ಆಕ್ಲೆಂಡ್: ನ್ಯೂಜಿಲ್ಯಾಂಡ್ ಕ್ರಿಕೆಟ್ ಮಂಡಳಿ ಮಹಿಳಾ ತಂಡಕ್ಕೆ ಖಾಯಂ ನಾಯಕಿಯಾಗಿ ಸ್ಫೋಟಕ ಆರಂಭಿಕ ಬ್ಯಾಟರ್ ಸೋಫಿ ಡಿವೈನ್ ಅವರನ್ನು ನೇಮಕ ಮಾಡಿದೆ. ಇಷ್ಟು ವರ್ಷಗಳ ಕಾಲ ನಾಯಕಿಯಾಗಿದ್ದ ಆ್ಯಮಿ ಸತ್ತರ್ವೇಟ್ ಹೆರಿಗೆ ರಜೆ ಮುಗಿಸಿ ಬಂದ ಬಳಿಕ ಉಪನಾಯಕಿಯಾಗಿ ಮುಂದುವರಿಯಲಿದ್ದಾರೆ.
ಡಿವೈನ್ ಕಳೆದ ಆವೃತ್ತಿಯಲ್ಲಿ ಹಂಗಾಮಿ ನಾಯಕಿಯಾಗಿ ಆಯ್ಕೆಯಾಗಿದ್ದರು. ಇದೀಗ ಕಿವೀಸ್ ಕ್ರಿಕೆಟ್ ಮಂಡಳಿ ಖಾಯಂ ನಾಯಕಿಯಾಗಿ ಆಯ್ಕೆ ಮಾಡಿದೆ. ಸತ್ತರ್ವೇಟ್ ಹೆರಿಗೆ ರಜೆ ಬಳಿಕ ತಂಡ ಸೇರಿಕೊಳ್ಳಲಿದ್ದಾರೆ. ಇದರಿಂದ 2021ರಲ್ಲಿ ನಡೆಯಲಿರುವ ಏಕದಿನ ವಿಶ್ವಕಪ್ ವೇಳೆ ತಂಡದ ಪ್ರಮುಖ ಭಾಗವಾಗಲಿದ್ದಾರೆ.
ವೈಟ್ಫರ್ನ್ ನಾಯಕತ್ವ ನನಗೆ ನೀಡಿರುವುದು ನನಗೆ ಸಿಕ್ಕಿರುವ ದೊಡ್ಡ ಗೌರವ. ಕಳೆದ ಋತುವಿನಲ್ಲಿ ನಾನು ನಾಯಕಿಯಾಗಿ ನನ್ನ ಸಮಯವನ್ನು ಆನಂದಿಸಿದ್ದೇನೆ. ಆ ಸಂದರ್ಭದಲ್ಲಿ ಕೆಲವು ಸವಾಲಿನ ಫಲಿತಾಂಶವನ್ನು ಕಂಡಿದ್ದೇನೆ. ನಾವು ಒಂದು ತಂಡವಾಗಿ ಕ್ರಿಕೆಟ್ ಮತ್ತು ಸಂಸ್ಕೃತಿಯೊಂದಿಗೆ ಸರಿಯಾದ ದಿಕ್ಕಿನಲ್ಲೇ ಸಾಗುತ್ತಿದ್ದೇವೆ ಎಂದು ಭಾವಿಸಿದ್ದೇನೆ ಎಂದು ಡಿವೈನ್ ತಿಳಿಸಿದ್ದಾರೆ.
ಇನ್ನು ಆ್ಯಮಿ ಸತ್ತರ್ವೇಟ್ ಕೂಡ ಪ್ರತಿಕ್ರಿಯಿಸಿದ್ದು "ನಾನು ಅಂತಾರಾಷ್ಟ್ರೀಯ ಕ್ರಿಕೆಟ್‌ಗೆ ಮರಳಲು ಎದುರು ನೋಡುತ್ತಿದ್ದೇನೆ ಮತ್ತು ಸೋಫಿ ಮತ್ತು ತಂಡವನ್ನು ಬೆಂಬಲಿಸಲು ನನ್ನ ಕೈಲಾದಷ್ಟು ಪ್ರಯತ್ನ ಮಾಡುತ್ತಿದ್ದೇನೆ" ಎಂದು ಹೇಳಿದ್ದಾರೆ.
ನ್ಯೂಜಿಲ್ಯಾಂಡ್ ತಂಡದ ಲೀ ತಹುಹು ಅವರನ್ನು ವಿವಾಹವಾಗಿರುವ ಸತ್ತರ್ವೇಟ್ ಕಳೆದ ವರ್ಷ ಮಗುವಿಗೆ ಜನ್ಮನೀಡಿದ್ದರು. ಹೀಗಾಗಿ ಅವರು ಒಂದು ವರ್ಷದ ಅವಧಿಗೆ ಕ್ರಿಕೆಟ್ನಿಂದ ದೂರ ಉಳಿಯಲು ನಿರ್ಧರಿಸಿದ್ದರು.
