ಮ್ಯಾಂಚೆಸ್ಟರ್: ಟೂರ್ನಿಯಲ್ಲಿ ಅಮೋಘ ಪ್ರದರ್ಶನ ತೋರಿದ್ದ ಭಾರತ ತಂಡ ಸೆಮಿಫೈನಲ್ನಲ್ಲಿ ಕಿವೀಸ್ ಬೌಲರ್ಗಳ ಮಾರಕ ದಾಳಿಗೆ ಸಿಲುಕಿ 18 ರನ್ಗಳ ಸೋಲು ಕಾಣುವುದರ ಮೂಲಕ ಶತಕೋಟಿ ಭಾರತೀಯರ ಮೂರನೇ ವಿಶ್ವಕಪ್ ಕನಸಿಗೆ ತಣ್ಣೀರೆರಚಿದೆ.
ಕಿವೀಸ್ ನೀಡಿದ 240 ರನ್ಗಳ ಸ್ಪರ್ಧಾತ್ಮಕ ಮೊತ್ತ ಬೆನ್ನೆತ್ತಿದ ಭಾರತೀಯ ಪಡೆ ಕೇವಲ 5 ರನ್ ಆಗುವಷ್ಟರಲ್ಲಿ ರೋಹಿತ್ ಶರ್ಮಾ(1),ಕೊಹ್ಲಿ(1) ಹಾಗೂ ಕನ್ನಡಿಗ ಕೆಎಲ್ ರಾಹುಲ್ (1) ವಿಕೆಟ್ ಕಳೆದು ಕೊಂಡು ಆಘಾತ ಅನುಭವಿಸಿತು. ಈ ಮೂವರ ನಂತರ ಬಂದ ಕಾರ್ತಿಕ್ ಕೂಡ ರನ್ಗಳಿಸಲು ಪರದಾಡಿ 25 ಬಾಲ್ಗಳಲ್ಲಿ ಕೇವಲ 6 ರನ್ಗಳಿಸಿ ಮ್ಯಾಟ್ ಹೆನ್ರಿಗೆ ವಿಕೆಟ್ ಒಪ್ಪಿಸಿದರು.
ಪಾಂಡ್ಯ-ಪಂತ್ 47 ರನ್ಗಳ ಜೊತೆಯಾಟ:
24 ರನ್ಗಳಿಗೆ 4 ವಿಕೆಟ್ ಕಳೆದುಕೊಂಡಿದ್ದ ಕೊಹ್ಲಿ ಪಡೆಗೆ ಯುವ ಕ್ರಿಕೆಟಿಗರಾದ ಪಾಂಡ್ಯ 32 ಹಾಗೂ ಪಂತ್ 32 ರನ್ಗಳಿಸಿ ಆರಂಭಿಕ ಆಘಾತದಿಂದ ಪಾರು ಮಾಡಿದರೂ ನಿರ್ಣಾಯಕ ಘಟ್ಟದಲ್ಲಿ ವಿಕೆಟ್ ಒಪ್ಪಿಸಿದ್ದು ಭಾರತಕ್ಕೆ ನುಂಗಲಾರದ ತುತ್ತಾಯಿತು. ಈ ಇಬ್ಬರು ಮಿಚೆಲ್ ಸ್ಯಾಂಟ್ನರ್ಗೆ ವಿಕೆಟ್ ಒಪ್ಪಿಸಿದರು.
