ಡಾಕಾ: ವಿಕೆಟ್ ಕೀಪರ್ ಮುಷ್ಫೀಕರ್ ರಹೀಮ್ ಪಾಕಿಸ್ತಾನ ಪ್ರವಾಸದಿಂದ ಹಿಂದೆ ಸರಿದ ಬೆನ್ನಲ್ಲೇ ಬಾಂಗ್ಲಾದೇಶ ತಂಡದ 5 ಮಂದಿ ಕೋಚ್ಗಳು ಸಹ ಪಾಕಿಸ್ತಾನಕ್ಕೆ ತೆರಳದಿರಲು ನಿರ್ಧರಿಸಿದ್ದಾರೆ.
ಬಾಂಗ್ಲಾದೇಶದ ಬ್ಯಾಟಿಂಗ್ ಕೋಚ್ ನೀಲ್ ಮೆಕೆಂಜಿ ಹಾಗೂ ಫೀಲ್ಡಿಂಗ್ ಕೋಚ್ ರ‍್ಯಾನ್ ಕುಕ್ ಪಾಕಿಸ್ತಾನ ಪ್ರವಾಸಕ್ಕೆ ಭದ್ರತೆ ಕಾರಣ ನೀಡಿ ಹಿಂದೆ ಸರಿದಿದ್ದಾರೆ.
ಇನ್ನು ಸೀಮಿತ ಓವರ್ಗಳಿಗೆ ಬೌಲಿಂಗ್ ಸಲಹೆಗಾರರಾಗಿರುವ ಡೇನಿಯಲ್ ವಿಟೋರಿ ಅವರನ್ನು ಚಿಕ್ಕ ಸರಣಿಯಾಗಿರುವುದರಿಂದ ಬಿಸಿಬಿ ಕರೆ ನೀಡಿಲ್ಲ. ತಂಡದ ವಿಶ್ಲೇಷಕರಾಗಿರುವ ಶ್ರೀನಿವಾಸ್ ಚಂದ್ರಶೇಖರನ್ ಭಾರತೀಯ ನಾಗರಿಕನಾಗಿರುವುದರಿಂದ ಈ ಪ್ರವಾಸ ಕೈಗೊಳ್ಳುತ್ತಿಲ್ಲ ಎಂದು ಬಿಸಿಬಿ ಕ್ರಿಕೆಟ್ ಕಾರ್ಯಾಚರಣೆಗಳ ಅಧ್ಯಕ್ಷ ಅಕ್ರಮ್ ಖಾನ್ ತಿಳಿಸಿದ್ದಾರೆ.
ತಂಡದ ಹೆಡ್ ಕೋಚ್ ರಸೆಲ್ ಡೊಮಿಂಗೊ, ಫಿಸಿಯೋ ಜೂಲಿಯನ್ ಕ್ಯಾಲಿಫ್ಯಾಟೋ ಹಾಗೂ ಸ್ಟ್ರೆಂತ್ ಅಂಡ್ ಕಂಡೀಷನಿಂಗ್ ಕೋಚ್ ತುಷಾರ್ ಕಾಂತಿ ಹವಲ್ದಾರ್ ತಂಡದ ಜೊತೆ ಇರುತ್ತಾರೆ ಎಂದು ಅವರು ತಿಳಿಸಿದ್ದಾರೆ.
ಬಾಂಗ್ಲಾದೇಶ ತಂಡ ಪಾಕಿಸ್ತಾನದಲ್ಲಿ 3 ಟಿ-20, 2 ಟೆಸ್ಟ್ ಹಾಗೂ ಒಂದು ಏಕದಿನ ಪಂದ್ಯವಾಡಲಿದೆ. ಜನವರಿ 24ರಿಂದ 27ರವರೆಗೆ ಟಿ-20 ಸರಣಿ, ಫೆಬ್ರವರಿ 7ರಿಂದ 11ರವರೆಗೆ ಮೊದಲ ಟೆಸ್ಟ್ ನಡೆಯಲಿದೆ. ಮತ್ತೆ ಏಪ್ರಿಲ್ನಲ್ಲಿ ಪಾಕಿಸ್ತಾನಕ್ಕೆ ತೆರಳಲಿರುವ ಬಾಂಗ್ಲಾದೇಶ ತಂಡ, ಏಪ್ರಿಲ್ 3ರಂದು ಏಕೈಕ ಏಕದಿನ ಪಂದ್ಯವಾಡಿ, ನಂತರ ಏಪ್ರಿಲ್ 5ರಿಂದ 9ರವರೆಗೆ ಎರಡನೇ ಟೆಸ್ಟ್ ಆಡಲಿದೆ.
