ಬ್ರಿಸ್ಬೇನ್: ಆಸ್ಟ್ರೇಲಿಯಾದ 4ನೇ ಟೆಸ್ಟ್ ಪಂದ್ಯದಲ್ಲಿ ನಾಥನ್ ಲಿಯಾನ್ ಬೌಲಿಂಗ್ನಲ್ಲಿ ದೊಡ್ಡ ಹೊಡೆತಕ್ಕೆ ಮುಂದಾಗಿ ಔಟಾಗಿದ್ದಕ್ಕೆ ಯಾವುದೇ ವಿಷಾದವಿಲ್ಲ ಎಂದು ಟೀಮ್ ಇಂಡಿಯಾ ಉಪನಾಯಕ ರೋಹಿತ್ ಶರ್ಮಾ ಹೇಳಿದ್ದಾರೆ.
ರೋಹಿತ್ ಶರ್ಮಾ ಮೊದಲ ಇನ್ನಿಂಗ್ಸ್ನಲ್ಲಿ 44 ರನ್ಗಳಿಸಿದ್ದ ವೇಳೆ ಲಿಯಾನ್ ಬೌಲಿಂಗ್ನಲ್ಲಿ ಸಿಕ್ಸರ್ ಬಾರಿಸಿ ಅರ್ಧಶತಕ ಪೂರ್ಣಗೊಳಿಸುವ ಉದ್ದೇಶದಿಂದ ದೊಡ್ಡ ಹೊಡೆತಕ್ಕೆ ಮುಂದಾದರು. ಆದರೆ, ಆ ಶಾಟ್ ಮಿಸ್ ಟೈಮ್ ಆಗಿ ಫೀಲ್ಡರ್ ಮಿಚೆಲ್ ಸ್ಟಾರ್ಕ್ ಕೈಸೇರಿತು. ಈ ಶಾಟ್ ಪ್ರಯೋಗಿಸಿದ್ದಕ್ಕೆ ಮಾಜಿ ಲೆಜೆಂಡ್ ಸುನೀಲ್ ಗವಾಸ್ಕರ್ ರೋಹಿತ್ ಬೇಜವಾಬ್ದಾರಿ ಹೊಡೆತಕ್ಕೆ ಮುಂದಾಗಿ ವಿಕೆಟ್ ಒಪ್ಪಿಸಿದರೆಂದು ಕಿಡಿ ಕಾರಿದ್ದರು. ಈ ಕುರಿತು ಪತ್ರಿಕಾ ಗೋಷ್ಠಿಯಲ್ಲಿ ಮಾತನಾಡಿರುವ ಹಿಟ್ಮ್ಯಾನ್ ತಮ್ಮ ಬ್ಯಾಟಿಂಗ್ ಬಗ್ಗೆ ಸಮರ್ಥನೆ ಮಾಡಿಕೊಂಡಿದ್ದಾರೆ.
" ನಾನು ಆ ಎಸೆತವನ್ನು ಹೊಡೆಯಲು ಬಯಸಿದ ಜಾಗಕ್ಕೆ ತಲುಪಿದೆ, ಆದರೆ ಚೆಂಡನ್ನು ನಾನಂದು ಕೊಂಡಂತೆ ಕನೆಕ್ಟ್ ಮಾಡಲಾಗಲಿಲ್ಲ. ಸ್ಕ್ವೇರ್ಲೆಗ್ ಮತ್ತು ಲಾಂಗ್ ಆನ್ ಮಧ್ಯೆಯಿದ್ದ ಗ್ಯಾಪ್ ನಡುವೆ ಚೆಂಡನ್ನು ಬಾರಿಸಬೇಕೆಂದಿದ್ದೆ. ಆದರೆ ಅದು ನಾನಂದುಕೊಂಡ ಹಾಗೆ ಆಗಲಿಲ್ಲ. ನಾನು ಆ ರೀತಿಯ ಹೊಡೆತಗಳನ್ನು ಬಾರಿಸಿಲು ಸದಾ ಇಷ್ಟಪಡುತ್ತೇನೆ. ಇಲ್ಲಿಗೆ ಬರುವ ಮುಂಚೆಯೇ ಈ ಪಿಚ್ ಬ್ಯಾಟಿಂಗ್ಗೆ ನೆರವಾಗುವ ಬಗ್ಗೆ ತಿಳಿದುಕೊಂಡಿದ್ದೆವು. ಏಕೆಂದರೆ ಇಲ್ಲಿ ಬೌನ್ಸ್ ಆದ ಚೆಂಡುಗಳು ನೇರ ಕೀಪರ್ಗೆ ಸೇರುತ್ತವೆ. ಹಾಗಾಗಿ ನಾನು ಇಂತಹ ಪಿಚ್ನಲ್ಲಿ ಆಡಲು ನಾನು ತುಂಬಾ ಆನಂದಿಸುತ್ತೇನೆ " ಎಂದು ಎರಡನೇ ದಿನದಾಟದ ನಂತರ ನಡೆದ ವರ್ಚುಯಲ್ ಸುದ್ದಿಗೋಷ್ಠಿಯಲ್ಲಿ ರೋಹಿತ್ ಹೇಳಿದರು.
ನಾನು ಮೈದಾನಕ್ಕೆ ಬಂದು, ಕೆಲವು ಓವರ್ಗಳ ಆಡಿದ ನಂತರ ಅಲ್ಲಿ ಹೆಚ್ಚು ಸ್ವಿಂಗ್ ಆಗುತ್ತಿಲ್ಲ ಎಂದು ತಿಳಿಯಿತು, ಹಾಗಾಗಿ ನಾನು ಸ್ವಲ್ಪ ಹೊಂದಾಣಿಕೆ ಮಾಡಿಕೊಳ್ಳಲು ಬಯಸಿದೆ. ಆ ಎಸೆತದಲ್ಲಿ ಔಟ್ ಆಗಿದ್ದು ದುರದೃಷ್ಟಕರ. ಆದರೆ ಆ ಬಗ್ಗೆ ನನಗೆ ಯಾವುದೇ ಬೇಸರವಿಲ್ಲ. ಇದು ನಾನು ಇಷ್ಟಪಡುವ ಸಂಗತಿಯಾಗಿದೆ. ಆ ಹೊಡೆತ ಬಾರಿಸುವಾಗ ನಾನು ಅಂದುಕೊಂಡ ಹಾಗೆ ಚೆಂಡನ್ನು ಸಂಪರ್ಕಿಸಲು ಸಾಧ್ಯವಾಗಲಿಲ್ಲ ಅಷ್ಟೇ ಎಂದು ಹಿಟ್ಮ್ಯಾನ್ ತಿಳಿಸಿದ್ದಾರೆ.
ಇದನ್ನು ಓದಿ:ನಟರಾಜನ್ ಭಾರತ ಬಯಸಿದಂತೆ ಬೌಲಿಂಗ್ ಮಾಡುತ್ತಿದ್ದಾರೆ : ರೋಹಿತ್ ಶರ್ಮಾ ಮೆಚ್ಚುಗೆ
