ಬೆಂಗಳೂರು: ನಿವೃತ್ತಿ ನಿರ್ಧಾರದಿಂದ ಹೊರಬಂದು ದೇಶಿ ಕ್ರಿಕೆಟ್ನಲ್ಲಿ ಎರಡನೇ ಇನ್ನಿಂಗ್ಸ್ ಆರಂಭಿಸಿರುವ ಅಂಬಾಟಿ ರಾಯುಡು ಏಕಾಂಗಿ ಹೋರಾಟ ನಡೆಸಿ ತಮ್ಮ ತಂಡವನ್ನು ಗೆಲ್ಲಿಸಿದ್ದಾರೆ.
ಕರ್ನಾಟಕದ ವಿರುದ್ದ ನಡೆದ ಆಲೂರಿನ ಕೆಎಸ್ಸಿಎ ಕ್ರೀಡಾಂಗಣದಲ್ಲಿ ನಡೆದ ವಿಜಯ್ ಹಜಾರೆ ಟ್ರೋಫಿಯಲ್ಲಿ ಹೈದರಾಬಾದ್ 21 ರನ್ಗಳ ಜಯ ಸಾಧಿಸಿ ಅಗ್ರಕ್ರಮಾಂಕದ ಕರ್ನಾಟಕ ತಂಡಕ್ಕೆ ಸೋಲುಣಿಸಿದ್ದಾರೆ.
ಟಾಸ್ ಸೋತು ಬ್ಯಾಟಿಂಗ್ ಮಾಡಿದ ಹೈದರಾಬಾದ್ ತಂಡ ಕರ್ನಾಟಕದ ಬೌಲರ್ಗಳ ಪ್ರಚಂಡ ದಾಳಿಗೆ ಸಿಲುಕಿ ಕೇವಲ 198 ರನ್ಗಳಿಗೆ ಆಲೌಟ್ ಆಯಿತು. ಒಂದೆಡೆ ವಿಕೆಟ್ ಬೀಳುತ್ತಿದ್ದರು ಕ್ರೀಸ್ನಲ್ಲಿ ಗಟ್ಟಿಯಾಗಿ ನೆಲೆಯೂರಿದ್ದ ರಾಯುಡು 111 ಎಸೆತಗಳಲ್ಲಿ 3 ಸಿಕ್ಸರ್ ಹಾಗೂ 4 ಬೌಂಡರಿ ನೆರವಿನಿಂದ 87 ರನ್ಗಳಿಸಿದರು.
ಅದ್ಭುತ ಬೌಲಿಂಗ್ ದಾಳಿ ನಡೆಸಿದ ಮಿಥುನ್ 2, ಪ್ರಸಿದ್ ಕೃಷ್ಣ 2, ರೋನಿತ್ ಮೋರೆ 2, ಕರುಣ್ ನಾಯರ್, ಶ್ರೇಯಸ್ ಗೋಪಾಲ್ ಹಾಗೂ ಪ್ರವೀಣ್ ದುಬೆ ತಲಾ ಒಂದು ವಿಕೆಟ್ ಪಡೆದರು.
199 ರನ್ಗಳ ಟಾರ್ಗೆಟ್ ಬೆನ್ನತ್ತಿದ ಕರ್ನಾಟಕ 45 ಓವರ್ಗಳಲ್ಲಿ 177 ರನ್ಗಳಿಗೆ ಆಲೌಟ್ ಆಗುವ ಮೂಲಕ 21 ರನ್ಗಳ ಸೋಲನುಭವಿಸಿತು. ಯುವ ಬ್ಯಾಟ್ಸ್ಮನ್ ದೇವದತ್ ಪಡಿಕ್ಕಲ್ 60 ಹಾಗೂ ನಾಯಕ ಮನೀಷ್ ಪಾಂಡೆ 48 ರನ್ಗಳಿಸಿ ಗೆಲುವಿಗಾಗಿ ಹೋರಾಟ ನಡೆಸದರಾದರೂ ಗೆಲುವಿನ ದಡ ಸೇರುಸುವಲ್ಲಿ ವಿಫಲರಾದರು.
ಹೈದರಾಬಾದ್ ತಂಡ ಪಾರ್ಟ್ ಟೈಮ್ ಬೌಲರ್ ಬವನಕ ಸಂದೀಪ್ 4 ವಿಕೆಟ್ ಹಾಗೂ ಸಿರಾಜ್ 2 ವಿಕೆಟ್ ಪಡೆದು ಕರ್ನಾಟಕದ ಗೆಲುವಿನ ಆಸೆಗೆ ಕಣ್ಣೀರೆರಚಿದರು.
ಇಂದು ನಡೆದ ಇತರೆ ಪಂದ್ಯಗಳಲ್ಲಿ ಮುಂಬೈ 5 ವಿಕೆಟ್ಗಳಿಂದ ಸೌರಾಷ್ಟ್ರ ತಂಡವನ್ನು, ತಮಿಳುನಾಡು 74 ರನ್ಗಳಿಂದ ಬೆಂಗಾಲ್ ತಂಡವನ್ನು, ಸರ್ವೀಸಸ್ 5 ವಿಕೆಟ್ಗಳಿಂದ ರೈಲ್ವೇಸ್ ತಂಡವನ್ನು, ಗುಜರಾತ್ 5 ವಿಕೆಟ್ಗಳಿಂದ ರಾಜಸ್ಥಾನ ತಂಡವನ್ನು, ಚತ್ತಿಸ್ಗಡ್ 4 ವಿಕೆಟ್ಗಳಿಂದ ಸಿಕ್ಕಿಂ ತಂಡವನ್ನು ಮಣಿಸಿವೆ.