ಕೋಟ್ಯಾಂತರ ಭಾರತೀಯರಲ್ಲಿ ವಿಶ್ವಕಪ್ ಆಸೆ ಮೂಡಿಸಿದ ಧೋನಿ-ಜಡೇಜಾ ಇನ್ನಿಂಗ್ಸ್:
30.3 ಓವರ್ಗಳಲ್ಲಿ 96 ರನ್ಗಳಿಗೆ 6 ವಿಕೆಟ್ ಕಳೆದುಕೊಂಡಿದ್ದ ಭಾರತ ತಂಡಕ್ಕೆ 7 ನೇ ವಿಕೆಟ್ ಜೊತೆಯಾಟದಲ್ಲಿ 116 ರನ್ಗಳ ಜೊತೆಯಾಟ ನಡೆಸಿ ಭಾರತಕ್ಕೆ ಗೆಲುವಿನ ಆಸೇ ಮೂಡಿಸಿದ್ದರು. ಆದರೆ 59 ಎಸೆತಗಳಲ್ಲಿ 4 ಬೌಂಡರಿ ಹಾಗೂ 4 ಸಿಕ್ಸರ್ ಸಿಡಿಸಿ 77 ರನ್ಗಳಿಸಿದ್ದ ವೇಳೆ ಬೌಲ್ಟ್ ಬೌಲಿಂಗ್ನಲ್ಲಿ ವಿಲಿಯಮ್ಸನ್ಗೆ ಕ್ಯಾಚ್ ನೀಡಿದ ಔಟಾದರು.
ಗ್ರೇಟ್ ಮ್ಯಾಚ್ ಫಿನಿಶರ್ ಎಂದೇ ಖ್ಯಾತಿ ಪಡೆದಿದ್ದ ಧೋನಿ ಮೇಲೆ ಕೋಟ್ಯಾಂತರ ಭಾರತೀಯರು ನಿರೀಕ್ಷೆ ಇಟ್ಟಿಕೊಂಡಿದ್ದರು. ಆದರೆ 49 ನೇ ಓವರ್ನ ಮೊದಲ ಎಸೆತದಲ್ಲಿ ಸಿಕ್ಸರ್ ಸಿಡಿಸಿದ ಧೋನಿ ಮೂರನೇ ಎಸೆತದಲ್ಲಿ ಎರಡು ರನ್ ತೆಗೆಯಲು ಹೋಗಿ ರನ್ಔಟಾಗುವುದರೊಂದಿಗೆ ಭಾರತದ ವಿಶ್ವಕಪ್ ಕನಸು ನುಚ್ಚುನೂರಾಯಿತು. ಕೊನೆಗೆ ಭಾರತ ತಂಡ 49.3 ಓವರ್ಗಳಲ್ಲಿ 221ರನ್ಗಳಿಗೆ ಆಲೌಟ್ ಆಗುವುದರೊಂದಿಗೆ ವಿಶ್ವಕಪ್ ಅಭಿಯಾನ ಮುಗಿಸಿತು.
ಅದ್ಭುತ ಬೌಲಿಂಗ್ ನಡೆಸಿದ ಮ್ಯಾಟ್ ಹೆನ್ರಿ 37ಕ್ಕೆ3, ಬೌಲ್ಟ್ 42ಕ್ಕೆ2, ಮಿಚೆಲ್ ಸ್ಯಾಂಟ್ನರ್ 34ಕ್ಕೆ 2 ನಿಶಾಮ್ 49 ಕ್ಕೆ 1 ಹಾಗೂ ಫರ್ಗ್ಯಸನ್ 43ಕ್ಕೆ 1 ವಿಕೆಟ್ ಪಡೆದು ನ್ಯೂಜಿಲ್ಯಾಂಡ್ ತಂಡವನ್ನು ಫೈನಲ್ಗೇರುವಂತೆ ಮಾಡಿದರು.
ಗುರುವಾರ ಆಸ್ಟ್ರೇಲಿಯಾ ಹಾಗೂ ಇಂಗ್ಲೆಂಡ್ ನಡುವೆ ಎರಡನೇ ಸೆಮಿಫೈನಲ್ ನಡೆಯಲಿದ್ದು ಜುಲೈ 14 ಭಾನುವಾರ ವಿಶ್ವಕಪ್ನ ಅಂತಿಮ ಪಂದ್ಯ ನಡೆಯಲಿದೆ.
