ಅಹ್ಮದಾಬಾದ್: ಶನಿವಾರ ಇಂಗ್ಲೆಂಡ್ ತಂಡವನ್ನು ಇನ್ನಿಂಗ್ಸ್ ಮತ್ತು 25 ರನ್ಗಳಿಂದ ಮಣಿಸಿದ ಭಾರತ ತಂಡ ತವರಿನಲ್ಲಿ ಸತತ 13 ಟೆಸ್ಟ್ ಸರಣಿ ಗೆಲ್ಲುವ ಮೂಲಕ ವಿಶ್ವದಾಖಲೆಯನ್ನು ಮತ್ತಷ್ಟು ಭದ್ರಪಡಿಸಿಕೊಂಡಿದೆ.
2013ರಲ್ಲಿ ಆಸ್ಟ್ರೇಲಿಯ ತಂಡವನ್ನು 4-0 ಯಲ್ಲಿ ಮಣಿಸುವ ಮೂಲಕ ಭಾರತ ತಂಡ ತವರಿನಲ್ಲಿ ಸರಣಿ ಗೆಲುವಿನ ಅಭಿಯಾನ ಆರಂಭಿಸಿತ್ತು. ಇದೀಗ 8 ವರ್ಷಗಳ ಅವಧಿಯಲ್ಲಿ ಪಾಕಿಸ್ತಾನವನ್ನು ಹೊರತುಪಡಿಸಿ (ಪಾಕ್ ವಿರುದ್ಧ ಆಡಿಲ್ಲ) 8 ದೇಶಗಳ ವಿರುದ್ಧ ಭಾರತ ಸತತ 13 ಟೆಸ್ಟ್ ಸರಣಿಗಳನ್ನು ಗೆದ್ದ ದಾಖಲೆಗೆ ಪಾತ್ರವಾಗಿದೆ. ಈಗಾಗಲೆ ತವರಿನಲ್ಲಿ ಹೆಚ್ಚು ಟೆಸ್ಟ್ ಸರಣಿಯನ್ನು ಗೆದ್ದಿರುವ ವಿಶ್ವದಾಖಲೆಯನ್ನು ಹೊಂದಿರುವ ಭಾರತ ವರ್ಷದಿಂದ ವರ್ಷಕ್ಕೆ ತನ್ನ ದಾಖಲೆಯನ್ನು ವಿಸ್ತರಿಸಿಕೊಳ್ಳುತ್ತಾ ಸಾಗುತ್ತಿದೆ.
ಭಾರತ ತಂಡ ಕೊನೆಯ ಬಾರಿ ತವರಿನಲ್ಲಿ ಸೋಲು ಕಂಡಿರುವುದೆಂದರೆ 2013ರಲ್ಲಿ. ಇಂಗ್ಲೆಂಡ್ ತಂಡ 2-1ರಲ್ಲಿ ಆತಿಥೇಯರಿಗೆ ಶಾಕ್ ನೀಡಿತ್ತು. ಆದರೆ 2016-17ರ ಪ್ರವಾಸದಲ್ಲಿ 4-0ಯಲ್ಲಿ ಮಣಿಸುವ ಮೂಲಕ ಭಾರತ ಸೇಡು ತೀರಿಸಿಕೊಂಡಿತ್ತು.
ಭಾರತವನ್ನು ಹೊರತುಪಡಿಸಿದರೆ ತವರಿನಲ್ಲಿ ಸತತ ಟೆಸ್ಟ್ ಸರಣಿಗಳನ್ನು ಗೆದ್ದ ದಾಖಲೆ ಆಸ್ಟ್ರೇಲಿಯಾ ಹೆಸರಿನಲ್ಲಿದೆ. ಆಸ್ಟ್ರೇಲಿಯಾ 2 ಬಾರಿ (1994ರಿಂದ 2001, 2004 ರಿಂದ 2008) ಸತತ 10 ಟೆಸ್ಟ್ ಸರಣಿಗಳನ್ನು ಗೆದ್ದ ದಾಖಲೆಯನ್ನು ಹೊಂದಿದೆ. ಇನ್ನು ನ್ಯೂಜಿಲ್ಯಾಂಡ್ 2017 ರಿಂದ ತವರಿನಲ್ಲಿ ಸತತ 8 ಟೆಸ್ಟ್ ಸರಣಿಯನ್ನು ಗೆದ್ದಿದೆ.
ಇದನ್ನು ಓದಿ:ಇಂಗ್ಲೆಂಡ್ ವಿರುದ್ಧ ಪಂತ್ ಸಿಡಿಸಿದ ಶತಕ 6ನೇ ಕ್ರಮಾಂಕದಲ್ಲೇ ಅತ್ಯುತ್ತಮವಾದದ್ದು: ಕೋಚ್ ಶಾಸ್ತ್ರಿ