶ್ವಕಪ್ ಜಯಿಸಿತ್ತು.
