ಮುಂಬೈ: ವಿಶ್ವ ಕಂಡ ಶ್ರೇಷ್ಠ ಸ್ಪಿನ್ನರ್, ಭಾರತೀಯ ಮಾಜಿ ಆಟಗಾರ ಅನಿಲ್ ಕುಂಬ್ಳೆ ನೇತೃತ್ವದಲ್ಲಿ ಫೈನಲ್ ಪಂದ್ಯದ ಸೂಪರ್ ಓವರ್ ಟೈ ಆದರೆ ವಿನ್ನರ್ ಘೋಷಣೆಗೆ ಮೊರೆ ಹೋಗುತ್ತಿರುವ ಬೌಂಡರಿ ಲೆಕ್ಕಾಚಾರ ನಿಯಮದ ಬಗ್ಗೆ ಚರ್ಚಿಸಲು ಕಮಿಟಿ ರಚಿಸಿದ್ದು, ಅದರ ನೇತೃತ್ವವನ್ನು ಕನ್ನಡಿಗ ಅನಿಲ್ ಕುಂಬ್ಳೆವಹಿಸಿಕೊಳ್ಳಲಿದ್ದಾರೆ.
ಇತ್ತೀಚೆಗೆ ಮುಗಿದ ಐಸಿಸಿ ವಿಶ್ವಕಪ್ ಫೈನಲ್ನಲ್ಲಿ ನ್ಯೂಜಿಲ್ಯಾಂಡ್ ಹಾಗೂ ಇಂಗ್ಲೆಂಡ್ ನಡುವಿನ ಪಂದ್ಯ ಟೈ ಆಗಿತ್ತು. ನಂತರ ನಡೆದ ಸೂಪರ್ ಓವರ್ ಕೂಡ ಟೈ ಆಗಿದ್ದರಿಂದ ಮೊದಲೇ ನಿರ್ಧರಿತವಾಗಿದ್ದ ಹೆಚ್ಚು ಬೌಂಡರಿಗಳಿಸಿದ ಇಂಗ್ಲೆಂಡ್ ತಂಡವನ್ನು ವಿಜಯಿ ಎಂದು ಘೋಷಿಸಲಾಯಿತು. ಇಂಗ್ಲೆಂಡ್ 22 ಬೌಂಡರಿ ಹಾಗೂ 2 ಸಿಕ್ಸರ್ಗಳಿಸಿದ್ದರೆ, ಕಿವೀಸ್ 17 ಬೌಂಡರಿಗಳಿಸಿತ್ತು.
ಆದರೆ, ಈ ನಿಯಮವನ್ನು ವಿಶ್ವದಾದ್ಯಂತ ಹಲವು ಹಾಲಿ ಹಾಗೂ ಮಾಜಿ ಕ್ರಿಕೆಟಿಗರು ಪ್ರಶ್ನಿಸಿದ್ದರು. ಹೀಗಾಗಿ ಈ ವಿಚಾರವನ್ನು ಐಸಿಸಿ ಕ್ರಿಕೆಟ್ ಕಮಿಟಿ ಗಂಭೀರವಾಗಿ ತೆಗೆದುಕೊಂಡಿದ್ದು, 2020ರ ಮೊದಲ ಚತುರ್ಮಾಸದಲ್ಲಿ ನಡೆಯುವ ಐಸಿಸಿ ಸಭೆಯಲ್ಲಿ ಈ ನಿಯಮದ ಬಗ್ಗೆ ಚರ್ಚೆ ನಡೆಸುವುದಾಗಿ ಹಾಗೂ ಈ ಚರ್ಚೆಯ ನೇತೃತ್ವವನ್ನು ಅನಿಲ್ ಕುಂಬ್ಳೆವಹಿಸಿಕೊಳ್ಳುತ್ತಿದ್ದಾರೆ ಎಂದು ಐಸಿಸಿ ಜನರಲ್ ಮ್ಯಾನೇಜರ್ ಜಿಯೊಫ್ ಜೆಫ್ ಅಲ್ಲಾರ್ಡೈಸ್ ತಿಳಿಸಿದ್ದಾರೆ.
2008ರ ಟಿ20 ವಿಶ್ವಕಪ್ನಿಂದ ಟೈ ಆಗುವ ಐಸಿಸಿ ಇವೆಂಟ್ಗಳಲ್ಲಿ ವಿಜೇತರನ್ನು ಘೋಷಿಸಲೇಬೇಕೆಂದು ನಿರ್ಣಯಿಸಿದ್ದು, ವಿಜೇತರಿಗಾಗಿ ಬಾಲ್ ಔಟ್ ನಿಯಮ ಅಳವಡಿಸಿಕೊಳ್ಳಲಾಗಿತ್ತು. ಆದರೆ, 2009ರಲ್ಲಿ ಈ ನಿಯಮವನ್ನು ಬದಲಿಸಿ ಸೂಪರ್ ಓವರ್ ಅಳವಡಿಸಿಕೊಳ್ಳಲಾಯಿತು. ಒಂದುವೇಳೆ ಇಲ್ಲೂ ಟೈ ಆದರೆ ಹೆಚ್ಚು ಬೌಂಡರಿಗಳಿಸಿದ ತಂಡವನ್ನು ವಿಜಯಿ ಎಂದು ತೀರ್ಮಾನಿಸುವಂತಾಯಿತು.
ಆದರೆ, ಪ್ರಸ್ತುತ ಈ ನಿಯಮ ಟೀಕೆಗೆ ಗುರಿಯಾಗಿರುವುದರಿಂದ ಮುಂದಿನ ಐಸಿಸಿ ಸಭೆಯಲ್ಲಿ ಈ ನಿಯಮದ ಬಗ್ಗೆ ಕೂಲಂಕಷವಾಗಿ ಚರ್ಚಿಸಲಾಗುವುದು ಎಂದು ಅಲ್ಲಾರ್ಡೈಸ್ ತಿಳಿಸಿದ್ದಾರೆ.
