ಹೈದರಾಬಾದ್: ಡೆಡ್ಲಿ ಯಾರ್ಕರ್ಗಳ ಮೂಲಕ ಬ್ಯಾಟ್ಸ್ಮನ್ಗಳ ಎದೆಯಲ್ಲಿ ನಡುಕ ಹುಟ್ಟಿಸುವ ವಿಶ್ವದ ನಂಬರ್ ಒನ್ ಬೌಲರ್ ಜಸ್ಪ್ರೀತ್ ಬುಮ್ರಾ ಮೈದಾನಕ್ಕೆ ಕಾಲಿಟ್ಟರೆ ಎದುರಾಳಿ ತಂಡ ಸೋಲಿನ ಸುಳಿಗೆ ಸಿಲುಕಿಕೊಳ್ಳುವ ಭಯದಲ್ಲಿ ಮುಳುಗಿ ಹೋಗುತ್ತದೆ. ಆದರೆ ಇವರ ಬಗ್ಗೆ ಪಾಕಿಸ್ತಾನದ ಮಾಜಿ ಆಲ್ರೌಂಡರ್ ಹಗುರವಾಗಿ ಮಾತನಾಡಿದ್ದಾರೆ.
40 ವರ್ಷದ ಪಾಕಿಸ್ತಾನದ ಮಾಜಿ ಕ್ರಿಕೆಟರ್ ಅಬ್ದುಲ್ ರಜಾಕ್ ಕ್ರಿಕೆಟ್ ಪಾಕಿಸ್ತಾನಕ್ಕೆ ನೀಡಿದ್ದ ಸಂದರ್ಶನವೊಂದರಲ್ಲಿ ತಾವು ವಿಶ್ವದ ನಂಬರ್ 1 ಬೌಲರ್ಗಳಾಗಿದ್ದ ಗ್ಲೇನ್ ಮೆಕ್ಗ್ರಾಥ್, ವಾಸೀಂ ಅಕ್ರಂ, ಶೋಯೆಬ್ ಅಖ್ತರ್ನಂತಹ ಬೌಲರ್ಗಳನ್ನ ಸುಲಭವಾಗಿ ಎದುರಿಸಿದ್ದೇನೆ. ಇದೀಗ ಬುಮ್ರಾ ಒರ್ವ ಬೇಬಿ ಬೌಲರ್ ಅವರನ್ನ ಸುಲಭವಾಗಿ ಎದುರಿಸುವ ಸಾಮರ್ಥ್ಯ ನನ್ನ ಬಳಿ ಇದೆ ಎಂದು ಹೇಳಿದ್ದಾರೆ.
ಒಂದು ವೇಳೆ ನಾನು ಬ್ಯಾಟಿಂಗ್ ಮಾಡಲು ಮೈದಾನಕ್ಕಿಳಿದಾಗ ಬುಮ್ರಾ ಬೌಲಿಂಗ್ ಮಾಡಲು ಬಂದರೆ ಅವರು ಮೇಲೆ ಒತ್ತಡ ಇರುತ್ತದೆ ಎಂದು ತಿಳಿಸಿದ್ದಾರೆ. ಜತೆಗೆ ಸದ್ಯದ ವಿಶ್ವ ಕ್ರಿಕೆಟ್ನಲ್ಲಿ ಬುಮ್ರಾ ಓರ್ವ ಅದ್ಭುತ ಬೌಲರ್ ಎಂಬುದಕ್ಕೆ ನನ್ನ ಒಪ್ಪಿಗೆ ಇಲ್ಲ ಎಂದಿರುವ ಪಾಕ್ ಮಾಜಿ ಪ್ಲೇಯರ್, ಅನೇಕ ಬೌಲರ್ಸ್ ಉತ್ತಮವಾಗಿ ಬೌಲಿಂಗ್ ಮಾಡುವ ಸಾಮರ್ಥ್ಯ ಹೊಂದಿದ್ದಾರೆ ಎಂದು ತಿಳಿಸಿದ್ದಾರೆ
ಇದೇ ವೇಳೆ ಕ್ಯಾಪ್ಟನ್ ವಿರಾಟ್ ಕೊಹ್ಲಿ ಬಗ್ಗೆ ಮಾತನಾಡಿರುವ ರಜಾಕ್, ಸಚಿನ್ ತೆಂಡೂಲ್ಕರ್ಗೆ ಕೊಹ್ಲಿ ಹೋಲಿಕೆ ಮಾಡುವುದು ಸರಿಯಲ್ಲ. 1992ರಿಂದ 2007ರ ನಡುವಿನ ಅವಧಿಯಲ್ಲಿ ಅದ್ಭುತ ಕ್ರಿಕೆಟ್ ಬ್ಯಾಟ್ಸ್ಮನ್ಗಳಿದ್ದರು ಎಂದು ತಿಳಿಸಿದ್ದಾರೆ.
