ಮುಂಬೈ: ವಿಶ್ವ ಕ್ರಿಕೆಟ್ನ ಶ್ರೀಮಂತ ಲೀಗ್ ಆಗಿರುವ ಐಪಿಎಲ್ ಟೂರ್ನಿಯಲ್ಲಿ ಸದ್ಯದ ಪರಿಸ್ಥಿತಿಯಲ್ಲಿ ಭಾರತದಲ್ಲಿ ಆಯೋಜಿಸುವುದು ಕಷ್ಟಸಾಧ್ಯವಾಗಿದೆ. ಆದರೆ, ಯುಎಇ ಹಾಗೂ ಶ್ರೀಲಂಕಾ ಕ್ರಿಕೆಟ್ ಮಂಡಳಿಗಳು ತಮ್ಮ ದೇಶದಲ್ಲಿ ಐಪಿಎಲ್ ನಡೆಸಿಕೊಡುವ ಆಫರ್ ನೀಡಿದ್ದವು. ಇದೀಗ ಕೊರೊನಾ ಮುಕ್ತ ರಾಷ್ಟ್ರವಾಗಿರುವ ನ್ಯೂಜಿಲ್ಯಾಂಡ್ ಕೂಡ ಐಪಿಎಲ್ ಆಯೋಜಿಸಲು ತಾವು ಸಿದ್ದ ಎಂದು ಬಿಸಿಸಿಐಗೆ ಆಫರ್ ನೀಡಿದೆ.
ಟಿ-20 ವಿಶ್ವಕಪ್ ಟೂರ್ನಿಯ ಬಗ್ಗೆ ಅಂತಿಮ ನಿರ್ಧಾರಕ್ಕಾಗಿ ಕಾಯುತ್ತಿರುವ ಬಿಸಿಸಿಐ ವಿದೇಶದಲ್ಲಿ 13ನೇ ಆವೃತ್ತಿಯ ಲೀಗ್ ಅನ್ನು ಆಯೋಜಿಸಲು ಮುಂದಾಗಿದೆ ಎಂಬ ಸುದ್ದಿ ಕಳೆದ ಒಂದು ವಾರದಿಂದ ಕೇಳಿಬರುತ್ತಿದೆ. ಇದಕ್ಕೆ ಯುಎಇ ಹಾಗೂ ಶ್ರೀಲಂಕಾ ಮಂಡಳಿಗಳು ಸಿದ್ದವಾಗಿದೆ ಎನ್ನಲಾಗಿತ್ತು.
ಇದೀಗ ಆ ಪಟ್ಟಿಗೆ ಕೊರೊನಾ ಮುಕ್ತ ರಾಷ್ಟ್ರವಾಗಿರುವ ಕಿವೀಸ್ ಕ್ರಿಕೆಟ್ ಮಂಡಳಿ ಕೂಡ ಐಪಿಎಲ್ ಆಯೋಜನೆ ಮಾಡಲು ಸಿದ್ದ ಇರುವುದಾಗಿ ತಿಳಿಸಿದೆ ಎಂದು ಬಿಸಿಸಿಐ ಮಾಹಿತಿ ಮೂಲಗಳಿಂದ ತಿಳಿದುಬಂದಿದೆ.
ಆದರೆ, ಬಿಸಿಸಿಐ ಖಜಾಂಚಿ ಅರುಣ್ ದುಮಾಲ್ ಈ ಬಗ್ಗೆ ಪ್ರತಿಕ್ರಿಯಿಸಿದ್ದು, ಐಪಿಎಲ್ ನಡೆಸಲು ಭಾರತವೇ ಮೊದಲ ಆದ್ಯತೆಯಾಗಿದೆ. ಆದರೆ, ಕೊರೊನಾ ಪ್ರಕರಣಗಳು ಹೆಚ್ಚಿದ್ದರೆ, ವಿದೇಶಗಳಲ್ಲಿ ನಡೆಸುವ ಬಗ್ಗೆ ಆಲೋಚಿಸಲಾಗುವುದು. ಯುಎಇ ಹಾಗೂ ಶ್ರೀಲಂಕಾದ ಬಳಿಕ ನ್ಯೂಜಿಲ್ಯಾಂಡ್ ಸಹ ಆತಿಥ್ಯ ವಹಿಸಲು ಆಸಕ್ತಿ ತೋರಿದೆ ಎಂದು ಮಾಹಿತಿ ನೀಡಿದ್ದಾರೆ.
ಐಪಿಎಲ್ ವಿದೇಶಗಳಲ್ಲಿ ನಡೆಸಲು ಆಲೋಚನೆ ಮಾಡುತ್ತಿರುವುದು ಇದೇ ಮೊದಲೇನಲ್ಲ. 2009ರಲ್ಲಿ ಲೋಕಸಭೆ ಚುನಾವಣೆ ಕಾರಣದಿಂದ ದಕ್ಷಿಣ ಆಫ್ರಿಕಾದಲ್ಲಿ ನಡೆಸಲಾಗಿತ್ತು. ನಂತರ 2014ರಲ್ಲೂ ಕೆಲವು ಪಂದ್ಯಗಳನ್ನು ಇದೇ ಕಾರಣದಿಂದ ಯುಎಇನಲ್ಲಿ ನಡೆಸಲಾಗಿತ್ತು.
