ಲಾಹೋರ್ : 2ನೇ ಟಿ20 ಪಂದ್ಯದ ಚೇಸಿಂಗ್ ವೇಳೆ ಪಾಕಿಸ್ತಾನ ತಂಡದ ಮುಖ್ಯ ಕೋಚ್ ಹಾಗೂ ಆಯ್ಕೆ ಸಮಿತಿ ಮುಖ್ಯಸ್ಥ ಮಿಸ್ಬಾ ಉಲ್ ತಮ್ಮ ತಲೆ ಮೇಲೆ ಕೈಯಿಟ್ಟು ಬೇಸರದಿಂದ ಕುಳಿತಿರೋದನ್ನು ಟೀಕಿಸಿರುವ ಮಾಜಿ ನಾಯಕ ಇಂಜಮಾಮ್ ಉಲ್ ಹಕ್, ಈ ವರ್ತನೆ ಸರಿಯಾದದ್ದಲ್ಲ ಎಂದಿದ್ದಾರೆ.
ಮೊದಲ ಟಿ20 ಪಂದ್ಯ ಮಳೆಗೆ ರದ್ದಾದರೆ, ಎರಡನೇ ಟಿ20 ಪಂದ್ಯದಲ್ಲಿ ಪಾಕಿಸ್ತಾನ ತಂಡ 195 ರನ್ಗಳಿಸಿಯೂ 5 ವಿಕೆಟ್ಗಳಿಂದ ಸೋಲು ಕಂಡಿತ್ತು. ಇಂಗ್ಲೆಂಡ್ ನಾಯಕ ಮಾರ್ಗನ್ ಹಾಗೂ ಅನುಭವಿ ಬ್ಯಾಟ್ಸ್ಮನ್ ಡೇವಿಡ್ ಮಲನ್ ಅರ್ಧಶತಕ ಸಿಡಿಸಿ ಪಂದ್ಯ ಗೆಲ್ಲಲು ಪ್ರಮುಖ ಪಾತ್ರವಹಿಸಿದ್ದರು. ಆದರೆ, ಈ ಪಂದ್ಯದ ವೇಳೆ ಮಿಸ್ಬಾ ಉಲ್ ಹಕ್ ತಲೆ ಮೇಲೆ ಕೈಯಿಟ್ಟು ಕುಳಿತಿದ್ದರು. ಇದನ್ನು ವಾಸಿಂ ಅಕ್ರಮ್ ಹಾಗೂ ಇಂಜಮಾಮ್ ಉಲ್ಹಕ್ ಟೀಕಿಸಿದ್ದಾರೆ.
ಇಂಗ್ಲೆಂಡ್ ಇನ್ನಿಂಗ್ಸ್ನ 5ನೇ ಓವರ್ ವೇಳೆಯಲ್ಲಿ, ಪಾಕ್ ತಂಡ ಪವರ್ ಪ್ಲೇನಲ್ಲಿ 40-45 ರನ್ ಬಿಟ್ಟುಕೊಟ್ಟಿತ್ತು. ಈ ವೇಳೆ ಕ್ಯಾಮೆರಾ ತಲೆ ಮೇಲೆ ಕೈಯಿಟ್ಟು ಕುಳಿತಿದ್ದ ಮಿಸ್ಬಾರನ್ನು ತೋರಿಸಿತ್ತು. ಇದು ನಿಜಕ್ಕೂ ತಂಡಕ್ಕೆ ಕೆಟ್ಟ ಸಂದೇಶ ತೋರುತ್ತಿತ್ತು ಎಂದು ಇಂಜಮಾಮ್ ಉಲ್ ಹಕ್ ತಮ್ಮ ಯೂಟ್ಯೂಬ್ ಚಾನೆಲ್ನಲ್ಲಿ ತಿಳಿಸಿದ್ದಾರೆ.
ಆ ಸಂದರ್ಭದಲ್ಲಿ ಇನ್ನೂ ಇಂಗ್ಲೆಂಡ್ಗೆ ಗೆಲ್ಲಲು 155 ರಿಂದ 160 ರನ್ಗಳ ಅಗತ್ಯವಿತ್ತು. ಪಂದ್ಯ ಯಾರ ಕಡೆಯಾದರೂ ವಾಲಬಹುದಾಗುವ ಸಂಭವವಿತ್ತು. ಆದರೆ, ನೀವು(ಮಿಸ್ಬಾ) ಆ ರೀತಿ ಬೇಸರದಿಂದ ವರ್ತಿಸುವ ಮೂಲಕ ತಂಡಕ್ಕೆ ನೀವು ತಪ್ಪು ಮಾಡಿದ್ದೀರಿ ಎಂಬ ಸಂದೇಶವನ್ನು ಕಳುಹಿಸುತ್ತಿದ್ದೀರಿ. ನೀವು ಆಟದ ಬಗ್ಗೆ ಕ್ರಮವಾದ ಮಾತುಕತೆ ನಡೆಸಿ. ಆದರೆ, ಪಂದ್ಯದ ನಡುವೆ ಆ ರೀತಿ ವರ್ತಿಸುವುದರಿಂದ ತಂಡದ ಮೇಲೆ ಕೆಟ್ಟ ಪರಿಣಾಮ ಬೀರುತ್ತದೆ ಎಂದು ಅವರು ಟೀಕಿಸಿದ್ದಾರೆ.
ಪಂದ್ಯ ಏನಾದರೂ ಆಗಲಿ. ಆದರೆ, ಡ್ರೆಸ್ಸಿಂಗ್ ರೂಮಿನಲ್ಲಿ ಧನಾತ್ಮಕ ಕಂಪನಗಳು ಮಾತ್ರ ಇರಬೇಕು. ಇದು ಬಹಳ ಮುಖ್ಯ. ನಾವು ಟಿ20 ಚಾಂಪಿಯನ್, ಆ ಮಾದರಿಯಲ್ಲಿ ಸೋತರೆ ನಿಜಕ್ಕೂ ಆತಂಕಕ್ಕೆ ಕಾರಣವಾಗಲಿದೆ ಎಂದು ಹೇಳಿದ್ದಾರೆ.
