ಬಿಗ್ಬಾಸ್ ಕನ್ನಡ ಸೀಸನ್ 8 ರ ಏಳನೇ ವಾರ ಯುವ ಗಾಯಕ ವಿಶ್ವನಾಥ್ ಎಲಿಮಿನೇಟ್ ಆಗಿದ್ದಾರೆ. ದೊಡ್ಡಮನೆಯಲ್ಲಿ ಕ್ಯಾಪ್ಟನ್ ಆಗಿದ್ದ ಒಂದು ವಾರ ಹೊರತುಪಡಿಸಿ, ಉಳಿದ ಎಲ್ಲಾ ವಾರದಲ್ಲೂ ವಿಶ್ವನಾಥ್ ನಾಮಿನೇಟ್ ಆಗಿದ್ದರು.
ಈ ವಾರ ಶಮಂತ್ ಮನೆಯಿಂದ ಹೊರಗೆ ಹೋಗಬಹುದು ಎಂದು ಬಹುತೇಕರು ಊಹಿಸಿದ್ದರು. ಪ್ರತಿ ವಾರವೂ ಕಡಿಮೆ ವೋಟ್ ಪಡೆದುಕೊಳ್ಳುತ್ತಿದ್ದ ಶಮಂತ್ ಕಳೆದ ವಾರ ಲಕ್ ಎಂಬಂತೆ ಎಲಿಮಿನೇಷನ್ನಿಂದ ಪಾರಾಗಿದ್ದರು. ಹಾಗಾಗಿ ಅವರು ಈ ವಾರ ಔಟ್ ಆಗುವ ಸಾಧ್ಯತೆ ದಟ್ಟವಾಗಿತ್ತು. ಆದರೆ ಅಂತಿಮವಾಗಿ ವಿಶ್ವನಾಥ್ ಬಿಗ್ ಬಾಸ್ ಜರ್ನಿ ಅಂತ್ಯವಾಗಿದೆ.
ನಟ ಕಿಚ್ಚ ಸುದೀಪ್ ಅವರು ಇಲ್ಲದ ಈ ವಾರ ಬಿಗ್ ಬಾಸ್ ಸದಸ್ಯರಿಗೆ ಟಾಸ್ಕ್ಗಳನ್ನು ನೀಡುತ್ತಾ ಒಬ್ಬೊಬ್ಬರನ್ನಾಗಿ ಸೇಫ್ ಮಾಡಿದರು. ಕೊನೆಯಲ್ಲಿ ಚಕ್ರವರ್ತಿ ಚಂದ್ರಚೂಡ್ ಹಾಗೂ ವಿಶ್ವನಾಥ್ ಉಳಿದುಕೊಂಡರು. ಮನೆಯಿಂದ ಹೊರಹೋಗುವ ಸ್ಪರ್ಧಿಯ ವಿಟಿ ಟಿವಿ ಮೇಲೆ ಪ್ರಸಾರವಾಗಲಿದೆ ಎಂದು ಬಿಗ್ಬಾಸ್ ಹೇಳಿದರು. ನಂತರ ವಿಶ್ವನಾಥ್ ಅವರ ಬಿಗ್ ಬಾಸ್ ಜರ್ನಿಯ ವಿಟಿ ಮನೆಯಲ್ಲಿನ ಟಿವಿಯ ಪರದೆ ಮೇಲೆ ಪ್ರಸಾರವಾಯಿತು.
ಮನೆಯಿಂದ ಹೊರಹೋಗುವ ಮೊದಲು ತಾಯಿಗೆ ಬರೆದ ಹಾಡೊಂದನ್ನು ವಿಶ್ವನಾಥ್ ಹಾಡಿದರು. ಬಿಗ್ಬಾಸ್ ನೀಡಿದ ವಿಶೇಷ ಅಧಿಕಾರದಂತೆ ಮುಂದಿನ ವಾರದ ನಾಮಿನೇಷನ್ ಪ್ರಕ್ರಿಯೆಯಿಂದ ನಟಿ ನಿಧಿ ಸುಬ್ಬಯ್ಯ ಅವರನ್ನು ಸೇವ್ ಮಾಡಿದರು.
