ಅಬುಧಾಬಿ: ಯುಎಇನಲ್ಲಿ ನಡೆಯುತ್ತಿರುವ ಇಂಡಿಯನ್ ಪ್ರೀಮಿಯರ್ ಲೀಗ್ನಲ್ಲಿ ಇತ್ತೀಚೆಗೆ ಸ್ಪಿನ್ನರ್ ಸುನೀಲ್ ನರೈನ್ ಬೌಲಿಂಗ್ ಶೈಲಿಯನ್ನು ಅನುಮಾನಾಸ್ಪದ ಎಂದು ವರದಿ ಮಾಡಿ, ಎಚ್ಚರಿಕೆ ನೀಡಿರುವುದಕ್ಕೆ ಕೋಲ್ಕತ್ತಾ ನೈಟ್ ಫ್ರಾಂಚೈಸಿ ಆಶ್ಚರ್ಯ ವ್ಯಕ್ತಪಡಿಸಿದೆ.
ಶನಿವಾರ ಕಿಂಗ್ಸ್ ಇಲೆವೆನ್ ಪಂಜಾನ್ ವಿರುದ್ಧದ ಪಂದ್ಯದ ವೇಳೆ ಪಂದ್ಯದ ಅಧಿಕಾರಿಗಳು ನರೈನ್ ಬೌಲಿಂಗ್ ಶೈಲಿಯ ವಿರುದ್ಧ ವರದಿ ಮಾಡಿದ್ದರು. ಆದರೆ, ಅಧಿಕಾರಿಗಳ ಈ ನಿರ್ಧಾರಕ್ಕೆ ಕೆಕೆಆರ್ ಆಶ್ಚರ್ಯವ್ಯಕ್ತಪಡಿಸಿದೆ ಎಂದು ಹೇಳಿಕೆ ಬಿಡುಗಡೆ ಮಾಡಿದೆ.
"ಸುನೀಲ್ ನರೈನ್ ವಿರುದ್ಧ ನೀಡಲಾಗಿರುವ ಅನುಮಾನಸ್ಪದ ಬೌಲಿಂಗ್ ಶೈಲಿ ವರದಿಯಿಂದ ಫ್ರಾಂಚೈಸಿಗೆ ಅಚ್ಚರಿ ಉಂಟಾಗಿದೆ. ಏಕೆಂದರೆ ನರೈನ್ 2012ರಿಂದ ಇಲ್ಲಿಯವರೆಗೆ 112 ಐಪಿಎಲ್ ಪಂದ್ಯಗಳನ್ನಾಡಿದ್ದಾರೆ. ಹಾಗೂ ಹಿಂದೊಮ್ಮೆ 2014ರಲ್ಲಿ ಅನುಮಾನಸ್ಪದ ಬೌಲಿಂಗ್ ಶೈಲಿ ಎಂದು ವರದಿ ಪಡೆದ ನಂತರ SRASSC ಮತ್ತು ಐಸಿಸಿ ಒಳಪಡಿಸಿದ ಪರೀಕ್ಷೆಯಲ್ಲಿ ಉತ್ತೀರ್ಣರಾಗಿದ್ದಾರೆ. ನಂತರ 2015 ರಿಂದ ಇಲ್ಲಿಯವರೆಗೆ 68 ಪಂದ್ಯಗಳನ್ನಾಡಿದ್ದಾರೆ. ಇದೀಗ ಮತ್ತೆ ಅವರ ಬೌಲಿಂಗ್ ಶೈಲಿಯನ್ನು ಶಂಕಿಸಿರುವುದು ನಿಜಕ್ಕೂ ನರೈನ್ಗೆ ಮತ್ತು ಫ್ರಾಂಚೈಸಿಗೆ ಆಶ್ಚರ್ಯವನ್ನುಂಟುಮಾಡಿದೆ" ಎಂದು ಕೆಕೆಆರ್ ತನ್ನ ಹೇಳಿಕೆಯಲ್ಲಿ ತಿಳಿಸಿದೆ.
ಇದಲ್ಲದೆ, ಈ ಋತುವಿನಲ್ಲೂ ನರೈನ್ 6ನೇ ಪಂದ್ಯವನ್ನಾಡುತ್ತಿದ್ದಾರೆ. ಇದುವರೆಗೆ ಪಂದ್ಯದ ಅಧಿಕಾರಿಗಳು ಔಪಚಾರಿಕವಾಗಿ ಮತ್ತು ಅನೌಪಚಾರಿಕವಾಗಿ ಯಾವುದೇ ಕಳವಳ ವ್ಯಕ್ತಪಡಿಸಲಿಲ್ಲ ಎಂದು ಹೇಳಿಕೆಯಲ್ಲಿ ಸೇರಿಸಿದೆ.
32 ವರ್ಷದ ಆಟಗಾರ 2014ರ ಚಾಂಪಿಯನ್ಸ್ ಲೀಗ್ ಟಿ- 20 ವೇಳೆ ಕೆಕೆಆರ್ ಪರ ಆಡುತ್ತಿದ್ದಾಗಲೂ ಅವರು ತಮ್ಮ ಬೌಲಿಂಗ್ ಶೈಲಿ ಅಕ್ರಮ ಎಂದು ವರದಿ ಪಡೆದಿದ್ದರು.
"ಆದರೂ, ಫ್ರ್ಯಾಂಚೈಸಿ ಐಪಿಎಲ್ ನರೈನ್ ಅವರ ಬೌಲಿಂಗ್ ಕ್ರಮ ಪರಿಶೀಲಿಸಲು ಜಾರಿಗೆ ತಂದಿರುವ ಪ್ರಕ್ರಿಯೆಯನ್ನು ಗೌರವಿಸುವುದಾಗಿ ಹೇಳಿದೆ. ಮತ್ತು ಈ ವಿಷಯದಲ್ಲಿ ಮಂಡಳಿಯೊಂದಿಗೆ ನಿಕಟವಾಗಿ ಕಾರ್ಯನಿರ್ವಹಿಸುವುದಾಗಿ" ಹೇಳಿಕೊಂಡಿದೆ.
ಪ್ರಸ್ತುತ ನರೈನ್ಗೆ ಬೌಲಿಂಗ್ ಮಾಡಲು ಅವಕಾಶ ಕಲ್ಪಿಸಲಾಗಿದೆ. ಏನಾದರೂ 2ನೇ ಸಲ ಶಂಕಾಸ್ಪದ ಶೈಲಿ ಎಂದು ವರದಿ ಪಡೆದರೆ, ಅವರೂ ಟೂರ್ನಿಯಿಂದಲೇ ಸಸ್ಪೆಂಡ್ ಆಗಲಿದ್ದಾರೆ. ನಂತರ ಬಿಸಿಸಿಐ ಅನುಮಾನಾಸ್ಪದ ಬೌಲಿಂಗ್ ಆ್ಯಕ್ಷನ್ ಕಮಿಟಿ ಪರೀಕ್ಷಿಸಿ ತೀರ್ಪು ನೀಡುವವರೆಗೆ ಅವರು ಬೌಲಿಂಗ್ ಮಾಡಲು ಅನರ್ಹರಾಗಿರುತ್ತಾರೆ. ಆದರೆ, ಪ್ರಸ್ತುತ ಸ್ಥಳದಲ್ಲಿ ಕಮಿಟಿ ಇಲ್ಲವಾದ್ದರಿಂದ ನರೈನ್ಗೆ ಕೇವಲ ಎಚ್ಚರಿಕೆ ನೀಡಲಾಗಿದೆ.
