ಮೆಲ್ಬೋರ್ನ್: ಕೋವಿಡ್ 19ನಿಂದ ಮುಂದೂಡಲ್ಪಟ್ಟಿದ್ದ ಇಂಡಿಯನ್ ಪ್ರೀಮಿಯರ್ ಲೀಗ್ ಸೆಪ್ಟೆಂಬರ್ನಿಂದ ಯುಎಇನಲ್ಲಿ ನಡೆಯಲಿದ್ದು, ಕ್ರಿಕೆಟ್ ಆಸ್ಟ್ರೇಲಿಯಾ ತನ್ನ ಕ್ರಿಕೆಟಿಗರಿಗೆ ಶ್ರೀಮಂತ ಲೀಗ್ನಲ್ಲಾಡಲು ನಿರಾಪೇಕ್ಷಣಾ ಪತ್ರ ನೀಡಿದೆ.
ಐಪಿಎಲ್ ರದ್ದಾದ ನಂತರ ಕ್ರಿಕೆಟ್ ಆಸ್ಟ್ರೇಲಿಯಾ ರಾಷ್ಟ್ರೀಯ ತಂಡ ವೇಳಾಪಟ್ಟಿಗೆ ತನ್ನೆಲ್ಲಾ ಆಟಗಾರರು ಗೌರವ ನೀಡಿ ಐಪಿಎಲ್ನಲ್ಲಿ ಆಡಬಾರದೆಂದು ತಾಕೀತು ಮಾಡಿತ್ತು. ಆದರೆ ಬಿಸಿಸಿಐ ಟಿ20 ವಿಶ್ವಕಪ್ ಅನ್ನು ಯುಎಇನಲ್ಲಿ ಆಯೋಜಿಸುವ ಮೂಲಕ ಎಲ್ಲಾ ಕ್ರಿಕೆಟ್ ಮಂಡಳಿ ತಾವಾಗಿಯೇ ಎನ್ಒಸಿ ನೀಡುವಂತೆ ಮಾಡಿದೆ.
ವಿಶ್ವಕಪ್ಗೆ ಸಿದ್ಧತೆಗೆ ಅತ್ಯುತ್ತಮ ವೇದಿಕೆಯಾಗಿದ್ದು ಇಂಗ್ಲೆಂಡ್ ಕ್ರಿಕೆಟ್ ಬೋರ್ಡ್ ಮತ್ತು ನ್ಯೂಜಿಲ್ಯಾಂಡ್ ಕ್ರಿಕೆಟ್ ಬೋರ್ಡ್ಗಳು ಈಗಾಗಲೇ ಎನ್ಒಸಿ ನೀಡಿವೆ. ಇದೀಗ ಕ್ರಿಕೆಟ್ ಆಸ್ಟ್ರೇಲಿಯಾ ಕೂಡ ಭಾನುವಾರ ತನ್ನ ಆಟಗಾರರು ಇಂಡಿಯನ್ ಪ್ರೀಮಿಯರ್ ಲೀಗ್ನಲ್ಲಿ ಆಡುವುದಕ್ಕೆ ಅನುಮತಿಸಿದೆ.
ಇತ್ತೀಚೆಗೆ ಅಂತ್ಯಗೊಂಡ ವೆಸ್ಟ್ ಇಂಡೀಸ್ ಮತ್ತು ಬಾಂಗ್ಲಾದೇಶ ಪ್ರವಾಸದ ವೇಳೆ ಆಸ್ಟ್ರೇಲಿಯಾ ತಂಡದಲ್ಲಿದ್ದ ರಿಲೇ ಮೆರಿಡಿತ್, ಡೇನಿಯಲ್ ಕ್ರಿಶ್ಚಿಯನ್, ಮೊಯಿಸಸ್ ಹೆನ್ರಿಕ್ಸ್, ಮಿಚೆಲ್ ಮಾರ್ಷ್, ಆ್ಯಡಂ ಜಂಪಾ, ಆ್ಯಂಡ್ರ್ಯೂ ಟೈ ಮತ್ತು ಜೋಶ್ ಪಿಲಿಪ್ಪೆ ಐಪಿಎಲ್ನಲ್ಲಿ ಒಪ್ಪಂದ ಹೊಂದಿದ್ದಾರೆ. ಇವರ ಜೊತೆಗೆ ಸಿಎ ವಾರ್ಷಿಕ ಗುತ್ತಿಗೆಯಲ್ಲಿಲ್ಲದ ನಥನ್ ಕೌಲ್ಟರ್ ಲೈನ್, ಕ್ರಿಸ್ ಲಿನ್, ಬೆನ್ ಕಟಿಂಗ್ ಕೂಡ ಐಪಿಎಲ್ ಒಪ್ಪಂದ ಹೊಂದಿದ್ದಾರೆ.
ಈ ಪ್ರವಾಸಗಳಿಂದ ವೈಯಕ್ತಿಕ ಕಾರಣಗಳಿಂದ ಹೊರಗುಳಿದಿದ್ದ ಡೇವಿಡ್ ವಾರ್ನರ್, ಗ್ಲೆನ್ ಮ್ಯಾಕ್ಸ್ವೆಲ್, ಸ್ಟೀವ್ ಸ್ಮಿತ್, ಕೇನ್ ರಿಚರ್ಡ್ಸನ್, ಜೇ ರಿಚರ್ಡ್ಸನ್ ಹಾಗು ಡೇನಿಯಲ್ ಸ್ಯಾಮ್ಸ್ ಕೂಡ ಐಪಿಎಲ್ ಮೂಲಕ ಮತ್ತೆ ಸ್ಪರ್ಧಾತ್ಮಕ ಕ್ರಿಕೆಟ್ಗೆ ಮರಳಲಿದ್ದಾರೆ.
ಇದನ್ನೂ ಓದಿ:ಆಸ್ಟ್ರೇಲಿಯನ್ನರು 2ನೇ ಭಾಗದ ಐಪಿಎಲ್ನಲ್ಲಾಡುವುದು ಈ ಕಾರಣಕ್ಕೆ ಅತ್ಯುತ್ತಮ ನಿರ್ಧಾರ: ಪಾಂಟಿಂಗ್ ಸಮರ್ಥನೆ
