ಮುಂಬೈ: ಭಾರತ ಕ್ರಿಕೆಟ್ ತಂಡದ ಮಾಜಿ ನಾಯಕ ವಿಕೆಟ್ ಕೀಪರ್ ಎಂ.ಎಸ್. ಧೋನಿ ನಂತರ ವಿಕೆಟ್ ಕೀಪರ್ ಸ್ಥಾನಕ್ಕೆ ಯುವ ವಿಕೆಟ್ ಕೀಪರ್ಗಳಿಂದ ತೀವ್ರ ಸ್ಪರ್ಧೆ ಕಂಡುಬರುತ್ತಿದೆ.
ಧೋನಿ 2014ರಲ್ಲೇ ಟೆಸ್ಟ್ ಕ್ರಿಕೆಟ್ಗೆ ನಿವೃತ್ತಿ ಘೋಷಿಸಿದ್ದಾರೆ. ಅಂದಿನಿಂದ ಕೆಲವು ವರ್ಷಗಳ ಅವಧಿಗೆ ವೃದ್ಧಿಮಾನ್ ಸಹಾ ಟೆಸ್ಟ್ ಕ್ರಿಕೆಟ್ನಲ್ಲಿ ವಿಕೆಟ್ ಕೀಪರ್ ಸ್ಥಾನ ತುಂಬಿದರು. ಅದರೆ ಸೀಮಿತ ಓವರುಗಳ ಕ್ರಿಕೆಟ್ನಲ್ಲಿ ಮಾತ್ರ ಇನ್ನೂ ಅವರ ಸ್ಥಾನ ತುಂಬಲು ಯಾರಿಂದಲೂ ಸಾಧ್ಯವಾಗುತ್ತಿಲ್ಲ.
ಪ್ರಸ್ತುತ ರಿಷಭ್ ಪಂತ್ ಅವರನ್ನು ಧೋನಿಯ ಉತ್ತರಾಧಿಕಾರಿ ಎಂದು ಬಿಂಬಿಸಲಾಗುತ್ತಿದೆ. ಆದರೆ ಪಂತ್ ನಿರೀಕ್ಷಿತ ಪ್ರದರ್ಶನ ಕಾಯ್ದುಕೊಳ್ಳಲು ಸಾಧ್ಯವಾಗದ ಕಾರಣ ಕನ್ನಡಿಗ ಕೆ.ಎಲ್.ರಾಹುಲ್ ಕೆಲವು ಪಂದ್ಯಗಳಲ್ಲಿ ವಿಕೆಟ್ ಕೀಪರ್ ಜವಾಬ್ದಾರಿ ನಿರ್ವಹಿಸಿದ್ದಾರೆ. ಆದರೆ ಖಾಯಂ ಕೀಪರ್ಗೆ ಸಂಜು ಸಾಮ್ಸನ್, ರಿಷಭ್ ಪಂತ್ ಹಾಗೂ ರಾಹುಲ್ ನಡುವೆ ತುರುಸಿನ ಪೈಪೋಟಿ ಇದೆ. ಆದರೆ ಸಾಮ್ಸನ್ ಮಾತ್ರ ಪಂತ್ ನನ್ನ ಸ್ನೇಹಿತನೇ ಹೊರತು ಪ್ರತಿಸ್ಪರ್ಧಿಯಲ್ಲ ಎಂದಿದ್ದಾರೆ.
ಇದೆಲ್ಲಾ ತಂಡದ ಸಂಯೋಜನೆಯ ಆಧಾರದ ಮೇಲೆ ನಿಂತಿರುತ್ತದೆ. ಪಂತ್ ನನ್ನ ಪ್ರತಿಸ್ಪರ್ಧಿ ಎಂದು ನಾನು ಯೋಚಿಸಲಾರೆ. ನಾನೊಬ್ಬ ಕ್ರಿಕೆಟರ್ ಆಗಿದ್ದುಕೊಂಡು, ತಂಡದಲ್ಲಿ ಅವಕಾಶ ಸಿಗಬೇಕಾದರೆ ಸ್ಪರ್ಧೆ ಮುಖ್ಯ ಎಂದೇ ಭಾವಿಸುತ್ತೇನೆ. ನಮಗೆ ಅವಕಾಶ ಸಿಗಬೇಕಾದರೆ ನಾವು ಇನ್ನೊಬ್ಬರ ಪ್ರದರ್ಶನದ ಮೇಲೆ ಕಣ್ಣಿಡಬೇಕು. ಆದರೆ ನಾನು ಕ್ರಿಕೆಟ್ ಆಡುವ ರೀತಿ ಆ ರೀತಿಯೆಂದು ಭಾವಿಸಿಲ್ಲ ಎಂದು ಸ್ಯಾಮ್ಸನ್‌ ಹೇಳಿದ್ದಾರೆ.
