ನವದೆಹಲಿ: ಪ್ರಸಕ್ತ ಸಾಲಿನ ಇಂಡಿಯನ್ ಪ್ರೀಮಿಯರ್ ಲೀಗ್ ದಿನಾಂಕ ಪ್ರಕಟವಾಗಿದ್ದು, ಸೆಪ್ಟಂಬರ್ನಲ್ಲಿ ಶುರುವಾಗಿ ನವೆಂಬರ್ನಲ್ಲಿ ಮುಕ್ತಾಯಗೊಳ್ಳಲಿದೆ ಎಂದು ಬಿಸಿಸಿಐ ಮೂಲಗಳು ತಿಳಿಸಿವೆ.
ನವೆಂಬರ್-ಡಿಸೆಂಬರ್ ತಿಂಗಳಲ್ಲಿ ನಡೆಯಬೇಕಾಗಿದ್ದ ಟಿ-20 ವಿಶ್ವಕಪ್ ಟೂರ್ನಮೆಂಟ್ ಮುಂದೂಡಿಕೆಯಾಗಿದ್ದು, ಹೀಗಾಗಿ ವಿದೇಶದಲ್ಲಿ ಐಪಿಎಲ್ ಟೂರ್ನಿ ನಡೆಸಲು ನಿರ್ಧರಿಸಲಾಗಿತ್ತು. ಅದರಂತೆ ದುಬೈನಲ್ಲಿ ಪ್ರಸಕ್ತ ಸಾಲಿನ ಐಪಿಎಲ್ ನಡೆಸಲು ಈಗಾಗಲೇ ಬಹುತೇಕ ತೀರ್ಮಾನ ಕೈಗೊಳ್ಳಲಾಗಿದೆ ಎಂದು ಬ್ರಿಜೇಶ್ ಪಟೇಲ್ ಈ ಹಿಂದೆ ತಿಳಿಸಿದ್ದರು.
ಪ್ರಸಕ್ತ ವರ್ಷದ ಐಪಿಎಲ್ ಮಾರ್ಚ್ 29ರಿಂದ ಆರಂಭಗೊಳ್ಳಬೇಕಾಗಿತ್ತು. ಆದರೆ ಕೊರೊನಾ ಕಾರಣ ಮುಂದೂಡಿಕೆ ಮಾಡಲಾಗಿತ್ತು. ಇಲ್ಲಿಯವರೆಗೆ ವೇಳಾಪಟ್ಟಿ ರಿಲೀಸ್ ಆಗಿಲ್ಲ. ಆದರೆ ವಿದೇಶದಲ್ಲಿ ನಡೆಸಲು ಕೊನೆಯದಾಗಿ ನಿರ್ಧರಿಸಿ, ಅಂತಿಮ ನಿರ್ಧಾರ ಹೊರಹಾಕಲು ಕೇಂದ್ರ ಸರ್ಕಾರದ ಅನುಮತಿಗೋಸ್ಕರ ಕಾಯಲಾಗುತ್ತಿದೆ ಎಂದಿದ್ದರು.
ಈಗ ಸೆಪ್ಟಂಬರ್ 19ರಂದು ಐಪಿಎಲ್ ಶುರುವಾಗಲಿದ್ದು, ಫೈನಲ್ ಪಂದ್ಯ ನವೆಂಬರ್ 8ರಂದು ನಡೆಯಲಿದೆ. ವಿದೇಶಿ ನೆಲದಲ್ಲಿ 51 ದಿನಗಳ ಕಾಲ ಐಪಿಎಲ್ ಮನರಂಜಿಸಲಿದೆ ಎಂದು ಬಿಸಿಸಿಐ ಮೂಲಗಳು ನ್ಯೂಸ್ ಏಜೆನ್ಸಿಗಳಿಗೆ ತಿಳಿಸಿವೆ. ಆದ್ರೆ ಐಪಿಎಲ್ ದಿನಾಂಕದ ಬಗ್ಗೆ ಬಿಸಿಸಿಐನಿಂದ ಯಾವುದೇ ಅಧಿಕೃತ ಮಾಹಿತಿ ಪ್ರಕಟವಾಗಿಲ್ಲ.
