ಮುಂಬೈ: ಟೀಂ ಇಂಡಿಯಾದ ನಾಯಕ ವಿರಾಟ್ ಕೊಹ್ಲಿ ಹಾಗೂ ಆರಂಭಿಕ ಆಟಗಾರ ರೋಹಿತ್ ಶರ್ಮಾ ನಡುವೆ ಕೋಲ್ಡ್ ವಾರ್ ನಡೆಯುತ್ತಿದೆ ಎಂಬುದು ಕಳೆದ ಕೆಲ ದಿನಗಳಿಂದ ಸಾಮಾಜಿಕ ಜಾಲತಾಣಗಳಲ್ಲಿ ಸಿಕ್ಕಾಪಟ್ಟೆ ವೈರಲ್ ಆಗಿತ್ತು. ಇದೀಗ ಅದಕ್ಕೆ ಪುಷ್ಠಿ ನೀಡುವ ಹಾಗೇ ಮತ್ತಷ್ಟು ಪುರಾವೆ ಲಭ್ಯವಾಗುತ್ತಿವೆ.
ಕಳೆದ ಕೆಲ ವರ್ಷಗಳಿಂದ ಟೀಂ ಇಂಡಿಯಾದ ಟೆಸ್ಟ್ನಲ್ಲಿ ಅವಕಾಶ ಪಡೆದುಕೊಳ್ಳುವಲ್ಲಿ ವಿಫಲಗೊಂಡಿದ್ದ ರೋಹಿತ್ ಶರ್ಮಾ, ವೆಸ್ಟ್ ಇಂಡೀಸ್ ವಿರುದ್ಧದ ಟೆಸ್ಟ್ ಸರಣಿಗಾಗಿ ಚಾನ್ಸ್ ಗಿಟ್ಟಿಸಿಕೊಂಡಿದ್ದರು. ವಿಶ್ವಕಪ್ನಲ್ಲಿ ಅದ್ಭುತ ಪ್ರದರ್ಶನ ನೀಡಿದ್ದ ರೋಹಿತ್ ಬ್ಯಾಟಿಂಗ್ ವೈಖರಿಗೆ ಫಿದಾ ಆಗಿದ್ದ ಆಯ್ಕೆ ಸಮಿತಿ ಕೊನೆಗೂ ಅವರಿಗೆ ಟೆಸ್ಟ್ನಲ್ಲಿ ಆಡಲು ಅವಕಾಶ ನೀಡಿತ್ತು. ಆದರೆ ಇಂದಿನಿಂದ ಆರಂಭಗೊಂಡಿರುವ ಟೆಸ್ಟ್ನಲ್ಲಿ ಅವರಿಗೆ ಚಾನ್ಸ್ ನೀಡಿಲ್ಲ.
ದೇವರು ನೀಡಿದ್ರೂ ಪೂಜಾರಿ ನೀಡಲಿಲ್ಲ!
ದೇವರು ವರ ನೀಡಿದ್ರೂ ಪೂಜಾರಿ ನೀಡಲಿಲ್ಲ ಎಂಬ ಗಾದೆಯಂತಾಗಿದೆ ರೋಹಿತ್ ಶರ್ಮಾ ಸ್ಥಿತಿ. ಆಯ್ಕೆ ಸಮಿತಿ ಟೆಸ್ಟ್ನಲ್ಲಿ ಭಾಗಿಯಾಗಲು ಚಾನ್ಸ್ ನೀಡಿದ್ದರು. ಕ್ಯಾಪ್ಟನ್ ವಿರಾಟ್ ಕೊಹ್ಲಿ ಮಾತ್ರ ಆಡುವ 11ರ ಬಳಗದಲ್ಲಿ ಅವಕಾಶ ನೀಡಿಲ್ಲ. ಅವರ ಬದಲಿಗೆ ಹನುಮ ವಿಹಾರಿಗೆ ಚಾನ್ಸ್ ನೀಡಿ, ರೋಹಿತ್ ಶರ್ಮಾರನ್ನ ಹೊರಗಿಟ್ಟಿದ್ದಾರೆ. ಇದು ಅವರಿಬ್ಬರ ನಡುವಿನ ಸಂಬಂಧ ಹಳಸಿದ್ದು, ವೈಮನಸ್ಸು ಉಂಟಾಗಿದೆ ಎನ್ನುವುದಕ್ಕೆ ಮತ್ತಷ್ಟು ಪುಷ್ಠಿ ನೀಡಿದೆ.
ಇನ್ನು ವೆಸ್ಟ್ ಇಂಡೀಸ್ ಪ್ರವಾಸಕ್ಕೂ ಮುನ್ನವೇ ಸುದ್ದಿಗೋಷ್ಠಿ ನಡೆಸಿದ್ದ ಟೀಂ ಇಂಡಿಯಾ ಕ್ಯಾಪ್ಟನ್ ವಿರಾಟ್ ಕೊಹ್ಲಿ ತಮ್ಮಿಬ್ಬರ ನಡುವೆ ಯಾವುದೇ ರೀತಿಯ ವೈಮನಸು ಇಲ್ಲ ಎಂಬುದನ್ನ ಹೇಳಿದ್ದರು.
