ಶಾರ್ಜಾ: ಒಂದೇ ಓವರ್ನಲ್ಲಿ 5 ಸಿಕ್ಸರ್ ಸಿಡಿಸಿ ಪಂದ್ಯದ ಗತಿಯನ್ನೇ ಬದಲಿಸಿದ ರಾಜಸ್ಥಾನ್ ರಾಯಲ್ಸ್ ತಂಡದ ಆಲ್ರೌಂಡರ್, ತಮ್ಮ ಸ್ಫೋಟಕ ಬ್ಯಾಟಿಂಗ್ ಹಿಂದಿನ ರಹಸ್ಯವನ್ನು ಬಿಚ್ಚಿಟ್ಟಿದ್ದಾರೆ.
ಮೊದಲ 23 ಎಸೆತಗಳಲ್ಲಿ ಕೇವಲ 17 ರನ್ಗಳಿಸಿದ್ದ ತೆವಾಟಿಯಾ ರಾಜಸ್ಥಾನ ತಂಡದ ಸೋಲಿಗೆ ನೇರ ಕಾರಣವಾಗಹುದು ಎಂದು ಎಲ್ಲರ ಅಭಿಪ್ರಾಯವಾಗಿತ್ತು. ಆದರೆ, ಅವರು ಇನ್ನಿಂಗ್ಸ್ನ 18ನೇ ಓವರ್ನಲ್ಲಿ 5 ಸಿಕ್ಸರ್ ಸಿಡಿಸಿ ಪಂದ್ಯದ ಗತಿಯನ್ನೇ ಬದಲಿಸಿದರು. ತೆವಾಟಿಯಾ ಕೊನೆಯ 8 ಎಸೆತಗಳಲ್ಲಿ 7 ಸಿಕ್ಸರ್ ಸಹಿತ 36 ರನ್ ಗಳಿಸುವ ಮೂಲಕ ರಾಯಲ್ಸ್ಗೆ ಗೆಲುವು ತಂದುಕೊಟ್ಟರು.
ಅಲ್ಲದೇ ಕ್ರಿಸ್ ಗೇಲ್ ನಂತರ ಐಪಿಎಲ್ನಲ್ಲಿ ಒಂದೇ ಓವರ್ನಲ್ಲಿ 5 ಸಿಕ್ಸರ್ ಸಿಡಿಸಿದ ಬ್ಯಾಟ್ಸ್ಮನ್ ಎಂಬ ದಾಖಲೆಗೆ ಪಾತ್ರರಾದರು. ಅವರು ಈ ಸ್ಫೋಟಕ ಬ್ಯಾಟಿಂಗ್ ಪ್ರದರ್ಶನಕ್ಕೆ ತಂಡ ಹಾಗೂ ನಾಯಕ ಇಟ್ಟಿದ್ದ ನಂಬಿಕೆಯೇ ಕಾರಣ ಎಂದಿದ್ದಾರೆ.
ನಾನು ನೆಟ್ನಲ್ಲಿ ಚೆನ್ನಾಗಿ ಚೆಂಡನ್ನು ಬಾರಿಸುವುದನ್ನ ನೋಡಿದ್ದ ಮ್ಯಾನೇಜ್ಮೆಂಟ್ ಹಾಗೂ ನಾಯಕ ಸ್ಮಿತ್ ಅಪಾರ ನಂಬಿಕೆಯಿಟ್ಟಿತ್ತು. ಆ ಪರಿಶುದ್ಧ ನಂಬಿಕೆಯನ್ನು ಉಳಿಸಿಕೊಳ್ಳುವ ಮನೋಬಲವೇ ಕಿಂಗ್ಸ್ ಇಲೆವೆನ್ ಪಂಜಾಬ್ ವಿರುದ್ಧ ನನ್ನ ಪ್ರದರ್ಶನಕ್ಕೆ ಕಾರಣವಾಯಿತು ಎಂದು ತೆವಾಟಿಯಾ ಹೇಳಿದ್ದಾರೆ.
ನನ್ನನ್ನು ಅವರೆಲ್ಲರೂ(ಮ್ಯಾನೇಜ್ ಮೆಂಟ್ ಹಾಗೂ ಸ್ಮಿತ್) ಗೇಮ್ಚೇಂಜರ್ ಎಂದು ಕರೆದಿದ್ದರು. ಇಡೀ ತಂಡವೇ ನನ್ನ ಮೇಲೆ ಸಾಕಷ್ಟು ನಂಬಿಕೆಯಿಟ್ಟಿತ್ತು. ಹಾಗಾಗಿ ಅದನ್ನು ಉಳಿಸಿಕೊಳ್ಳಬೇಕಾದದ್ದು ನನ್ನ ಕರ್ತವ್ಯವಾಗಿತ್ತು. ತಂಡ ಹಾಗೂ ನಾಯಕನ ಬೆಂಬಲ ಸಿಕ್ಕಿದರೆ ನಿಮಗೆ ಅರ್ಧ ಯಶಸ್ಸು ಸಿಕ್ಕಿದಂತಾಗುತ್ತದೆ. ಸ್ಮಿತ್ ಅವರಂತಹ ನಾಯಕನಿದ್ದರೆ ಅರ್ಧ ಕೆಲಸ ಆದಂತೆಯೇ . ನಾನು ಇಂತಹ ತಂಡದಲ್ಲಿ ಭಾಗವಾಗಿರುವುದಕ್ಕೆ ಹೆಮ್ಮೆ ಪಡುತ್ತೇನೆ ಎಂದು ರಾಹುಲ್ ತೆವಾಟಿಯಾ ತಿಳಿಸಿದ್ದಾರೆ.
ಭಾನುವಾರದ ಪಂದ್ಯದಲ್ಲಿ ಮೊದಲು ಬ್ಯಾಟಿಂಗ್ ನಡೆಸಿದ್ದ ಕಿಂಗ್ಸ್ ಇಲೆವೆನ್ ಪಂಜಾಬ್ ತಂಡ 20 ಓವರ್ಗಳಲ್ಲಿ 2 ವಿಕೆಟ್ ನಷ್ಟಕ್ಕೆ 223 ರನ್ಗಳಿಸಿತ್ತು, ಅಗರ್ವಾಲ್ 106 ಹಾಗೂ ರಾಹುಲ್ 69 ರನ್ಗಳಿಸಿದ್ದರು. 224 ರನ್ಗಳ ಬೃಹತ್ ಮೊತ್ತ ಬೆನ್ನಟ್ಟಿದ್ದ ರಾಜಸ್ಥಾನ ತಂಡ ನಾಯಕ ಸ್ಮಿತ್ 50, ಸಾಮ್ಸನ್ 85 ಹಾಗೂ ತೆವಾಟಿಯ 53 ರನ್ಗಳ ನೆರವಿನಿಂದ ಇನ್ನು ಮೂರು ಎಸೆತಗಳಿರುವಂತೆ ದಾಖಲೆಯ ಮೊತ್ತವನ್ನು ಬೆನ್ನಟ್ಟಿ ಜಯ ಸಾಧಿಸಿತು.