ನಾನು ಮತ್ತು ರಿಷಭ್ ಪಂತ್ ಪ್ರತಿಸ್ಪರ್ಧಿಗಳು ಎಂದು ಹೇಳುತ್ತಾರೆ. ಆದರೆ ನಾನು ಪಂತ್ ಸಾಕಷ್ಟು ಇನ್ನಿಂಗ್ಸ್ಗಳಲ್ಲಿ ಜೊತೆಯಾಗಿ ಆಡಿದ್ದೇವೆ. ಅಷ್ಟೇ ಅಲ್ಲ, ನಾವಿಬ್ಬರು ಸಾಕಷ್ಟು ತರ್ಲೆ, ತಮಾಷೆ ಮಾಡಿ ಖುಷಿಪಟ್ಟಿದ್ದೇವೆ. ಡೆಲ್ಲಿ ಡೇರ್ ಡೇವಿಲ್ಸ್ ಪರ ಆಡುವಾಗ ಬೌಲರ್ಗಳ ಮೇಲೆ ಪಾರಮ್ಯ ಮೆರೆದಿದ್ದೇವೆ. ಹೀಗಾಗಿ ನಾನು ಅವರ ಜೊತೆಯಾಗಿ ಆಡಲು ಬಯಸುತ್ತೇನೆಯೇ ಹೊರತು ಪ್ರತಿಸ್ಪರ್ಧಿಯಾಗಿ ಅಲ್ಲ ಕೇರಳ ಕ್ರಿಕೆಟಿಗ ಅಭಿಪ್ರಾಯಪಟ್ಟರು.
2015 ರಲ್ಲಿ ಜಿಂಬಾಬ್ವೆ ವಿರುದ್ಧ ಅಂತಾರಾಷ್ಟ್ರೀಯ ಕ್ರಿಕೆಟ್ಗೆ ಪದಾರ್ಪಣೆ ಮಾಡಿದ್ದ ಸಂಜು ಆ ಪಂದ್ಯದಲ್ಲಿ 7ನೇ ಕ್ರಮಾಂಕದಲ್ಲಿ ಬ್ಯಾಟಿಂಗ್ ನಡೆಸಿದ್ದರು. ಆಗ ಅವರು 24 ಎಸೆತಗಳಲ್ಲಿ ಕೇವಲ 19 ರನ್ ಗಳಿಸಿದ್ದರು. ನಂತರ 5 ವರ್ಷಗಳ ಕಾಲ ಅವರಿಗೆ ಅವಕಾಶ ಸಿಕ್ಕಿರಲಿಲ್ಲ. ಆದರೆ 2019ರಲ್ಲಿ ಮತ್ತೆ ಬಾಂಗ್ಲಾದೇಶದ ವಿರುದ್ಧ ಅವಕಾಶ ಪಡೆದರಾದರೂ ಒಂದೂ ಪಂದ್ಯದಲ್ಲಿ ಅವಕಾಶ ಸಿಗಲಿಲ್ಲ. ನಂತರ ವಿಂಡೀಸ್ ವಿರುದ್ಧದ ಸರಣಿಯಿಂದಲೇ ಹೊರದಬ್ಬಲಾಗಿತ್ತು. ಈ ನಿರ್ಧಾರದಿಂದ ಮಾಜಿ ಕ್ರಿಕೆಟಿಗರ ಕೆಂಗಣ್ಣಿಗೆ ಆಯ್ಕೆ ಸಮಿತಿ ತುತ್ತಾಗಿತ್ತು.
ನಂತದ ಭಾರತ ನ್ಯೂಜಿಲ್ಯಾಂಡ್ ಪ್ರವಾಸ ಕೈಗೊಂಡಿದ್ದ ವೇಳೆ ಟಿ20 ಸರಣಿಗೆ ಅವಕಾಶ ನೀಡಿತ್ತಾದರೂ, ಸಿಕ್ಕ ಅವಕಾಶವನ್ನು ಸಂಜು ಬಾಚಿಕೊಳ್ಳುವುದರಲ್ಲಿ ವಿಫಲರಾಗಿದ್ದರು.
