ಜಮೈಕಾ: ವೆಸ್ಟ್ ಇಂಡೀಸ್ ವಿರುದ್ಧದ ಅಂತಿಮ ಟೆಸ್ಟ್ ಪಂದ್ಯದಲ್ಲಿ ಚೊಚ್ಚಲ ಶತಕ ಸಿಡಿಸಿದ ಟೀಂ ಇಂಡಿಯಾ ಮಧ್ಯಮ ಕ್ರಮಾಂಕದ ಬ್ಯಾಟ್ಸ್ಮನ್ ಹನುಮ ವಿಹಾರಿ ತಮ್ಮ ಶತಕವನ್ನ ತಂದೆಗೆ ಅರ್ಪಿಸಿದ್ದಾರೆ.
ಮೊದಲ ಟೆಸ್ಟ್ ಪಂದ್ಯದಲ್ಲಿ 93 ರನ್ ಗಳಿಸಿ ಶತಕ ವಂಚಿತರಾಗಿದ್ದ ವಿಹಾರಿ ಎರಡನೇ ಪಂದ್ಯದಲ್ಲಿ ಎಚ್ಚರಿಕೆಯಿಂದ ಬ್ಯಾಟ್ ಬೀಸಿ ಶತಕ ಸಿಡಿಸಿದ್ರು.
ಮೊದಲ ಇನ್ನಿಂಗ್ಸ್ ಬ್ಯಾಟಿಂಗ್ ಮುಗಿದ ನಂತರ ಮಾತನಾಡಿದ ವಿಹಾರಿ, ನಾನು 12ನೇ ವರ್ಷದ ಬಾಲಕನಿದ್ದಾಗ ನನ್ನ ತಂದೆ ನಮ್ಮನ್ನ ಅಗಲಿದ್ರು. ನಾನು ಅಂತಾರಾಷ್ಟ್ರೀಯ ಕ್ರಿಕೆಟ್ಗೆ ಪದಾರ್ಪಣೆ ಮಾಡಿದಾಗಲೇ ನನ್ನ ಮೊದಲ ಶತಕವನ್ನ ತಂದೆಗೆ ಅರ್ಪಿಸಬೇಕೆಂದು ನಿರ್ಧಾರ ಮಾಡಿದ್ದೆ. ಇಂದು ನನಗೆ ತುಂಬಾ ಭಾವನಾತ್ಮಕ ದಿನ. ಅವರು ಎಲ್ಲೇ ಇದ್ದರು ನನ್ನ ಬಗ್ಗೆ ಹೆಮ್ಮೆ ಪಟ್ಟಿದ್ದಾರೆ ಎಂದು ಭಾವಿಸುತ್ತೇನೆ ಎಂದಿದ್ದಾರೆ.
ನಾನು ಮೊದಲ ದಿನ 42 ರನ್ ಗಳಿಸಿದ ನಂತರ ರಾತ್ರಿ ನಿದ್ದೆ ಮಾಡಿಲ್ಲ. ರಾತ್ರಿ ಪೂರ್ತಿ ನಾಳೆ ಹೇಗೆ ದೊಡ್ಡ ಮೊತ್ತ ಕಲೆಹಾಕಬೇಕು ಎಂದು ಚಿಂತಿಸುತ್ತಿದ್ದೆ. ಅಂತಿಮವಾಗಿ ಶತಕ ಗಳಿಸಿದ್ದಕ್ಕೆ ಸಂತೋಷವಿದೆ. ಉತ್ತಮ ಜೊತೆಯಾಟ ನೀಡಿದ ಇಶಾಂತ್ ಶರ್ಮಾಗೆ ಅಭಿನಂದನೆಗಳು ಎಂದಿದ್ದಾರೆ. ಇಶಾಂತ್ ಶರ್ಮಾ ಜೊತೆಗೂಡಿ 122 ರನ್ಗಳ ಜೊತೆಯಾಟವಾಡಿದ ವಿಹಾರಿ, ಶತಕ ಸಿಡಿಸಿದ್ರು.
