ನವದೆಹಲಿ: ತಾನು ಆಡಿದ 12 ಟೆಸ್ಟ್ ಪಂದ್ಯಗಳಲ್ಲಿ 5 ಬಾರಿ 5 ವಿಕೆಟ್ ಪಡೆದು ದಾಖಲೆ ಬರೆದಿರುವ ಯಾರ್ಕರ್ ಸ್ಪೆಷಲಿಸ್ಟ್ ಜಸ್ಪ್ರಿತ್ ಬುಮ್ರಾ ತಮ್ಮ ಟೆಸ್ಟ್ ಕ್ರಿಕೆಟ್ನ ಬೆಸ್ಟ್ ಮೊಮೆಂಟ್ ಬಗ್ಗೆ ಹೇಳಿಕೊಂಡಿದ್ದಾರೆ.
ಕಳೆದ ವರ್ಷ ದಕ್ಷಿಣ ಆಫ್ರಿಕಾ ವಿರುದ್ಧ ನಡೆದ ಟೆಸ್ಟ್ ಸರಣಿ ಮೂಲಕ ಟೆಸ್ಟ್ ಕ್ರಿಕೆಟ್ಗೆ ಬುಮ್ರಾ ಪದಾರ್ಪಣೆ ಮಾಡಿದ್ದರು. ಅದೇ ಸರಣಿಯಲ್ಲಿ ಜೊಹಾನ್ಸ್ಬರ್ಗ್ನಲ್ಲಿ ನಡೆದ ಪಂದ್ಯದಲ್ಲಿ 5 ವಿಕೆಟ್ ಪಡೆದಿದ್ದು, ನನ್ನ ಟೆಸ್ಟ್ ಕ್ರಿಕೆಟ್ನ ಅತ್ಯುತ್ತಮ ಕ್ಷಣ ಎಂದು ಬುಮ್ರಾ ರಿವೀಲ್ ಮಾಡಿದ್ದಾರೆ.
ಸುದ್ದಿ ಸಂಸ್ಥೆಯೊಂದಕ್ಕೆ ನೀಡಿದ ಸಂದರ್ಶನದಲ್ಲಿ ಮಾತನಾಡಿರುವ ಅವರು, ನನಗೆ ಟೆಸ್ಟ್ ಕ್ರಿಕೆಟ್ ತುಂಬಾ ಮುಖ್ಯ, ಹೀಗಾಗಿ ಹೆಚ್ಚೆಚ್ಚು ಟೆಸ್ಟ್ ಪಂದ್ಯಗಳನ್ನ ಆಡಲು ಬಯಸುತ್ತೇನೆ ಎಂದಿದ್ದಾರೆ.
ಅಲ್ಲದೇ ದೇಶಿ ಟೂರ್ನಿಯಲ್ಲಿ ಉತ್ತಮ ಪ್ರದರ್ಶನ ನೀಡಿದ್ದು, ಅದೇ ಪ್ರದರ್ಶನವನ್ನು ಟೆಸ್ಟ್ನಲ್ಲಿ ಮುಂದುವರೆಸುವ ಆಸೆ ಇದೆ ಎಂದಿದ್ದಾರೆ. ಬಿಳಿ ಜರ್ಸಿ ತೊಟ್ಟು ಮೈದಾನಕ್ಕಿಳಿಯುವುದೇ ದೊಡ್ಡ ಸಂತೋಷದ ವಿಚಾರ. ತಂಡದ ಗೆಲುವಿನಲ್ಲಿ ನನ್ನ ಕಾಣಿಕೆ ಇದ್ದರೆ ಅಷ್ಟೆ ಸಾಕು ಎಂದು ಹೇಳಿದ್ರು.
ಇಲ್ಲಿಯವರೆಗೆ ಒಟ್ಟು 12 ಟೆಸ್ಟ್ ಪಂದ್ಯಗಳನ್ನು ಆಡಿರುವ ಅವರು 62 ವಿಕೆಟ್ ಕಬಳಿಸಿದ್ದು, 5 ಬಾರಿ 5 ವಿಕೆಟ್ಗಳ ಗುಚ್ಚ ಪಡೆದಿದ್ದಾರೆ.
