ಬೆಂಗಳೂರು: ರಾಜ್ಯದಲ್ಲಿ ಲಾಕ್ಡೌನ್ ಆದ ನಂತರ ಧಾರಾವಾಹಿ, ಸಿನಿಮಾ ಮತ್ತು ರಿಯಾಲಿಟಿ ಶೋ ಶೂಟಿಂಗ್ ಸ್ಥಗಿತಗೊಂಡಿವೆ. ಈ ಹಿನ್ನೆಲೆ ಕೆಲವು ವಾಹಿನಿಗಳಲ್ಲಿ ಹಳೆಯ ಜನಪ್ರಿಯ ಪೌರಾಣಿಕ ಧಾರಾವಾಹಿಗಳನ್ನು ಮರು ಪ್ರಸಾರ ಮಾಡಲಾಗುತ್ತಿದೆ.
ಕಳೆದ ವರ್ಷ ಲಾಕ್ಡೌನ್ ಸಮಯದಲ್ಲಿಯೂ ‘ಮಹಾಭಾರತ’ ಧಾರಾವಾಹಿ ಪ್ರಸಾರವಾಗಿತ್ತು. ಆಗ ಧಾರಾವಾಹಿ ನೋಡಿದ ಪ್ರೇಕ್ಷಕರಿಂದ ಉತ್ತಮ ಪ್ರತಿಕ್ರಿಯೆ ವ್ಯಕ್ತವಾಗಿತ್ತು. ಇದೀಗ ಪ್ರೇಕ್ಷಕರ ಒತ್ತಾಯದ ಮೇರೆಗೆ ಮತ್ತೆ ಮನೆ ಮನೆಗೆ ಬರ್ತಿದೆ ಮಹಾಕಾವ್ಯ 'ಮಹಾಭಾರತ'. ಇದೇ ಮೇ 15 ರಿಂದ ಶನಿವಾರ ಮತ್ತು ಭಾನುವಾರ ಸಂಜೆ 6:00 ರಿಂದ 8:30ರವರೆಗೆ ಸ್ಟಾರ್ ಸುವರ್ಣವಾಹಿನಿಯಲ್ಲಿ 'ಮಹಾಭಾರತ' ಧಾರಾವಾಹಿ ಪ್ರಸಾರವಾಗಲಿದೆ. ಹಿಂದಿಯಲ್ಲಿ ಪ್ರಸಾರವಾಗುತ್ತಿದ್ದ 'ಮಹಾಭಾರತ' ಧಾರಾವಾಹಿ ಈಗ ಕನ್ನಡದಲ್ಲಿ ಬರುತ್ತಿದ್ದು, ಈ ಧಾರಾವಾಹಿ ಬಹಳ ಹಳೆಯದಾದರೂ ಇಂದಿಗೂ ಅಪಾರ ಅಭಿಮಾನಿ ಬಳಗ ಹೊಂದಿದೆ.
ಬಿ.ಆರ್.ಚೋಪ್ರಾ ಮತ್ತು ರವಿ ಚೋಪ್ರಾ ನಿರ್ದೇಶನದ ಈ ಧಾರಾವಾಹಿಯಲ್ಲಿ ಪ್ರತಿಯೊಂದು ದೃಶ್ಯವನ್ನು ಅತ್ಯದ್ಭುತವಾಗಿ ತೋರಿಸಿದ್ದಾರೆ. ಪ್ರತಿಯೊಂದು ದೃಶ್ಯಗಳು ಕಣ್ಣಿಗೆ ಕಟ್ಟಿದಂತಿವೆ. ಜನರು ಈ ಧಾರಾವಾಹಿಯನ್ನು ನೋಡಿದಾಗ ಮಹಾಭಾರತ ಸಂಭವಿಸಿದಾಗ ಇದೇ ರೀತಿ ನಡೆದಿರಬೇಕು ಎಂದು ಭಾವಿಸುತ್ತಾರೆ. ಧಾರಾವಾಹಿಯಲ್ಲಿ ಪ್ರತಿಯೊಬ್ಬರ ಅಭಿನಯ ಮನೋಜ್ಞವಾಗಿದೆ. ದ್ರೌಪದಿಯ ದೃಶ್ಯವನ್ನು ಚಿತ್ರೀಕರಿಸುವಾಗ ಆ ಪಾತ್ರ ಮಾಡುತ್ತಿದ್ದ ರೂಪಾ ಗಂಗೂಲಿ ಪಾತ್ರದಲ್ಲಿ ಸಂಪೂರ್ಣವಾಗಿ ಮುಳುಗಿದ್ದರಂತೆ. ಆ ಪಾತ್ರವನ್ನು ನಿರ್ವಹಿಸುವಾಗ ಅವರು ನಿಜವಾಗಿ ಅತ್ತಿದ್ದರು ಎಂದು ಹೇಳಲಾಗುತ್ತದೆ. ಈ ಧಾರಾವಾಹಿಯಲ್ಲಿ ಕೃಷ್ಣನ ಪಾತ್ರದಲ್ಲಿ ನಿತೀಶ್ ಭಾರದ್ವಾಜ್, ಅರ್ಜುನನ ಪಾತ್ರದಲ್ಲಿ ಅರ್ಜುನ್, ಭೀಮನ ಪಾತ್ರದಲ್ಲಿ ಪ್ರವೀಣ್ ಕುಮಾರ್, ಕರ್ಣನ ಪಾತ್ರದಲ್ಲಿ ಪಂಕಜ್ ಧೀರ್, ಯುಧಿಷ್ಠರನ ಪಾತ್ರದಲ್ಲಿ ಗಜೇಂದ್ರ ಚೌಹಾಣ್, ಧುರ್ಯೋಧನನ ಪಾತ್ರದಲ್ಲಿ ಪುನೀತ್ ಇಸ್ಸಾರ್, ಶಕುನಿ ಪಾತ್ರದಲ್ಲಿ ಗುಫಿ ಪೈಂತಾಲ್, ಧೃತರಾಷ್ಟ್ರನ ಪಾತ್ರದಲ್ಲಿ ಗಿರಿಜಾ ಶಂಕರ್, ದ್ರೋಣಾಚಾರ್ಯ ಪಾತ್ರದಲ್ಲಿ ಸುರೇಂದ್ರ ಪಾಲ್, ಅಭಿಮನ್ಯು ಪಾತ್ರವನ್ನು ಮಯೂರ್ ವರ್ಮಾ ನಿರ್ವಹಿಸಿದ್ದಾರೆ.
ಓದಿ:15 ಸಾವಿರ ಹಣ ನೀಡಿದ ಅಂಧ ಮಹಿಳೆ: ಶ್ರೀಮಂತ ಭಾರತೀಯಳು ಎಂದ ಸೋನು ಸೂದ್
