ಮೆಲ್ಬೋರ್ನ್ : ಸೌತ್ ಆಸ್ಟ್ರೇಲಿಯಾದಲ್ಲಿ ಕೋವಿಡ್-19 ಪ್ರಕರಣಗಳು ದಿಢೀರ್ ಏರಿಕೆಗೊಂಡಿವೆ. ಆದರೂ ಭಾರತದ ವಿರುದ್ದದ ಡೇ ಅಂಡ್ ನೈಟ್ ಟೆಸ್ಟ್ ಆಯೋಜಿಸಲು ನಾವು ಬದ್ಧವಾಗಿದ್ದೇವೆ ಎಂದು ಕ್ರಿಕೆಟ್ ಆಸ್ಟ್ರೇಲಿಯಾ ಖಚಿತಪಡಿಸಿದೆ.
ಭಾನುವಾರದಂದು ಕೋವಿಡ್ ಸೋಂಕಿತರ ಸಂಖ್ಯೆ 17ಕ್ಕೆ ಏರಿಕೆಯಾಗಿದೆ ಎಂದು ಸೋಮವಾರ ಸೌತ್ ಆಸ್ಟ್ರೇಲಿಯಾ ಹೇಳಿಕೆ ಬಿಡುಗಡೆ ಮಾಡಿತ್ತು. ಈ ಘೋಷಣೆಯ ನಂತರ ವೆಸ್ಟರ್ನ್ ಆಸ್ಟ್ರೇಲಿಯಾ, ಟಸ್ಮೇನಿಯಾ ಮತ್ತು ಉತ್ತರ ಪ್ರಾಂತ್ಯಗಳು ಕ್ವೀನ್ಸ್ಲ್ಯಾಂಡ್ನೊಂದಗಿನ ಗಡಿಯನ್ನು ಮುಚ್ಚಿದ್ದು, ಅಡಿಲೇಡ್ನಿಂದ ಬರುವವರು 14 ದಿನಗಳ ಕಾಲ ಕ್ವಾರಂಟೈನ್ ಮಾಡಬೇಕೆಂದು ಘೋಷಿಸಿಕೊಂಡಿವೆ.
ಆದರೆ, ಕ್ರಿಕೆಟ್ ಆಸ್ಟ್ರೇಲಿಯಾ ಮಾತ್ರ ಟೆಸ್ಟ್ ಸರಣಿಯ ವೇಳಾಪಟ್ಟಿಯಲ್ಲಿ ಯಾವುದೇ ಬದಲಾವಣೆ ಇಲ್ಲ ಎಂದಿದೆ. " ಸೌತ್ ಆಸ್ಟ್ರೇಲಿಯಾದಲ್ಲಿನ ಸನ್ನಿವೇಶವನ್ನು ಕ್ರಿಕೆಟ್ ಆಸ್ಟ್ರೇಲಿಯಾ ಮೇಲ್ವಿಚಾರಣೆ ಮಾಡುವುದನ್ನು ಮುಂದುವರೆಸಿದೆ. ಆದರೆ, ಅಡಿಲೇಡ್ ಓವಲ್‌ನಲ್ಲಿ ಭಾರತದ ವಿರುದ್ಧದ ಮೊದಲ ಟೆಸ್ಟ್ ಪಂದ್ಯವನ್ನು ಆಯೋಜಿಸಲು ಬದ್ಧವಾಗಿದೆ ಎಂದು ಹೇಳಿಕೆ ಬಿಡುಗಡೆ ಮಾಡಿದೆ.
ಏಕದಿನ ಮತ್ತು ಟಿ20 ಸರಣಿಯ ಭಾಗವಾಗಲಿರುವ ವೆಸ್ಟರ್ನ್ ಆಸ್ಟ್ರೇಲಿಯಾ, ಟಸ್ಮೇನಿಯಾ, ಕ್ವೀನ್ಸ್ಲ್ಯಾಂಡ್ ಭಾಗದ ಆಟಗಾರರು ಮತ್ತು ಸಹಾಯಕ ಸಿಬ್ಬಂದಿ ಮಂಗಳವಾ ಸಿಡ್ನಿಗೆ ಪ್ರಯಾಣ ಬೆಳೆಸಲು ಸಿದ್ದರಾಗುತ್ತಿದ್ದಾರೆ ಎಂದು ತಿಳಿಸಿದೆ.
ಭಾರತ ಮತ್ತು ಆಸ್ಟ್ರೇಲಿಯಾ ತಂಡಗಳು ನವೆಂಬರ್ 27,29 ಮತ್ತು ಡಿಸೆಂಬರ್ 2 ರಂದು 2 ಏಕದಿನ ಪಂದ್ಯಗಳನ್ನು, ಡಿಸೆಂಬರ್ 4.6 ಮತ್ತು 8ರಂದು ಟಿ20 ಪಂದ್ಯಗಳನ್ನು ಆಡಲಿವೆ. ಡಿಸೆಂಬರ್ 17ರಿಂದ ಬಾರ್ಡರ್ ಗವಾಸ್ಕರ್ ಸರಣಿ ಆರಂಭವಾಗಲಿದೆ.
