ತಂಡ ಸೋಲು ಕಾಣಲು ನಾನು ಕಾರಣವಲ್ಲ: ಮೈದಾನದಲ್ಲೇ ಸಹ ಆಟಗಾರರ ವಿರುದ್ಧ ಹರಿಹಾಯ್ದ ಅಮೀರ್​!

ಟೀಂ ಇಂಡಿಯಾ ವಿರುದ್ಧ ಪಾಕ್​ ಹೀನಾಯ ಸೋಲು ಕಾಣುತ್ತಿದ್ದಂತೆ, ಮೊಹಮ್ಮದ್​ ಅಮೀರ್​ ಆಕ್ರೋಶಗೊಂಡು ಮೈದಾನದಲ್ಲೇ ಸಹ ಆಟಗಾರರ ಮೇಲೆ ಕೆಂಡಾಮಂಡಲವಾದ ಘಟನೆ ನಡೆದಿದೆ.

ಮ್ಯಾಂಚೆಸ್ಟರ್​​: ವಿಶ್ವಕಪ್​​ನಲ್ಲಿ ಪಾಕ್​ ವಿರುದ್ಧ ಭಾರತದ ಗೆಲುವಿನ ನಾಗಾಲೋಟ ಮುಂದುವರೆದಿದೆ. ನಿನ್ನೆಯ ಪಂದ್ಯದಲ್ಲೂ ಸಾಂಪ್ರದಾಯಿಕ ಎದುರಾಳಿ ಎದುರು ಕೊಹ್ಲಿ ಪಡೆ 89 ರನ್​ಗಳ ಭರ್ಜರಿ ಗೆಲುವು ದಾಖಲು ಮಾಡಿದೆ.

ಇದೇ ವಿಷಯವನ್ನಿಟ್ಟುಕೊಂಡು ಪಾಕ್​ ತಂಡದ ವೇಗದ ಬೌಲರ್​ ಮೊಹಮ್ಮದ್​ ಅಮೀರ್​ ಸಹ ಆಟಗಾರರ ಮೇಲೆ ಕೆಂಡಕಾರಿದ್ದಾರೆ. ತಾವು ಉತ್ತಮ ಬೌಲಿಂಗ್​ ಪ್ರದರ್ಶನ ನೀಡಿದರೂ, ಇತರ ಬೌಲರ್​ಗಳು ಹೇಳಿಕೊಳ್ಳುವಂತಹ ಬೌಲಿಂಗ್​ ಮಾಡಿಲ್ಲ. ನಮ್ಮ ಸೋಲಿಗೆ ಇದೇ ಕಾರಣವಾಗಿದ್ದು, ಈ ಸೋಲಿನ ಜವಾಬ್ದಾರಿ ನಾನು ಹೊರುವುದಿಲ್ಲ ಎಂದು ಹೇಳಿದ್ದಾರೆ.

ಆರಂಭದಲ್ಲಿ ಆರು ಓವರ್​ ಎಸೆದ ಅಮೀರ್​ ಕೇವಲ 18ರನ್​ ಮಾತ್ರ ನೀಡಿದ್ದರು. ಆದರೆ, ಇವರಿಗೆ ಸಾಥ್​ ನೀಡದ ಇತರ ಬೌಲರ್​ ಹೆಚ್ಚಿನ ರೀತಿಯಲ್ಲಿ ರನ್​ ಬಿಟ್ಟುಕೊಟ್ಟರು. ಹೀಗಾಗಿ ತಂಡ 300ಗಡಿ ದಾಟುವಂತಾಯಿತು. ಇದೇ ವಿಷಯವನ್ನಿಟ್ಟುಕೊಂಡು ತಂಡ ಸೋಲು ಕಾಣುತ್ತಿದ್ದಂತೆ ಮೈದಾನದಲ್ಲಿ ಆಕ್ರೋಶಗೊಂಡು, ಡ್ರೆಸ್ಸಿಂಗ್ ರೂಂ ಕಡೆ ಹೆಜ್ಜೆ ಹಾಕಿದ್ದಾರೆ.

ಆಸ್ಟ್ರೇಲಿಯಾ ವಿರುದ್ಧದ ಪಂದ್ಯದಲ್ಲೂ ಮಿಂಚಿದ್ದ ಅಮೀರ್​ ಕೇವಲ 30ರನ್​ ನೀಡಿ 5ವಿಕೆಟ್​ ಪಡೆದುಕೊಂಡಿದ್ದರು. ನಿನ್ನೆಯ ಪಂದ್ಯದಲ್ಲೂ ವಿರಾಟ್​ ಕೊಹ್ಲಿ, ಎಂಎಸ್ ಧೋನಿ ಹಾಗೂ ಹಾರ್ದಿಕ್​ ಪಾಂಡ್ಯರಂತಹ ಪ್ರಮುಖರ ವಿಕೆಟ್​ ಪಡೆದುಕೊಂಡು ಸಖತ್​ ಪ್ರದರ್ಶನ ನೀಡಿದ್ದರು. ಆದರೂ ಉಳಿದ ಆಟಗಾರರ ನೀರಸ ಪ್ರದರ್ಶನದಿಂದ ಪಂದ್ಯದಲ್ಲಿ ತಂಡ ಸೋಲು ಕಂಡಿತ್ತು. ಹೀಗಾಗಿ ತಾವು ಉತ್ತಮವಾಗಿ ಬೌಲಿಂಗ್​ ಮಾಡುತ್ತಿದ್ದರೂ ಸಹ ಆಟಗಾರರು ತಮಗೆ ಸಾಥ್​ ನೀಡುತ್ತಿಲ್ಲ ಎಂಬುದು ಮೊಹಮ್ಮದ್​ ಅಮೀರ್​ ಅವರ ಅಸಮಾಧಾನವಾಗಿದೆ.