ಕರಾವಳಿ ಕುವರಿ ಚೈತ್ರಾ ರೈ ಕನ್ನಡ ಕಿರುತೆರೆ ವೀಕ್ಷಕರಿಗೆ ಪರಿಚಿತ ಮುಖ. ಆಶು ಬೆದ್ರ ನಿರ್ದೇಶನದಲ್ಲಿ ಮೂಡಿ ಬರುತ್ತಿದ್ದ ರಾಧಾ ಕಲ್ಯಾಣ ಧಾರಾವಾಹಿಯಲ್ಲಿ ಬ್ಯೂಟಿಫುಲ್ ವಿಲನ್ ವಿಶಾಖಾ ಆಗಿ ಕಿರುತೆರೆ ವೀಕ್ಷಕರ ಮನ ಗೆದ್ದಿದ್ದ ಕನ್ನಡತಿ ಚೈತ್ರಾ ರೈ ಸದ್ಯ ತೆಲುಗು ಕಿರುತೆರೆಯಲ್ಲಿ ಸಖತ್ ಬ್ಯುಸಿ ಆಗಿದ್ದಾರೆ. ಕಳೆದ ಏಳು ವರ್ಷಗಳಿಂದ ತೆಲುಗು ಕಿರುತೆರೆಯಲ್ಲಿ ನಟಿಸುತ್ತಿರುವ ಚೈತ್ರಾ ರೈ ಅವರನ್ನು ಕನ್ನಡ ಕಿರುತೆರೆ ಮರೆತಿಲ್ಲ. ಇಂದು ಚೈತ್ರಾ ಅವರನ್ನು ಕಂಡಾಗ ಜನ ವಿಶಾಖಾ ಎಂದೇ ಗುರುತಿಸುವುದೇ ಅದಕ್ಕೆ ಉದಾಹರಣೆ.
ಹೋಟೆಲ್ ಮ್ಯಾನೆಜ್ ಮೆಂಟ್ ಕೋರ್ಸ್ ಮಾಡುತ್ತಿದ್ದ ಚೆಂದುಳ್ಳಿ ಚೆಲುವೆ ಚೈತ್ರಾಗೆ ಅದ್ಯಾವಾಗ ನಟಿಸಲು ಆಫರ್ ಬಂತು ಆಗಲೇ ಓದಿಗೆ ಬಾಯ್ ಹೇಳಿ ನಟನೆಗೆ ಹಾಯ್ ಹೇಳಿದ್ದರು. ಮನೆಯಲ್ಲಿ ನಟನೆಯ ರೀತಿ ನೀತಿಗಳು ತಿಳಿದವರಾರೂ ಇರಲಿಲ್ಲ. ಮೊದಲ ಬಾರಿಗೆ ನಟನಾ ಕ್ಷೇತ್ರಕ್ಕೆ ಕಾಲಿಡುವಾಗ ತುಂಬಾನೇ ನರ್ವಸ್ ಆಗಿದ್ದ ಚೈತ್ರಾ ಬಣ್ಣದ ಲೋಕಕ್ಕೆ ಬಂದು ಹತ್ತು ವರ್ಷಗಳು ಕಳೆದಿವೆ.
ನಟನೆಯಲ್ಲಿ ಕಲಿತು ಮುಗಿಯೋದು ಅಂತ ಏನೂ ಇರೋದಿಲ್ಲ. ಪ್ರತಿದಿನವೂ ಹೊಸತನ್ನು ಕಲಿಯುವುದಿರುತ್ತದೆ ಎಂದು ಹೇಳುವ ಚೈತ್ರಾ ಇದೀಗ ತೆಲುಗಿನ ಅಕ್ಕ ಚೆಲ್ಲುಲು ಧಾರಾವಾಹಿಯಲ್ಲಿ ಅಭಿನಯಿಸುತ್ತಿದ್ದಾರೆ. ರಾಧಾ ಕಲ್ಯಾಣ ಸೇರಿದಂತೆ ಕುಸುಮಾಂಜಲಿ, ಗೆಜ್ಜೆಪೂಜೆ, ನಾಗಮಣಿ, ಪೌರ್ಣಮಿ, ಯುಗಾದಿ, ಬೊಂಬೆಯಾಟವಯ್ಯಾ, ಬಣ್ಣದ ಬುಗುರಿ ಹೀಗೆ ಬೆರಳೆಣಿಕೆಯಷ್ಟು ಕನ್ನಡ ಧಾರಾವಾಹಿಯಲ್ಲಿ ನಟಿಸಿರುವ ಚೈತ್ರಾ ಸದ್ಯ ತೆಲುಗಿನ ಬೇಡಿಕೆಯ ಕಿರುತೆರೆ ನಟಿಯೂ ಹೌದು!
ನಾನಿಂದು ಕನ್ನಡ ಕಿರುತೆರೆಯಲ್ಲಿ ಅಭಿನಯಿಸುತ್ತಿಲ್ಲ ನಿಜ. ಆದರೆ ಕನ್ನಡ ಕಿರುತೆರೆ ವೀಕ್ಷಕರು ನನ್ನನ್ನು ಇಂದಿಗೂ ನೆನಪಿಟ್ಟಿದ್ದಾರೆ ಎಂದರೆ ಅದಕ್ಕೆ ಕಾರಣ ರಾಧಾ ಕಲ್ಯಾಣ ಧಾರಾವಾಹಿ. ಅದರ ವಿಶಾಖಾ ಪಾತ್ರ ನನಗೆ ಸಾಕಷ್ಟು ಜನಪ್ರಿಯತೆಯನ್ನು ತಂದುಕೊಟ್ಟಿತ್ತು ಎನ್ನುತ್ತಾರೆ ಚೈತ್ರಾ ರೈ. ಸದ್ಯ ಇವರು ತೆಲುಗು ಕಿರುತೆರೆಯಲ್ಲಿ ಬ್ಯುಸಿಯಾಗಿದ್ದರೂ ಕನ್ನಡದಷ್ಟು ಖುಷಿ ಅಲ್ಲಿ ಅವರಿಗೆ ಸಿಗುವುದಿಲ್ಲವಂತೆ!
