ಪ್ಯಾರೀಸ್: ಭಾರತದ ಸ್ಟಾರ್ ಬ್ಯಾಡ್ಮಿಂಟನ್ ಆಟಗಾರ್ತಿ ಸೈನಾ ನೆಹ್ವಾಲ್ ಫ್ರಾನ್ಸ್ನ ಮೇರಿ ಬಟೋಮೆನೆ ಅವರನ್ನು ಮಣಿಸುವ ಮೂಲಕ ಒರ್ಲಿಯನ್ಸ್ ಮಾಸ್ಟರ್ಸ್ ಕ್ವಾರ್ಟರ್ ಫೈನಲ್ಸ್ ಪ್ರವೇಶಿಸಿದರು.
ಭಾರತೀಯ ಆಟಗಾರ್ತಿ 18-21, 21-15, 21-10ರಲ್ಲಿ ಸ್ಥಳೀಯ ಆಟಗಾರ್ತಿಯನ್ನು ಮಣಿಸಿದರು. ಮೊದಲ ಗೇಮ್ನಲ್ಲಿ ಸೋಲುಂಡ ಸೈನಾ ನಂತರ 2 ಗೇಮ್ಗಳಲ್ಲಿ ಅದ್ಭುತವಾಗಿ ತಿರುಗಿ ಬಿದ್ದು ವಿಜಯ ಸಾಧಿಸಿದರು. ಈ ಟೂರ್ನಿಯು ಕೂಡಾ ಬ್ಯಾಡ್ಮಿಂಟನ್ ವರ್ಲ್ಡ್ ಫೆಡರೇಶನ್‌ನ (ಬಿಡಬ್ಲ್ಯುಎಫ್) ಪರಿಷ್ಕೃತಗೊಂಡ ಒಲಿಂಪಿಕ್ ಅರ್ಹತಾ ಅವಧಿಯ ಭಾಗವಾಗಿದೆ.
ಇದನ್ನೂ ಓದಿ:ವಿಶ್ವ ಬ್ಯಾಡ್ಮಿಂಟನ್ ಶ್ರೇಯಾಂಕದಲ್ಲಿ 23ನೇ ಸ್ಥಾನ ಪಡೆದ 19 ವರ್ಷದ ಲಕ್ಷ್ಯ ಸೇನ್!
ಭಾರತದ ಮತ್ತೊಬ್ಬ ಮಹಿಳಾ ಆಟಗಾರ್ತಿ ಇರಾ ಶರ್ಮಾ ಕೂಡ ಬಲ್ಗೇರಿಯಾದ ಮರಿಯಾ ಮಿಟ್ಸೋವ ಅವರನ್ನು 21-18, 21-13ರಲ್ಲಿ ಮಣಿಸಿ 8ರ ಘಟ್ಟಕ್ಕೆ ಪ್ರವೇಶ ಪಡೆದಿದ್ದಾರೆ.
ಪುರುಷರ ವಿಭಾಗದಲ್ಲಿ ಲಕ್ಷ್ಯ ಸೇನ್ ಅಣ್ಣ ಚಿರಾಗ್ ಸೇನ್ ವಿಶ್ವದ ಮಾಜಿ ನಂಬರ್ 8 ಆಟಗಾರ ಹ್ಯಾನ್ಸ್-ಕ್ರಿಸ್ಟಿಯನ್ ವಿಟಿಂಗ್ಹಸ್ ವಿರುದ್ಧ ಪ್ರೀ ಕ್ವಾರ್ಟರ್ ಫೈನಲ್ ಪಂದ್ಯದಲ್ಲಿ 21-14, 9-21, 17-21 ರ ಅಂತರದಲ್ಲಿ ಸೋಲು ಕಂಡು ನಿರಾಶೆ ಅನುಭವಿಸಿದರು.
