ಲಂಡನ್: ಇಂಗ್ಲೆಂಡ್ ಕ್ರಿಕೆಟ್ ಕಂಡಂತಹ ಶ್ರೇಷ್ಠ ಬ್ಯಾಟ್ಸ್ಮನ್ ಇಯಾನ್ ಬೆಲ್ ತಮ್ಮ ಕ್ರಿಕೆಟ್ ವೃತ್ತಿ ಬದುಕಿಗೆ ವಿದಾಯ ಹೇಳುವುದಾಗಿ ಟ್ವೀಟ್ ಮೂಲಕ ಘೋಷಿಸಿದ್ದಾರೆ.
ನಾಳೆಯಿಂದ ಆರಂಭವಾಗಲಿರುವ ಕೌಂಟಿ ಪಂದ್ಯದಲ್ಲಿ ವಾರ್ವಿಕ್ಶೈರ್ ತಂಡದ ಪರ ಆಡುವುದೇ ತಮ್ಮ ಕೊನೆಯ ರೆಡ್ ಬಾಲ್ ಕ್ರಿಕೆಟ್ ಹಾಗೂ ಮುಂದಿನ ನಾನು ನನ್ನ ಕೊನೆಯ ಟಿ20 ಪಂದ್ಯವನ್ನಾಡಲಿದ್ದೇನೆ ಎಂದು 38 ವರ್ಷದ ಇಯಾನ್ ಬೆಲ್ ತಿಳಿಸಿದ್ದಾರೆ.
2004ರಲ್ಲಿ ಇಂಗ್ಲೆಂಡ್ ಪರ ಟೆಸ್ಟ್ ಕ್ರಿಕೆಟ್ಗೆ ಪದಾರ್ಪಣೆ ಮಾಡಿದ್ದ ಇಯಾನ್ ಬೆಲ್ ಒಟ್ಟಾರೆ 118 ಟೆಸ್ಟ್, 161 ಏಕದಿನ ಪಂದ್ಯ ಹಾಗೂ 8 ಟಿ20 ಪಂದ್ಯಗಳನ್ನಾಡಿದ್ದಾರೆ. 5 ಆ್ಯಶಸ್ ಟೆಸ್ಟ್ ಸರಣಿ ಗೆದ್ದ ತಂಡದ ಭಾಗವಾಗಿರುವ ಅವರು ಟೆಸ್ಟ್ನಲ್ಲಿ 22 ಶತಕ, 46 ಅರ್ಧಶತಕದ ಸಹಿತ 7727 ರನ್, ಏಕದಿನ ಕ್ರಿಕೆಟ್ನಲ್ಲಿ 4 ಶತಕ 35 ಅರ್ಧಶತಕದ ಸಹಿತ 5416 ರನ್ ಗಳಿಸಿದ್ದಾರೆ.
2020-21ರ ಆವೃತ್ತಿಗೆ ವಾರ್ವಿಕ್ಶೈರ್ ಪರ ಆಡುವುದಾಗಿ ಸಹಿ ಮಾಡಿದ್ದರು ನಿವೃತ್ತಿ ಘೋಷಣೆ ಮಾಡಿದ್ದಾರೆ. ತಂಡಕ್ಕೆ ತಮ್ಮಿಂದ ಯಾವುದೇ ರೀತಿಯ ನೆರವಾಗುತ್ತಿಲ್ಲ ಎಂದಿರುವ ಅವರು ಇನ್ನು ಕೆಲವು ತಿಂಗಳಿರುವಾಗಲೇ ನಿವೃತ್ತಿ ಘೋಷಿಸಿದ್ದಾರೆ. ಆದರೆ ಅವರಿಗೆ ಈ ಆವೃತ್ತಿ ಮುಗಿಯುತ್ತಿದ್ದಂತೆ ಟಿಮ್ ಆ್ಯಂಬ್ರೋಸ್ ಮತ್ತು ಜೀತನ್ ಪಟೇಲ್ ಜೊತೆಗೆ ಭರ್ಜರಿಯಾಗಿ ಬೀಳ್ಕೊಡುಗೆ ನೀಡಲು ವಾರ್ವಿಕ್ಶೈರ್ ಕ್ರಿಕೆಟ್ ಕ್ಲಬ್ ನಿರ್ಧರಿಸಿತ್ತು. ಆದರೆ ಬೆಲ್ ಎಲ್ಲರಿಗೂ ಶಾಕ್ ನೀಡಿದ್ದಾರೆ.
