ಕೇಪ್ಟೌನ್: ದಕ್ಷಿಣ ಆಫ್ರಿಕಾದ ಮಾಜಿ ಸ್ಫೋಟಕ ಬ್ಯಾಟ್ಸಮನ್ ಎಬಿ ಡಿವಿಲಿಯರ್ಸ್ ತಂಡಕ್ಕೆ ಮತ್ತೊಮ್ಮೆ ಕಮ್ಬ್ಯಾಕ್ ಮಾಡಲಿದ್ದಾರೆ ಎಂಬ ಮಾತು ಈ ಹಿಂದಿನಿಂದಲೂ ಕೇಳಿ ಬರುತ್ತಿದ್ದು, ಇಲ್ಲಿಯವರೆಗೆ ಮಿ.360 ಖ್ಯಾತಿಯ ಎಬಿಡಿ ಅದರ ಬಗ್ಗೆ ಮಾತನಾಡಿರಲಿಲ್ಲ. ಆದರೆ ಇದೇ ಮೊದಲ ಬಾರಿಗೆ ಮೌನ ಮುರಿದು ಮಾಹಿತಿ ಹೊರಹಾಕಿದ್ದಾರೆ.
ಖಾಸಗಿ ಸುದ್ದಿವಾಹಿನಿ ಜತೆ ಮಾತನಾಡಿರುವ ಎಬಿಡಿ ನಾನು ಯಾವುದೇ ಸುಳ್ಳು ಭರವಸೆ ನೀಡಲ್ಲ. ವಿಶ್ವದಲ್ಲಿ ಕೋವಿಡ್ ಅಬ್ಬರ ಜೋರಾಗಿರುವ ಕಾರಣ ಈಗಾಗಲೇ ಆಯೋಜನೆಗೊಂಡಿರುವ ವಿಶ್ವಕಪ್ ಮುಂದೂಡಿಕೆಯಾಗುವ ಸಾಧ್ಯತೆ ಇರುತ್ತದೆ. ಆ ವೇಳೆಗೆ ನನ್ನ ಲಭ್ಯತೆ ಇರಬಹುದು. ಆದರೆ ನನ್ನ ದೇಹ ಯಾವ ರೀತಿಯಾಗಿ ಸ್ಪಂದಿಸಲಿದೆ ಎಂಬುದು ಮಹತ್ವದಾಗಿರುತ್ತದೆ.
ನನಗೂ ಕ್ರಿಕೆಟ್ ಆಡಲು ಇಷ್ಟವಿದೆ. ಆದರೆ ಮುಂಚಿತವಾಗಿ ಇಂತಹ ಹೇಳಿಕೆಗಳಿಗೆ ನಾನು ಪ್ರತಿಕ್ರಿಯೆ ನೀಡಲು ಸಾಧ್ಯವಿಲ್ಲ. ಆ ವೇಳೆಗೆ ತುಂಬಾ ಬದಲಾವಣೆಗಳು ಆಗುವ ಸಾಧ್ಯತೆ ಇರುತ್ತದೆ ಎಂದು ಹೇಳಿದ್ದಾರೆ.
ಈ ಹಿಂದೆ ಇದೇ ವಿಷಯಕ್ಕೆ ಸಂಬಂಧಿಸಿದಂತೆ ಮಾತನಾಡಿದ್ದ ದಕ್ಷಿಣ ಆಫ್ರಿಕಾ ಕೋಚ್ ಮಾರ್ಕ್ ಬೌಚರ್ ಜೂನ್ 1ರೊಳಗಾಗಿ ತಂಡಕ್ಕೆ ಲಭ್ಯರಾಗುವಂತೆ ಹೇಳಿದ್ದರು. ಆದರೆ ಕೋವಿಡ್-19 ಅಬ್ಬರ ಜೋರಾಗಿರುವ ಕಾರಣ ಪಂದ್ಯಗಳು ರದ್ಧಾಗಿದ್ದು, ವಿಶ್ವಕಪ್ ಕೂಡ ಮುಂದೂಡಿಕೆಯಾಗುವ ಸಾಧ್ಯತೆ ಇದೆ.
