ನವದೆಹಲಿ: ಭಾರತ ತಂಡದ ವಿರಾಟ್ ಕೊಹ್ಲಿ-ಜಸ್ಪ್ರೀತ್ ಬುಮ್ರಾ ವೆಸ್ಟ್ ಇಂಡೀಸ್ ಕ್ರಿಕೆಟ್ ಲೆಜೆಂಡ್ ಬ್ರಿಯಾನ್ ಲಾರಾ ಘೋಷಿಸಿದ ಈ ಯುಗದ ಟಾಪ್ 5 ಶ್ರೇಷ್ಠ ಬ್ಯಾಟ್ಸ್ಮನ್-ಬೌಲರ್ಗಳ ಪಟ್ಟಿಯಲ್ಲಿ ಸ್ಥಾನ ಪಡೆದಿದ್ದಾರೆ.
ವಿರಾಟ್ ಕೊಹ್ಲಿ, ನ್ಯೂಜಿಲ್ಯಾಂಡ್ ನಾಯಕ ಕೇನ್ ವಿಲಿಯಮ್ಸನ್, ಇಂಗ್ಲೆಂಡ್ ತಂಡದ ಜೋ ರೂಟ್, ದಕ್ಷಿಣ ಆಫ್ರಿಕಾದ ಎಬಿ ಡಿ ವಿಲಿಯರ್ಸ್ ಹಾಗೂ ಆಸ್ಟ್ರೇಲಿಯಾದ ಸ್ಟಿವ್ ಸ್ಮಿತ್ ಅವರನ್ನು ಈ ಯುಗದ ಶ್ರೇಷ್ಠ ಬ್ಯಾಟ್ಸ್ಮನ್ಗಳು ಎಂದು ತಮ್ಮ ಇನ್ಸ್ಟಾಗ್ರಾಂ ಖಾತೆಯಲ್ಲಿ ಲಾರಾ ಹೇಳಿಕೊಂಡಿದ್ದಾರೆ.
ಇನ್ನು ಬೌಲರ್ಗಳ ಲಿಸ್ಟ್ನಲ್ಲಿ ಜಸ್ಪ್ರೀತ್ ಬುಮ್ರಾ ಜೊತೆಗೆ ಇಂಗ್ಲೆಂಡ್ನ ಜೋಫ್ರಾ ಆರ್ಚರ್, ಜೇಮ್ಸ್ ಆ್ಯಂಡರ್ಸನ್, ದಕ್ಷಿಣ ಆಫ್ರಿಕಾದ ಕಗಿಸೋ ರಬಾಡ ಮತ್ತು ಅಫ್ಘಾನಿಸ್ತಾನದ ಸ್ಪಿನ್ನರ್ ರಶೀದ್ ಖಾನ್ ಪ್ರಸ್ತುತ ಟಾಪ್ 5 ಬೌಲರ್ಸ್ ಎಂದು ತಿಳಿಸಿದ್ದಾರೆ. ಆದರೆ ಈ ಪಟ್ಟಿಗೆ ಯಾವುದೇ ಶ್ರೇಯಾಂಕ ನೀಡಿಲ್ಲ.
ಲಾರಾ ಇದರ ಜೊತೆಗೆ ತಮ್ಮ ಕಾಲದಲ್ಲಿ ವಿರುದ್ಧ ಆಡಿರುವ ಟಾಪ್ 5 ಬ್ಯಾಟ್ಸ್ಮನ್ ಮತ್ತು ಬೌಲರ್ಗಳನ್ನು ಹೆಸರಿಸಿದ್ದಾರೆ. ಇದರಲ್ಲಿ ಸಚಿನ್ ತೆಂಡೂಲ್ಕರ್, ರಿಕಿ ಪಾಂಟಿಂಗ್, ಜಾಕ್ ಕಾಲೀಸ್, ಕುಮಾರ್ ಸಂಗಾಕ್ಕರ, ರಾಹುಲ್ ದ್ರಾವಿಡ್ ಹಾಗೂ ಬೌಲರ್ಗಳ ವಿಭಾಗದಲ್ಲಿ ವಾಸೀಂ ಅಕ್ರಮ್, ಶೇನ್ ವಾರ್ನ್, ವಾಕರ್ ಯೂನಿಸ್, ಮುತ್ತಯ್ಯ ಮುರಳಿಧರನ್ ಹಾಗೂ ಗ್ಲೇನ್ ಮೆಕ್ಗ್ರಾತ್ ತಾವೆದುರಿಸಿದ ಉತ್ತಮ ಬೌಲರ್ಗಳೆಂದು ತಿಳಿಸಿದ್ದಾರೆ.
ಲಾರಾ ಇದೇ ಸಂದರ್ಭದಲ್ಲಿ ವೆಸ್ಟ್ ಇಂಡೀಸ್ ತಂಡದ ಸಾರ್ವಕಾಲಿಕ 5 ಆಟಗಾರರನ್ನು ಹೆಸರಿಸಿದ್ದು, ಅದರಲ್ಲಿ ಜಾರ್ಜ್ ಹೆಡ್ಲಿ, ಎವೆರ್ಟನ್ ವೀಕ್ಸ್, ಗ್ಯಾರಿ ಸೋಬರ್ಸ್, ವಿವಿಯನ್ ರಿಚರ್ಡ್ಸ್ ಹಾಗೂ ಮಾಲ್ಕಮ್ ಮಾರ್ಷಲ್ ಇದ್ದಾರೆ.
ಕರ್ಟ್ನಿ ವಾಲ್ಸ್, ಕರ್ಟ್ಲೀ ಆ್ಯಂಬ್ರೋಸ್, ಶಿವನರಾಯಣ್ ಚಂದ್ರಪಾಲ್, ಕಾರ್ಲ್ ಹೂಪರ್ ಹಾಗೂ ಕ್ರಿಸ್ ಗೇಲ್ ತಮ್ಮ ಕಾಲದ ವಿಂಡೀಸ್ನ ಶ್ರೇಷ್ಠ ಆಟಗಾರರೆಂದು ಹೇಳಿದ್ದಾರೆ.
ಇದನ್ನೂ ಓದಿ: ರವೀಂದ್ರ ಜಡೇಜಾಗೆ ಚಹಾಲ್ ಸರಿಸಮನಾದ ಆಟಗಾರನೇ?: ಆಸೀಸ್ ತಂಡದ ಹೆನ್ರಿಕ್ಸ್ ಪ್ರಶ್ನೆ
