ಕನ್ನಡಿಗರ ಬೌಲಿಂಗ್​ ಪರಾಕ್ರಮ... 2 ದಶಕಗಳ ಹಿಂದೆ ಇದೇ ಗ್ರೌಂಡ್​ನಲ್ಲಿ ಪಾಕ್​ ಮಣ್ಣುಮುಕ್ಕಿಸಿತ್ತು ಭಾರತ!

20 ವರ್ಷಗಳ ಹಿಂದೆ ಭಾರತ ಮತ್ತು ಪಾಕಿಸ್ತಾನ ತಂಡಗಳು ಇದೇ ಮ್ಯಾಂಚೆಸ್ಟರ್​ ಕ್ರೀಡಾಂಗಣದಲ್ಲಿ ಕಣಕ್ಕಿಳಿದಿದ್ದವು. ಇದೀಗ ಅದೇ ಕ್ರೀಡಾಂಗಣದಲ್ಲಿ ಸಾಂಪ್ರದಾಯಿಕ ಎದುರಾಳಿಗಳು ಎದುರಾಗುತ್ತಿದ್ದು, ಈ ಪಂದ್ಯಕ್ಕಾಗಿ ಇಡೀ ಕ್ರಿಕೆಟ್​ ಜಗತ್ತೇ ಕಾಯುತ್ತಿದೆ.

ಮ್ಯಾಂಚೆಸ್ಟರ್​: 1999 ಜೂನ್​ 8ರಂದು ಭಾರತ-ಪಾಕಿಸ್ತಾನ ವಿಶ್ವಕಪ್​ನ ನಾಲ್ಕನೇ ಪಂದ್ಯದಲ್ಲಿ ಮುಖಾಮುಖಿಯಾಗಿದ್ದವು. ಈ ಪಂದ್ಯದಲ್ಲಿ ಕನ್ನಡಿಗರಾದ ವೆಂಕಟೇಶ್​ ಪ್ರಸಾದ್​, ಅನಿಲ್​ ಕುಂಬ್ಳೆ ಹಾಗೂ ಜಾವಗಲ್ ಶ್ರೀನಾಥ್​ ಪಾಕ್​ನ ಎಲ್ಲಾ 10 ವಿಕೆಟ್​ಗಳನ್ನು ಪಡೆದುಕೊಂಡಿದ್ದು ವಿಶೇಷ.

ಆ ಪಂದ್ಯದಲ್ಲಿ ಮೊದಲು ಬ್ಯಾಟಿಂಗ್​ ಮಾಡಿದ್ದ ಭಾರತ ತಂಡಕ್ಕೆ ಕನ್ನಡಿಗ ರಾಹುಲ್​ ದ್ರಾವಿಡ್ 61 ರನ್​ , ನಾಯಕ ಮೊಹಮ್ಮದ್​ ಅಜರುದ್ದೀನ್​ 59 ರನ್​ ಹಾಗೂ ಸಚಿನ್​ ತೆಂಡೂಲ್ಕರ್​ರ​ 45 ರನ್​ಗಳ ನೆರವಿನಿಂದ 227 ರನ್​ಗಳ ಸಾಧಾರಣ ಮೊತ್ತ ದಾಖಲಿಸಿತ್ತು.

ಜಾವಗಲ್​ ಶ್ರೀನಾಥ್​

228 ರನ್​ಗಳ ಗುರಿ ಪಡೆದಿದ್ದ ಪಾಕಿಸ್ತಾನ ತಂಡ ಭಾರತೀಯರ ಬೌಲಿಂಗ್​ ದಾಳಿಗೆ ಸಿಲುಕಿ ಕೇವಲ 45.3 ಓವರ್​ಗಳಿಗೆ 180 ರನ್​ಗಳಿಗೆ ಆಲೌಟ್​ ಆಗಿ 47 ರನ್​ಗಳಿಂದ ಸೋಲನುಭವಿಸಿತ್ತು. ಈ ಪಂದ್ಯದಲ್ಲಿ ವೆಂಕಟೇಶ್​ ಪ್ರಸಾದ್​ 5 , ಜಾವಗಲ್​ ಶ್ರೀನಾಥ್​ 3 ಹಾಗೂ ಸ್ಪಿನ್ನರ್​ ಅನಿಲ್​ ಕುಂಬ್ಳೆ ಪ್ರಮುಖ 2 ವಿಕೆಟ್​ ಪಡೆದು ಪಾಕಿಸ್ತಾನದ ಕೈಯಲ್ಲಿದ್ದ ಗೆಲುವನ್ನು ಕಿತ್ತುಕೊಂಡಿದ್ದರು.

ಇದೀಗ 20 ವರ್ಷಗಳ ನಂತರ ಇದೇ ಕ್ರೀಡಾಂಗಣದಲ್ಲಿ ಮತ್ತೆ ಎರಡು ತಂಡಗಳೂ ಎದುರಾಗುತ್ತಿವೆ. ಹೀಗಾಗಲೆ ಪಾಕಿಸ್ತಾನದ ವಿರುದ್ಧ 6-0 ಯಲ್ಲಿ ಅಜೇಯ ದಾಖಲೆ ಹೊಂದಿರುವ ಭಾರತ ತಂಡ ತನ್ನ ವಿಜಯ ಯಾತ್ರೆಯನ್ನು ಮುಂದುವರಿಸುವ ಕಾತುರದಲ್ಲಿದ್ದರೆ, ಈ ವರ್ಷವಾದರೂ ಭಾರತವನ್ನು ಮಣಿಸಿ ವಿಶ್ವಕಪ್​ನಲ್ಲಿ ಗೆಲುವಿನ ಖಾತೆ ತೆರೆಯುವ ಆಲೋಚನೆಯಲ್ಲಿ ಪಾಕಿಸ್ತಾನಿದೆ.