ಕೇಪ್ಟೌನ್: ಬಿಸಿಸಿಐ ಅಧ್ಯಕ್ಷ ಸೌರವ್ ಗಂಗೂಲಿಯ ಐಸಿಸಿ ಅಧ್ಯಕ್ಷರಾಗಲು ಅರ್ಹರಿದ್ದಾರೆ ಎಂದು ದಕ್ಷಿಣ ಆಫ್ರಿಕಾ ಕ್ರಿಕೆಟ್ ಮಂಡಳಿಯ ಡೈರೆಕ್ಟರ್ ಆಗಿರುವ ಮಾಜಿ ಕ್ರಿಕೆಟಿಗ ಗ್ರೇಮ್ ಸ್ಮಿತ್ ಹೇಳಿಕೆ ನೀಡಿದ ಬೆನ್ನಲ್ಲೇ ದಕ್ಷಿಣ ಆಫ್ರಿಕಾ ಕ್ರಿಕೆಟ್ ಮಂಡಳಿ ಉಲ್ಟಾ ಹೊಡೆದಿದೆ.
ಕೊರೊನಾ ಬಿಕ್ಕಟ್ಟಿನಿಂದ ಸಂಕಷ್ಟದಲ್ಲಿರುವ ಕ್ರಿಕೆಟ್ ಮತ್ತೆ ಚೇತರಿಕೆ ಕಾಣುವಂತೆ ಮಾಡಲು ಗಂಗೂಲಿ ಸೂಕ್ತ ವ್ಯಕ್ತಿ. ಅವರು ಉನ್ನತ ಮಟ್ಟದ ಕ್ರಿಕೆಟ್ ಆಡಿರುವುದಿಂದ ಎಲ್ಲಾ ಸಂಗತಿಗಳನ್ನು ಅರ್ಥ ಮಾಡಿಕೊಳ್ಳುತ್ತಾರೆ. ಕ್ರಿಕೆಟ್ ಮುನ್ನಡೆಸಲು ಅವರ ನಾಯಕತ್ವ ಮಹತ್ವದ್ದಾಗಲಿದೆ ಎಂದು ಗ್ರೇಮ್ ಸ್ಮಿತ್ ಹೇಳಿಕೆ ನೀಡಿದ್ದರು.
ಆದರೆ ಅದಕ್ಕೆ ಪ್ರತಿಕ್ರಿಯೆ ನೀಡಿರುವ ಸಿಎಸ್ಎ ಅಧ್ಯಕ್ಷ ಕ್ರಿಸ್ ನೆಂಜಾನಿ, ನಾವು ಯಾವುದೇ ಅಭ್ಯರ್ಥಿಯನ್ನು ಬೆಂಬಲಿಸುವ ಮುನ್ನ ಐಸಿಸಿ ಪ್ರೋಟೋಕಾಲ್ ಮತ್ತು ನಮ್ಮದೇ ಆದ ಪ್ರೋಟೋಕಾಲ್ಗಳನ್ನು ಗೌರವಿಸಬೇಕಿದೆ. ಇನ್ನು ಯಾವ ಅಭ್ಯರ್ಥಿಗಳ ಹೆಸರು ನಾಮ ನಿರ್ದೇಶನಗೊಂಡಿಲ್ಲ. ಒಮ್ಮೆ ನಾಮನಿರ್ದೇಶನಗೊಂಡ ನಂತರವಷ್ಟೇ ಸಿಎಸ್ಎ ತನ್ನ ಪ್ರೋಟೋಕಾಲ್ ಪ್ರಕಾರ ಮತ ಚಲಾಯಿಸಲು ಅಧ್ಯಕ್ಷರಿಗೆ ಸೂಚಿಸುತ್ತದೆ ಎಂದು ಹೇಳಿದ್ದಾರೆ.
ಗ್ರೇಮ್ ಸ್ಮಿತ್ ದಕ್ಷಿಣ ಆಫ್ರಿಕಾ ಕ್ರಿಕೆಟ್ಗೆ ಅಪಾರ ಸೇವೆ ಸಲ್ಲಿಸಿದವರಾಗಿದ್ದಾರೆ. ಗಂಗೂಲಿ ಅವರ ಮೇಲಿನ ಅಭಿಪ್ರಾಯವನ್ನು ನಾವು ಗೌರವಯುತವಾಗಿ ಕಾಣುತ್ತೇವೆ. ಆದರೆ ನಾವು ಒಮ್ಮೆ ಚುನಾವಣೆಗೆ ನಾಮನಿರ್ದೇಶನಗೊಂಡ ಮೇಲೆ ನಮ್ಮ ನಿರ್ಧಾರ ತೆಗೆದುಕೊಳ್ಳಬೇಕು ಎಂದಿದ್ದಾರೆ.
ಈಗಾಗಲೆ ಐಸಿಸಿ ಅಧ್ಯಕ್ಷರಾಗಿರುವ ಭಾರತದ ಶಶಾಂಕ್ ಮನೋಹರ್ ಅವರ ಅಧಿಕಾರಾವಧಿ ಮುಂದಿನ ಮೇ ತಿಂಗಳಿಗೆ ಅಂತ್ಯವಾಗಲಿದೆ. ಮನೋಹರ್ ಈಗಾಗಲೇ ತಾವು ಮುಂದಿನ ಅವಧಿಗೆ ಚುನಾವಣೆಗೆ ಸ್ಪರ್ಧಿಸುವುದಿಲ್ಲ ಎಂದು ಹೇಳಿದ್ದಾರೆ.
