ಜೋಹನ್ ಬರ್ಗ್ಸ್: ಅವ್ಯವಸ್ಥೆಯಿಂದಾಗಿ ದಕ್ಷಿಣ ಆಫ್ರಿಕಾ ಕ್ರಿಕೆಟ್ ಮಂಡಳಿ ಅಲ್ಲಿನ ಕ್ರೀಡಾ ಸಚಿವ ನಾಥಿ ಮೆಥೆತ್ವಾ ಅವರ ಕೋಪವನ್ನು ಎದರಿಸುತ್ತಿರುವುದರಿಂದ ನವೆಂಬರ್ ಕೊನೆಯಲ್ಲಿ ಆರಂಭವಾಗಬೇಕಿದ್ದ ಇಂಗ್ಲೆಂಡ್ ವಿರುದ್ಧದ ವೈಟ್ ಬಾಲ್ ಸರಣಿ ರದ್ದಾಗುವ ಅಪಾಯಕ್ಕೆ ಸಿಲುಕಿದೆ.
"ಇಂಗ್ಲೆಂಡ್ ಆಲೋಚನೆ ಏನಾಗಿದೆ ಎಂದು ನನಗೆ ತಿಳಿದಿಲ್ಲ. ಆದರೆ ಇಂದು ಸಂಜೆಯೊಳಗೆ ಕ್ರಿಕೆಟ್ ಮಂಡಳಿಯ ಸದಸ್ಯರ ಕೌನ್ಸಿಲ್ ಸರಿಯಾದ ನಿರ್ಧಾರ ತೆಗೆದುಕೊಳ್ಳದಿದ್ದರೆ ಇಂಗ್ಲೆಂಡ್ ತಂಡ ಬಹುಶಃ ನಿರಾಶೆಗೊಳ್ಳಬೇಕಾಗುತ್ತದೆ. ಇದರಲ್ಲಿ ನನಗೆ ಯಾವುದೇ ಸಂದೇಹವಿಲ್ಲ" ಎಂದು ಮಂಡಳಿಯ ಮಧ್ಯಂತರ ಅಧ್ಯಕ್ಷ ಝಾಕ್ ಯಾಕೂಬ್ ಸುದ್ದಿಗೋಷ್ಠಿಯಲ್ಲಿ ತಿಳಿಸಿದ್ದಾರೆ.
ಮಾಜಿ ನ್ಯಾಯಾಧೀಶರಾಗಿರುವ ಯಾಕೂಬ್ ಅವರನ್ನು ಅಕ್ಟೋಬರ್ 30ರಂದು ಕ್ರಿಕೆಟ್ ಮಂಡಳಿಯ ಮಧ್ಯಂತರ ಅಧ್ಯಕ್ಷರಾಗಿ ಕ್ರೀಡಾ ಸಚಿವ ನಾಥಿ ಮೆಥೆತ್ವಾ ನೇಮಕ ಮಾಡಿದ್ದರು. ಆದರೆ ಕ್ರಿಕೆಟ್ ಮಂಡಳಿ ಸರ್ಕಾರ ನೇಮಿಸಿರುವ ಮಧ್ಯಂತರ ಅಧ್ಯಕ್ಷರ ಅಧಿಕಾರಕ್ಕೆ ಒಪ್ಪಿಗೆ ಸೂಚಿಸಿಲ್ಲ ಎಂದು ತಿಳಿದು ಬಂದಿದೆ.
ದಕ್ಷಿಣ ಆಫ್ರಿಕಾ ನವೆಂಬರ್ 27ರಿಂದ ಆರಂಭವಾಗಲಿರುವ ಆರು ವೈಟ್ ಬಾಲ್ ಅಂತಾರಾಷ್ಟ್ರೀಯ ಪಂದ್ಯಗಳಿಗಾಗಿ ಆಡಲು ಇಂಗ್ಲೆಂಡ್ ತಂಡ ಸೋಮವಾರ ಆಗಮಿಸಲಿದೆ. ಆದರೆ ಕ್ರಿಕೆಟ್ ಮಂಡಳಿ ಮತ್ತು ಹೊಸ ಅಧ್ಯಕ್ಷರ ನಡುವೆ ಹೊಂದಾಣಿಕೆಯಾಗದಿದ್ದರೆ, ಈ ಟೂರ್ನಿ ರದ್ದಾಗಲಿದೆ ಎಂದು ತಿಳಿದು ಬಂದಿದೆ.
