ಅಬುಧಾಬಿ : ಮಂಗಳವಾರ ಮುಂಬೈ ಇಂಡಿಯನ್ಸ್ ಮತ್ತು ಡೆಲ್ಲಿ ಕ್ಯಾಪಿಟಲ್ಸ್ ತಂಡಗಳು 13ನೇ ಆವೃತ್ತಿಯ ಐಪಿಎಲ್ನಲ್ಲಿ ಸೆಣೆಸಾಡಲಿವೆ. ಮುಂಬೈಗೆ ಇಂದು 6ನೇ ಫೈನಲ್. ಆದರೆ, ಡೆಲ್ಲಿಗೆ ಇದು ಪ್ರಥಮ ಫೈನಲ್ ಪಂದ್ಯವಾಗಿದೆ.
ವಿಶ್ವದಲ್ಲೇ ಶ್ರೇಷ್ಠ ಲೀಗ್ ಎಂದು ಹೆಸರಾಗಿರುವ ಐಪಿಎಲ್ ಕುರಿತು ಮಾತನಾಡಿರುವ ಮುಂಬೈ ತಂಡದ ಆಲ್ರೌಂಡರ್ ಕೀರನ್ ಪೊಲಾರ್ಡ್, ವಿಶ್ವಕಪ್ ಫೈನಲ್ ಹೊರೆತುಪಡಿಸಿದ್ರೆ ಐಪಿಎಲ್ ಫೈನಲ್ ಅತ್ಯಂತ ಆಕರ್ಷಣೀಯ ಮತ್ತು ಗಮನ ಸೆಳೆಯುತ್ತದೆ ಎಂದು ಅಭಿಪ್ರಾಯಪಟ್ಟಿದ್ದಾರೆ.
"ಯಾವಾಗಲೂ ಫೈನಲ್ ಹೆಸರಿನ ಪಂದ್ಯಗಳು ಒತ್ತಡದಿಂದ ಕೂಡಿರುತ್ತವೆ. ಪ್ರತಿಯೊಬ್ಬರೂ ಒತ್ತಡ ಎದುರಿಸುತ್ತಾರೆ. ನೀವು ಗೆಲ್ಲಬೇಕಾದ್ರೆ ಒಂದೂ ತಪ್ಪುಗಳನ್ನು ಮಾಡಬಾರದು. ಆದರೆ, ದಿನದ ಅಂತ್ಯದಲ್ಲಿ ನೀವು ಫೈನಲ್ ಅನ್ನು ಕೂಡ ಸಾಮಾನ್ಯ ಪಂದ್ಯದ ರೀತಿ ತೆಗೆದುಕೊಳ್ಳಬೇಕಾಗುತ್ತದೆ.
ನೀವು ಮೈದಾನಕ್ಕೆ ಹೋಗಿ ಅಲ್ಲಿನ ವಾತಾವರಣಕ್ಕೆ ಹೊಂದಿಕೊಂಡು ನೀವಾಗಿಯೇ ಆನಂದಿಸಬೇಕು" ಎಂದು ಮುಂಬೈ ಇಂಡಿಯನ್ಸ್ ತನ್ನ ಅಧಿಕೃತ ಟ್ವಿಟರ್ನಲ್ಲಿ ಶೇರ್ ಮಾಡಿರುವ ವಿಡಿಯೋದಲ್ಲಿ ಪೊಲಾರ್ಡ್ ಹೇಳಿದ್ದಾರೆ.
"ನಿಸ್ಸಂಶಯವಾಗಿ, ಫೈನಲ್‌ನಲ್ಲಿ ಅಭಿಮಾನಿಗಳ ಸಮೂಹವಿರುವುದಿಲ್ಲ. ಆದರೆ, ಅದರ ಪ್ರಮಾಣವನ್ನು ಆನಂದಿಸಬೇಕು. ಯಾಕೆಂದರೆ, ಇದು ಐಪಿಎಲ್ ಫೈನಲ್, ವಿಶ್ವಕಪ್ ಫೈನಲ್ ನಂತರದ ಅತ್ಯಂತ ದೊಡ್ಡ ವಿಷಯ" ಎಂದು ಪೊಲಾರ್ಡ್ ಹೇಳಿದ್ದಾರೆ.
ಈಗಾಗಲೇ ಕ್ವಾಲಿಫೈಯರ್ನಲ್ಲಿ ಡೆಲ್ಲಿ ಮಣಿಸಿರುವ ವಿಶ್ವಾಸದಲ್ಲಿರುವ ಮುಂಬೈ ಈ ಪಂದ್ಯ ಗೆಲ್ಲುವ ನೆಚ್ಚಿನ ತಂಡವಾಗಿದೆ. ಮುಂಬೈ 2013, 2015, 2017 ಹಾಗೂ 2019ರಲ್ಲಿ ಚಾಂಪಿಯನ್ ಪಟ್ಟಕ್ಕೇರಿದೆ.
ಡೆಲ್ಲಿ ಇದೇ ಮೊದಲ ಬಾರಿಗೆ ಫೈನಲ್ ಪ್ರವೇಶಿಸಿದ್ದರೂ ಸನ್ರೈಸರ್ಸ್ನಂತಹ ಬಲಿಷ್ಠ ತಂಡವನ್ನು ಮಣಿಸಿರುವುದರಿಂದ ಚೊಚ್ಚಲ ಟ್ರೋಫಿ ಎತ್ತಿ ಹಿಡಿಯುವ ಸಾಮರ್ಥ್ಯವನ್ನು ಹೊಂದಿದೆ.
