ನವದೆಹಲಿ: ವಾರದ ಹಿಂದೆ ಭಾರತ ತಂಡದ ಮಾಜಿ ನಾಯಕ ಕಪಿಲ್ ದೇವ್ ಕೊರೊನಾ ಲಾಕ್ಡೌನ್ ವೇಳೆ ಕೇಶ ಮುಂಡನ ಮಾಡಿಕೊಂಡು ಗಡ್ಡಬಿಟ್ಟುಕೊಂಡು ಹೊಸ ಲುಕ್ನಲ್ಲಿ ಕಂಗೊಳಿಸಿದ್ದರು. ಇವರನ್ನು ಅಭಿಮಾನಿಗಳು ವಿಂಡೀಸ್ ಲೆಜೆಂಡ್ ವಿವಿ ರಿಚರ್ಡ್ಸ್ಗೆ ಹೋಲಿಕೆ ಮಾಡಿದ್ದರು ಇದೀಗ ಅವರ ಹೊಸ ಲುಕ್ಗೆ ಪ್ರೇರಣೆಯಾದ ಇಬ್ಬರು ಲೆಜೆಂಡ್ಗಳ ಹೆಸರನ್ನು ಬಹಿರಂಗ ಪಡಿಸಿದ್ದಾರೆ.
ನಾನು ಸರ್ ವಿವಿಯನ್ ರಿಚರ್ಡ್ಸ್ ಅವರ ಇನ್ಸ್ಟಾಗ್ರಾಮ್ಅನ್ನು ನೋಡಿದ್ದೇನೆ. ಅವರು ನನ್ನ ಹೀರೋ, ಹೀಗಾಗಿ ನಾನು ಅವರ ಸ್ಟೈಲ್ ಏಕೆ ಅನುಕರಣೆ ಮಾಡುಬಾರದೆಂದು ಆಲೋಚಿಸಿದೆ. ನಂತರ ನನ್ನ ಹೀರೋ ಸ್ಟೈಲ್ ಫಾಲೋ ಮಾಡಿದೆ. ಇನ್ನು ಧೋನಿಯನ್ನು ಸಹಾ ನಾನು ನೋಡಿದ್ದೇನೆ, ಅವರೂ ಕೂಡ ನನ್ನ ಹೀರೋ ಮತ್ತು ಅವರು ವಿಶ್ವಕಪ್ ಗೆದ್ದಬಳಿಕ ಇದೇ ರೀತಿ ಸ್ಟೈಲ್ನಲ್ಲಿದ್ದರು. ಹೀಗಾಗಿ ನಾನು ಈ ಬಾರಿ ಆ ಚಾನ್ಸ್ ತೆಗೆದುಕೊಂಡು, ಈ ರೀತಿ ಮಾಡಿಸಿಕೊಂಡಿದ್ದೇನೆ ಎಂದು ಚೆನ್ನೈ ಸೂಪರ್ ಕಿಂಗ್ಸ್ ಟ್ವೀಟ್ ಮಾಡಿರುವ ವಿಡಿಯೋದಲ್ಲಿ ಹೇಳಿಕೊಂಡಿದ್ದಾರೆ.
ಇದಕ್ಕೆ ಪ್ರತಿಕ್ರಿಯಿಸಿರುವ ರಿಚರ್ಡ್ಸ್, ನೀನು ಸರಿಯಾದ ಸ್ಪೂರ್ತಿ ಪಡೆದಿದ್ದೀಯ ಗೆಳೆಯಾ ಎಂದು ಟ್ವೀಟ್ ಮಾಡಿದ್ದಾರೆ.
ಎಂಎಸ್ ಧೋನಿ 2007 ರ ಟಿ20 ವಿಶ್ವಕಪ್ ಗೆದ್ದ ಬಳಿಕ ಹೆಚ್ಚು ಪ್ರಸಿದ್ದಿ ಪಡೆದಿದ್ದ ಅವರ ಉದ್ದ ಕೂದಲಿನ ಸ್ಟೈಲ್ಗೆ ಕತ್ತರಿ ಹಾಕಿಸಿದ್ದರು. ನಂತರ 2011ರ ವಿಶ್ವಕಪ್ ಬಳಿಕ ಸೆಮಿ ಬ್ಲೇಡ್ ಲುಕ್ನಲ್ಲಿ ಕಾಣಿಸಿಕೊಂಡಿದ್ದರು.
ಇನ್ನು ಕಪಿಲ್ ದೇವ್ರ ಬ್ಲೇಡ್ ಲುಕ್ ಸ್ಟೈಲ್ ರಿಚರ್ಡ್ಸ್ ಸ್ಟೈಲ್ಗೆ ತುಂಬಾ ಹತ್ತಿರವಾಗಿದೆ. ರಿಚರ್ಡ್ಸ್ ತಮ್ಮ ನಿವೃತ್ತಿ ಬಳಿಕ ಇದೇ ಸ್ಟೈಲ್ಅನ್ನು ತಮ್ಮ ಜೀವನದ ಭಾಗವಾಗಿಸಿಕೊಂಡು ಬರುತ್ತಿದ್ದಾರೆ.
