ಮುಂಬೈ: ಭಾರತ ತಂಡದ ಸ್ವಿಂಗ್ ಸ್ಪೆಷಲಿಸ್ಟ್ ಭುವನೇಶ್ವರ್ ಕುಮಾರ್ ಜೀವನ ಚರಿತ್ರೆ ಸಿನಿಮಾವಾದರೆ ಅದರಲ್ಲಿ ಬಾಲಿವುಡ್ ನಟ ರಾಜ್ ಕುಮಾರ್ ರಾವ್ ನಾಯಕ ನಟನಾಗಬೇಕೆಂದು ಹೇಳಿದ್ದಾರೆ.
ತಮ್ಮ ಸ್ವಿಂಗ್ ಬೌಲಿಂಗ್ ಮೂಲಕ ವೇಗವಾಗಿ ಬೆಳೆದ ಭುವಿಯ ವೃತ್ತಿ ಜೀವನವನ್ನು ಕಳೆದೆರಡು ವರ್ಷಗಳಿಂದ ಗಾಯ ನುಂಗಿ ಹಾಕುತ್ತಿದೆ. ಎನ್ಸಿಎನಲ್ಲಿ ಚಿಕಿತ್ಸೆ ಪಡೆದು ಬಂದು ಒಂದು ಪಂದ್ಯವಾಡಿದರಾದರೂ ಮತ್ತೆ ಸ್ಪೋರ್ಟ್ಸ್ ಹಾರ್ನಿಯ ಕಾಣಿಸಿಕೊಂಡಿತ್ತು. ಮತ್ತೆ ಮೂರು ತಿಂಗಳ ನಂತರ ತಂಡಕ್ಕೆ ಮರಳಿದರು. ಆದರೆ ಕೊರೊನಾ ವೈರಸ್ ಭೀತಿಯಿಂದ ಟೂರ್ನಿ ರದ್ದಾಯಿತು.
ಕೊರೊನಾದಿಂದ ಕ್ರಿಕೆಟ್ ಸ್ಥಗಿತಗೊಂಡಿರುವುದರಿಂದ ಭುವನೇಶ್ವರ್ ಈ ಸಮಯದಲ್ಲಿ ಮೀರತ್ನಲ್ಲಿ ಕ್ರಿಕೆಟ್ ಅಕಾಡೆಮಿಯೊಂದನ್ನು ತೆರೆಯಲು ಯೋಜನೆ ರೂಪಿಸಿಕೊಳ್ಳುತ್ತಿದ್ದಾರೆ. ಮೀರತ್ನಲ್ಲೇ ಏಕೆ ಎಂಬ ಪ್ರಶ್ನೆಗೆ ಉತ್ತಿರಿಸಿರುವ ಅವರು, ಈ ಸಿಟಿ ನನಗೆ ಸಾಕಷ್ಟು ನೀಡಿದೆ. ಹಾಗಾಗಿ ನಾನು ಈ ಆಕಾಡೆಮಿಯ ಮೂಲಕ ಸಮಾಜಕ್ಕೆ ಕೊಡುಗೆ ನೀಡಲು ಬಯಸಿದ್ದೇನೆ ಎಂದು ಹೇಳಿಕೊಂಡಿದ್ದಾರೆ.
ಇದೇ ಸಂದರ್ಭದಲ್ಲಿ ತಮ್ಮ ಬಯೋಪಿಕ್ ಸಿನಿಮಾವಾದರೆ ಯಾರು ಹೀರೋ ಆಗಿ ನಟಿಸಬೇಕು ಎಂದು ಕೇಳಿದ್ದಕ್ಕೆ ಉತ್ತರಿಸಿರುವ ಭುವಿ, ಯಾವುದೇ ಸಿನಿಮಾ ಬ್ಯಾಗ್ರೌಂಡ್ ಇಲ್ಲದೇ ಹಿಂದಿ ಚಿತ್ರೋದ್ಯಮದಲ್ಲಿ ಬೆಳೆಯುತ್ತಿರುವ ರಾಜ್ಕುಮಾರ್ ರಾವ್ ತಮ್ಮ ಬಯೋಪಿಕ್ನಲ್ಲಿ ನಟಿಸಬೇಕು ಎಂದು ಹೇಳಿದ್ದಾರೆ.
