ಮುಂಬೈ: ಇತ್ತೀಚೆಗೆ ಭಾರತದ ಮಾಜಿ ಆಟಗಾರರ ಬಿಸಿಸಿಐನಿಂದ ಪಡೆದಿರುವ ಹುದ್ದೆಗಳ ಮೇಲೆ ಹಿತಾಸಕ್ತಿ ಸಂಘರ್ಷದ ಆರೋಪ ಕೇಳಿ ಬರುತ್ತಿದೆ. ಇದು ಗಂಗೂಲಿ ಕೋಪಕ್ಕೆ ಕಾರಣವಾಗಿದ್ದು, ಹಿತಾಸಕ್ತಿ ಸಂಘರ್ಷದ ಆರೋಪಕ್ಕೆ ಪ್ರಾಯೋಗಿಕ ಸ್ಪಷ್ಟನೆ ಇರಬೇಕು ಎಂದು ತಿಳಿಸಿದ್ದಾರೆ.
ರಾಹುಲ್ ದ್ರಾವಿಡ್ ಇತ್ತೀಚೆಗೆ ರಾಷ್ಟ್ರೀಯ ಕ್ರಿಕೆಟ್ ಅಕಾಡೆಮಿಯ ಮುಖ್ಯಸ್ಥರಾಗಿ ಆಯ್ಕೆಯಾಗಿದ್ದಾರೆ. ಇದರ ಜೊತೆಗೆ ಇಂಡಿಯಾ ಸಿಮೆಂಟ್ನಲ್ಲಿ ಉಪಾಧ್ಯಕ್ಷ ಹುದ್ದೆಯಲ್ಲಿದ್ದಾರೆ. ಇದರಲ್ಲಿ ಯಾವುದೇ ರೀತಿಯ ಸಮಸ್ಯೆಯಿಲ್ಲ. ಯಾಕಂದರೆ, ಇಂಡಿಯಾ ಸಿಮೆಂಟ್ ಅವರ ಶಾಶ್ವತವಾದ ವೃತ್ತಿ. ಆದರೆ, ಎನ್ಸಿಎ 2 ವರ್ಷ ಅಥವಾ 3 ವರ್ಷದ ವೃತ್ತಿ. ಇದರಲ್ಲಿ ಹಿತಾಶಕ್ತಿ ಸಂಘರ್ಷ ಹೇಗಾಗುತ್ತದೆ ಎಂದು ಗಂಗೂಲಿ ಪ್ರಶ್ನಿಸಿದ್ದಾರೆ.
ಮೊದಲಾಗಿ ದ್ರಾವಿಡ್ಗೆ ತಾವೂ ಮುಂದೆ ಎನ್ಸಿಎ ಮುಖ್ಯಸ್ಥರಾಗುತ್ತೇವೆಂದು ತಿಳಿದಿರುವುದಿಲ್ಲ. ಅವರಿಗಿರುವ ಕೌಶಲ್ಯಗಳಿಂದ ಅವರನ್ನು ಬಿಸಿಸಿಐ ಎನ್ಸಿಎ ಮುಖ್ಯಸ್ಥರನ್ನಾಗಿ ಮಾಡಿದೆ. ಅವರಷ್ಟೇ ಅಲ್ಲ, ಈ ಹಿಂದೆ ಬಿಸಿಸಿಐ ಹಿತಾಸಕ್ತಿ ಸಂಘರ್ಷದ ನೋಟಿಸ್ ನೀಡಿರುವ ಎಲ್ಲಾ ಮಾಜಿ ಆಟಗಾರಿಗೂ ಅವರವರ ಕೌಶಲ್ಯದಿಂದಲೇ ಗೌರವಾನ್ವಿತ ಹುದ್ದೆಗಳು ಸಿಕ್ಕಿವೆ. ಕಾಮೆಂಟರಿ ಅಥವಾ ಕೋಚಿಂಗ್ ಮಾಡುವುದರಲ್ಲಿ ನನಗೆ ಯಾವುದೇ ನಿಯಮ ಉಲ್ಲಂಘನೆ ಕಂಡುಬರುವುದಿಲ್ಲ ಎಂದಿದ್ದಾರೆ.
ಗಂಗೂಲಿ ಆಸ್ಟ್ರೇಲಿಯಾದ ರಿಕಿ ಪಾಂಟಿಂಗ್ರನ್ನು ಉದಾಹರಣೆ ನೀಡುವ ಮೂಲಕ ಹಿತಾಸಕ್ತಿ ಸಂಘರ್ಷದ ವಿಚಾರಕ್ಕೆ ಸ್ಪಷ್ಟನೆ ನೀಡಿದ್ದಾರೆ, ಪಾಂಟಿಂಗ್ ಆಸ್ಟ್ರೇಲಿಯಾದ ಕೋಚ್ ಹಾಗೂ ಆ್ಯಶಸ್ನಲ್ಲಿ ಕಾಮೆಂಟರಿಯನ್ನು ಜೊತೆಯಾಗಿ ನಡೆಸುತ್ತಿದ್ದಾರೆ. ಮುಂದಿನ ವರ್ಷದ ಐಪಿಎಲ್ನಲ್ಲೂ ಡೆಲ್ಲಿ ಕ್ಯಾಪಿಟಲ್ ಕೋಚ್ ಆಗಿ ಕಾರ್ಯ ನಿರ್ವಹಿಸಲಿದ್ದಾರೆ. ಇವೆಲ್ಲ ಹುದ್ದೆಗಳು ಅವರಿಗಿರುವ ಕೌಶಲ್ಯದಿಂದಲೇ ಬಂದಿದೆ. ಇದರಲ್ಲಿ ಯಾವ ಹಿತಾಸಕ್ತಿ ಸಂಘರ್ಷ ಇದೆ ಎಂದು ತಮ್ಮ ವಿರುದ್ಧ ಆರೋಪ ಮಾಡಿರುವವರ ಮೇಲೆ ಗಂಗೂಲಿ ಕಿಡಿಕಾರಿದ್ದಾರೆ.
ದ್ರಾವಿಡ್ ಎನ್ಸಿಎ ಮುಖ್ಯಸ್ಥ ಹಾಗೂ ಚೆನ್ನೈ ಸೂಪರ್ ಕಿಂಗ್ಸ್ ಒಡೆತನವಿರುವ ಇಂಡಿಯಾ ಸಿಮೆಂಟ್ ಗ್ರೂಪ್ನಲ್ಲಿ ಉಪಾಧ್ಯಕ್ಷ ಹುದ್ದೆ ಪಡೆದಿರುವುದಕ್ಕೆ ಬಿಸಿಸಿಐ ಒಂಬುಡ್ಸ್ಮನ್ ನಿವೃತ್ತ ನ್ಯಾಯಮೂರ್ತಿ ದ್ರಾವಿಡ್ಗೆ ಸ್ಪಷ್ಟನೇ ನೀಡುವಂತೆ ಸೆಪ್ಟೆಂಬರ್ 26ರಂದು ದಿನಾಂಕ ನಿಗದಿ ಮಾಡಿದ್ದಾರೆ.
