ನವದೆಹಲಿ: ಐಪಿಎಲ್ ವೇಳಾಪಟ್ಟಿಯನ್ನು ನಿರ್ಧರಿಸಲು ಇನ್ನು 7-10 ದಿನಗಳಲ್ಲಿ ಸಭೆ ನಡೆಸಲಿದ್ದೇವೆ ಎಂದು ಐಪಿಎಲ್ ಗವರ್ನಿಂಗ್ ಕೌನ್ಸಿಲ್ ಅಧ್ಯಕ್ಷ ಬ್ರಿಜೇಶ್ ಪಟೇಲ್ ಮಂಗಳವಾರ ಖಚಿತಪಡಿಸಿದ್ದಾರೆ.
ಐಸಿಸಿ ಸೋಮವಾರ ಆಸ್ಟ್ರೇಲಿಯಾದಲ್ಲಿ ನಡೆಯಬೇಕಿದ್ದ ಟಿ - 20 ವಿಶ್ವಕಪ್ ಟೂರ್ನಿ ಮುಂದೂಡಿದ್ದರಿಂದ ಐಪಿಎಲ್ ನಡೆಯುವುದು ಖಚಿತವಾಗಿದೆ. ಇದೀಗ ಬಿಸಿಸಿಐ 2020ರ ಐಪಿಎಲ್ ಆವೃತ್ತಿ ನಡೆಸಲು ಕೇಂದ್ರ ಸರ್ಕಾರದ ಅನುಮತಿ ಪಡೆಯಲು ಇನ್ನು 7-10 ದಿನಗಳಲ್ಲಿ ಭೇಟಿ ಮಾಡಲಿದೆ ಎಂದು ಅವರು ತಿಳಿಸಿದ್ದಾರೆ.
" ಆಡಳಿತ ಮಂಡಳಿ ಸಭೆಯನ್ನು 7-10 ದಿನಗಳಲ್ಲಿ ನಡೆಸಲು ನಿರೀಕ್ಷಿಸಲಾಗಿದೆ. ಈ ವೇಳೆ, ಟೂರ್ನಮೆಂಟ್ನ ವೇಳಾಪಟ್ಟಿ ಕುರಿತು ಚರ್ಚೆಗಳು ನಡೆಯಲಿದ್ದು, ಕಾರ್ಯಾಚರಣೆಯ ಅಂಶಗಳ ಬಗ್ಗೆಯೂ ಚರ್ಚಿಸಲಿದ್ದೇವೆ" ಎಂದು ಪಟೇಲ್ ಮಾಧ್ಯಮಕ್ಕೆ ತಿಳಿಸಿದ್ದಾರೆ.
ನಾವು ಸೆಪ್ಟೆಂಬರ್ವರೆಗೆ ಕೊರೊನಾ ವೈರಸ್ ಪರಿಸ್ಥಿತಿಯನ್ನು ನೋಡುತ್ತೇವೆ. ನಂತರ ನಾವು ಭಾರತದಲ್ಲಿ ಅಥವಾ ಯುಎಇಯಲ್ಲಿ ಟೂರ್ನಮೆಂಟ್ ಆಯೋಜನೆ ನಡೆಸಬೇಕಾ ಎಂಬುದರ ಬಗ್ಗೆ ನಿರ್ಧರಿಸುತ್ತೇವೆ. ಟೂರ್ನಿ ಆಯೋಜಿಸಲು ಸರ್ಕಾರದ ಅನುಮತಿ ಕಡ್ಡಾಯವಾಗಿ ತೆಗೆದುಕೊಳ್ಳಬೇಕಿದೆ ಎಂದು ಅವರು ತಿಳಿಸಿದ್ದಾರೆ.
ಮಾರ್ಚ್ 29 ರಿಂದ ನಡೆಯಬೇಕಿದ್ದ 13ನೇ ಅವೃತ್ತಿಯ ಐಪಿಎಲ್ ಕೋವಿಡ್ 19 ಭೀತಿ ಕಾರಣ ಅನಿರ್ದಾಷ್ಟವಧಿಗೆ ಮುಂದೂಡಲ್ಪಟ್ಟಿತ್ತು. ಇದೀಗ ಟಿ-20 ವಿಶ್ವಕಪ್ ಮುಂದೂಡಲ್ಪಟ್ಟಿರುವುದರಿಂದ ಐಪಿಎಲ್ಗೆ ಗ್ರೀನ್ ಸಿಗ್ನಲ್ ಸಿಕ್ಕಿದಂತಾಗಿದೆ.
